ກະຊວງຍຸຕິທໍາ ສ.ເກົາຫລີ ປະກາດ ຫ້າມບໍ່ໃຫ້ ຢຸນຊອກຢອນ ປະທານາທິບໍດີ ເດີນທາງອອກນອກປະເທດ ເພາະເປັນຜູ້ຕ້ອງສົງໄສ ຂອງພະນັກງານສອບສວນ ຂໍ້ຫາເປັນກະບົດ ຈາກການປະກາດກົດ ໄອຍະການເສິກ.

ກະຊວງຍຸຕິທໍາຂອງ ສ.ເກົາຫລີ ອອກຖະແຫລງການ ອະນຸມັດຄໍາຮ້ອງຂອງສໍານັກງານກວດຄົນເຂົ້າເມືອງ ຫ້າມປະທານາທິບໍດີ ຢຸນຊອກຢອນ ເດີນທາງອອກນອກປະເທດ ໃນລະຫວ່າງຢູ່ໃນການສືບສວນ-ສອບສວນ ຂອງຄະນະໄອຍະການພິເສດ ກ່ຽວກັບຂໍ້ຫາກໍ່ກະບົດ ແລະ ການໃຊ້ອໍານາດບໍ່ຖືກຕ້ອງ ຈາກການປະກາດກົດໄອຍະການເສິກ ເຊິ່ງມີຜົນບັງຄັບໃຊ້ປະມານ 6 ຊົ່ວໂມງ ລະຫວ່າງຄືນວັນທີ 3 – 4 ທັນວາ2024.

ທັງນີ້, ທ່ານ ປາກ ເຊຮາຢອນ ຫົວໜ້າຄະນະໄອຍະການພິເສດ ຖະແຫລງໃນວັນທີ 8 ທັນວານີ້ວ່າ: ເພື່ອສືບສວນ-ສອບສວນ ກໍລະນີຜູ້ນໍາ ສ.ເກົາຫລີ ໃຊ້ອໍານາດປະກາດກົດໄອຍະການເສິກ ປະທານາທິ ບໍດີຂອງປະເທດມີສະຖານະເປັນໜຶ່ງໃນຜູ້ຖືກສົງໄສກ່ຽວຂ້ອງຄະດີນີ້ ໂດຍພະນັກງານສອບສວນດໍາເນີນການຕາມການກ່າວຫາ ແລະ ການຟ້ອງຮ້ອງຈາກປະຊາຊົນຈໍານວນຫລາຍ.

ພາຍໃຕ້ລັດຖະທໍາມະນູນຂອງ ສ.ເກົາຫລີ ຖ້າຜູ້ດໍາລົງຕໍາແໜ່ງປະທານາທິບໍດີຕົກເປັນຜູ້ຖືກສົງໄສ ຫລື ຖືກດໍາເນີນຄະດີໃນຂໍ້ຫາກະບົດ ຈະບໍ່ສາມາດອ້າງສິດຄຸ້ມຄອງໄດ້ ແລະ ເອກະສິດລັກສະນະດຽວກັນນີ້ມີຂໍ້ຈໍາກັດ, ຖ້າຜູ້ດໍາລົງຕໍາແໜ່ງປະທານາທິບໍດີຜະເຊີນຂໍ້ກ່າວຫາ ແລະ ຖືກດໍາເນີນຄະດີອາຍາຮ້າແຮງ.ຂະນະດຽວກັນ, ການສືບສວນ-ສອບສວນຂອງໄອຍະການໃນເລື່ອງນີ້ ສາມາດດໍາເນີນຕໍ່ໄປໄດ້ ບໍ່ວ່າສະພານິຕິບັນຍັດແຫ່ງຊາດຈະຖອດຖອນທ່ານ ຢຸນຊອກຢອນ ອອກຈາກຕໍາແໜ່ງປະທານາທິບໍດີ ຫລື ບໍ່ກໍຕາມ.