ຂໍໃຫ້ຂະແໜງມະຫາພາກມີມາດຕະການ ເຂັ້ມງວດຕໍ່ລະບົບໄຟຟ້າຄົວເຮືອນ
ໂດຍ: ທ່ຽງທຳ
ສະບາຍດີ ເພື່ອນຜູ້ອ່ານທີ່ຮັກແພງ, ດັ່ງພວກເຮົາເຄີຍໄດ້ຍິນມາຫລາຍເລື່ອງອັກຄີໄພເກີດຂຶ້ນຢູ່ບ່ອນໃດກໍວ່າຍ້ອນຂາດສະຕິໃນການນຳໃຊ້ຟືນໄຟ ແລະ ອີກສ່ວນຫລາຍແມ່ນຈະຖິ້ມໂທດໃຫ້ແຕ່ໄຟຟ້າລັດວົງຈອນ ຍ້ອນລະບົບສາຍໄຟເກົ່າແກ່, ການຕິດຕັ້ງລະບົບໄຟຟ້າໃນອາຄານ, ເຮືອນຊານບໍ່ໄດ້ມາດຕະຖານ ແລະ ອື່ນໆ, ສ່ວນຜູ້ເສຍຫາຍກໍພຽງແຕ່ໄດ້ນັ່ງໄຫ້ເບິ່ງຄວາມເສຍຫາຍຢ່າງບໍ່ມີທາງອອກ ແລະ ບໍ່ຮູ້ວ່າຈະໄປເອົາໂທດໃຜໃນເມື່ອຕົນເອງຂາດສະຕິ, ໃນເມື່ອລະບົບໄຟຟ້າໃນເຮືອນເກົ່າແກ່, ບໍ່ໄດ້ມາດຖານ ແລະ ໃນຈຸດນີ້ ຜູ້ຂຽນມີແງ່ມຸມມອງໜຶ່ງ ເພື່ອຢາກນຳສະເໜີໃຫ້ຂະແໜງກ່ຽວຂ້ອງມະຫາພາກວ່າ: ສົມຄວນບໍ່ ທີ່ເຮົາຈະຕ້ອງລົງກວດກາລະບົບໄຟຟ້າໃນເຮືອນຊານຂອງປະຊາຊົນ ຫລື ຕຶກອາຄານຕ່າງໆ ເພື່ອຈະໄດ້ຮູ້ວ່າລະບົບໄຟຟ້າໃນອາຄານນັ້ນມັນໄດ້ມາດຖານ ຫລື ບໍ່ ? ຫລື ມັນເກົ່າແກ່ຊຸດໂຊມແນວໃດ ? ເພື່ອຂະແໜງການກ່ຽວຂ້ອງຈະໄດ້ແນະນຳກ່າວເຕືອນໃຫ້ຜູ້ເປັນເຈົ້າຂອງຈະຕ້ອງໄດ້ປ່ຽນຖ່າຍ, ປົວແປງ ແລະ ຖ້າບໍລິສັດໄຟຟ້າໃດຮັບເໝົາກໍ່ສ້າງກໍຈະຕ້ອງໄດ້ເຄັ່ງຂັດໃນດ້ານຄຸນນະພາບຕື່ມ ເພື່ອປະຊາຊົນຈະໄດ້ອຸ່ນໃຈວ່າລະບົບໄຟຟ້າໃນເຮືອນເຂົາເຈົ້າດີ ແລະ ມີມາດຕະຖານແລ້ວ ເພື່ອສາມາດຫລີກເວັ້ນຄວາມສ່ຽງທີ່ຈະເກີດອັກຄີໄພ.
ປັດຈຸບັນກໍກ້າວເຂົ້າສູ່ລະດູແລ້ງແລ້ວ ອາກາດຈະແຫ້ງ ພ້ອມມີລົມແຮງ ອາດມີຄວາມສ່ຽງກໍ່ໃຫ້ເກີດອັກຄີໄພໄດ້ງ່າຍ ຖ້າພວກເຮົາຂາດສະຕິໃນການນຳໃຊ້ຟືນໄຟ. ດັ່ງນັ້ນ ເບື້ອງເຈົ້າໜ້າທີ່ຕ້ານ ແລະ ສະກັດກັ້ນບັນຫາດັ່ງກ່າວກໍຈະຕ້ອງໄດ້ອອກແຮງລົງໂຄສະນາປຸກລະດົມໃຫ້ປະຊາຊົນເອົາໃຈໃສ່ ແລະ ຫັນມາມີສ່ວນຮ່ວມໃນການຕ້ານ ແລະ ສະກັດກັ້ນອັກຄີໄພໃຫ້ມີປະສິດທິພາບກວ່າເກົ່າ ເພື່ອບໍ່ໃຫ້ຜົນຮ້າຍດັ່ງກ່າວຕາມມາ.
