ຊາວຊິຣີທະຍອຍກັບປະເທດຫລັງລະບອບອັດຊາດລົ້ມສະຫລາຍ ຈໍາໃຈຕ້ອງຍອມລີ້ໄພ ເພາະສົງຄາມກາງເມືອງ
ຊາວຊິຣີເລີ່ມທະຍອຍເດີນທາງກັບບ້ານ ຫລັງກຸ່ມຕໍ່ຕ້ານລັດຖະບານຊິຣີບຸກຢຶດນະຄອນຫລວງດາມັດກັດ ເມືອງຫລວງຂອງຊິຣີ ໄດ້ສໍາເລັດໃນວັນທີ 8 ທັນວາ ເຮັດໃຫ້ທ່ານ ບາຊາ ອັລ-ອໍາຊາດ ປະທານາທິບໍດີຊິຣີ ຕ້ອງຫລົບໜີອອກນອກປະເທດ ແລະ ສິ້ນສຸດລະບອບການປົກຄອງຂອງທ່ານ ອໍາຊາດ ທີ່ປົກຄອງຊິຣີມາເຖິງ 24 ປີ.
ໂດຍຊາວຊິຣີທີ່ທະຍອຍລີ້ໄພໄປປະເທດໃກ້ຄຽງ ຄືລີບັງ ແລະ ຈໍແດນ ເພາະສົງຄາມກາງເມືອງໃນໄລຍະລະບອບການປົກຄອງຂອງທ່ານ ອໍາຊາດ ທະຍອຍເດີນທາງກັບປະເທດອີກ ພາຍຫລັງກຸ່ມຕໍ່ຕ້ານປະກາດໄຊຊະນະເໜືອທ່ານ ອໍາຊາດ ແລະ ປົດປ່ອຍນະຄອນຫລວງດາມັດກັດໄດ້ພຽງບໍ່ເທົ່າໃດຊົ່ວໂມງ.
ຊາຍຄົນໜຶ່ງທີ່ກໍາລັງເດີນທາງກັບເຂົ້າຊິຣີຈາກຈໍແດນຜ່ານຈຸດຂ້າມແດນເຈເບີ (Jabet Border Crossing) ລະບຸວ່າ: ລາວອາໄສຢູ່ຈໍແດນມາ 12 ປີ ເມື່ອລາວ ແລະ ຄອບຄົວຮູ້ຂ່າວວ່າລະບອບທ່ານ ອໍາຊາດ ລົ້ມສະຫລາຍແລ້ວ ພວກເຂົາຮູ້ສຶກດີໃຈຫລາຍທີ່ຈະໄດ້ເດີນທາງກັບປະເທດບ້ານເກີດອີກຢ່າງປອດໄພ.
ສໍານັກງານຂ້າຫລວງໃຫຍ່ຜູ້ລີ້ໄພແຫ່ງສະຫະປະຊາຊາດ (UNHCR) ລະບຸວ່າ: ນັບແຕ່ເຫດການອາລັບສະປຣິງໃນປີ 2011 ມີຊາວຊິຣີຫລາຍກວ່າ 14 ລ້ານຄົນຖືກບັງຄັບໃຫ້ຕ້ອງອົບພະຍົບລີ້ໄພເພາະສົງຄາມກາງເມືອງ ໂດຍກວ່າ 7.2 ລ້ານຄົນກາຍເປັນຜູ້ພັດຖິ່ນພາຍໃນປະເທດຊິຣີ ເຊິ່ງປະຊາກອນປະມານ 70% ຕ້ອງການການຊ່ວຍເຫລືອດ້ານມະນຸດສະທໍາ ແລະ 90% ມີຄຸນນະພາບຊີວິດຢູ່ພາຍໃຕ້ເສັ້ນຄວາມທຸກຍາກ.
ອ້າງອີງ:
- https://www.bbc.com/news/live/cwy8xzxe0w7t
- https://www.theguardian.com/world/2024/dec/09/beyond-our-dreams-exiled-syrian-activists-set-sights-on-returning-home
- https://www.nytimes.com/2024/12/08/world/middleeast/syrians-return-home.html
- https://www.unrefugees.org/news/syria-refugee-crisis-explained/
