ປີທ່ອງທ່ຽວລາວຈະນໍາກະສິກໍາສະອາດເຂົ້າສູ່ໂຮງແຮມ ແລະ ຮ້ານອາຫານຕ່າງໆ

ເພື່ອຄໍ້າປະກັນຄວາມໝັ້ນຄົງດ້ານສະບຽງອາຫານ ແລະ ຜະລິດເປັນສິນຄ້າ ຕາມທິດທາງການພັດທະນາສີຂຽວ ແລະ ຍືນຍົງ, ໃນປີທ່ອງທ່ຽວລາວນີ້, ຂະແໜງການດັ່ງກ່າວ ໄດ້ມີແຜນການສົ່ງເສີມການຜະລິດພືດຜັກອິນຊີ ໃຫ້ສາມາດຕອບສະໜອງໄດ້ຕາມຄວາມຕ້ອງການຂອງຜູ້ບໍລິໂພກຄື: ຮ້ານອາຫານ ແລະ ໂຮງແຮມຢ່າງພຽງພໍ, ພ້ອມທັງຈະເລັ່ງກວດກາຄຸນນະພາບ ແລະ ມາດຕະຖານຂອງພືດຜັກ ແລະ ໝາກໄມ້ ທີ່ວາງຈໍາໜ່າຍ ຢູ່ໃນຕະຫຼາດປອດສານພິດຢ່າງເປັນປົກກະຕິ ແນໃສ່ເພື່ອສ້າງຄວາມເຊື້ອໝັ້ນໃຫ້ຜູ້ບໍລິໂພກ, ກ່ຽວກັບຄວາມປອດໄພ ແລະ ມາດຕະຖານຂອງຜົນຜະລິດ.

ພືດຜັກ ແລະ ໝາກໄມ້ ທີ່ວາງຈໍາໜ່າຍຢູ່ໃນຕະຫຼາດປອດສານພິດແຕ່ລະແຫ່ງ ແມ່ນຜົນຜະລິດຂອງກຸ່ມປູກຜັກອິນຊີ, ຜົນຜະລິດດັ່ງກ່າວ ມີຄຸນນະພາບດີ, ເກັບຮັກສາໄວ້ໄດ້ດົນ ເມື່ອນໍາປຸງແຕ່ງອາຫານຈະເຮັດໃຫ້ອາຫານມີລົດຊາດແຊບ, ມີຄວາມປອດໄພ ແລະ ເປັນທີ່ພໍໃຈຂອງຜູ້ບໍລິໂພກ, ສະນັ້ນ, ຈຶ່ງຂໍເຊີນຊວນບັນດາທ່ານ ມາເລືອກຊື້ພືດຜັກອິນຊີ ທີ່ມີຈໍາໜ່າຍຢູ່ຕະຫຼາດປອດສານພິດເຊັ່ນ: ວັນຈັນ ແລະ ວັນພະຫັດ ຂາຍຢູ່ທີ່ສ່ວນເຈົ້າຟ້າງຸ່ມ, ວັນພຸດ ແລະ ວັນອາທິດ ຢູ່ສູນການຄ້າວຽງຈັນເຊັນເຕີ, ວັນພຸດ ແລະ ວັນເສົາ ຢູ່ເດີ່ມພະທາດຫຼວງ ແລະ ຕະຫຼາດຫ້ວຍຫົງ ແມ່ນວັນເສົາ.

ສໍາລັບຮ້ານອາຫານ ແລະ ໂຮງແຮມ ທີ່ເຂົ້າມາຊື້ຜັກອິນຊີ ໄປປຸງແຕ່ງອາຫານ ທາງກຸ່ມບໍລິການຕະຫຼາດກະສິກໍາອິນຊີ ກໍໄດ້ແນະນໍາໃຫ້ສະມາຊິກກຸ່ມຫຼຸດລາຄາ ໃຫ້ເປັນພິເສດ, ພ້ອມນັ້ນ ກໍຈະໄດ້ເກັບກໍາລາຍຊື່ຮ້ານອາຫານ ແລະ ໂຮງແຮມ ທີ່ນໍາເອົາພືດຜັກອິນຊີ ໄປປຸງແຕ່ງອາຫານ ເພື່ອເປັນບ່ອນອີງໃຫ້ແກ່ ການສົ່ງເສີມການຜະລິດຕິດພັນກັບການທ່ອງທ່ຽວ ແລະ ກໍານົດໝາຍກະສິກໍາສະອາດ ຖືກຈັດຕັ້ງປະຕິບັດໃຫ້ເປັນຮູບປະທໍາຢ່າງແທ້ຈິງ ແລະ  ມີຄວາມຍືນຍົງ.

+ເມືອງຈັນທະບູລີກຽມພ້ອມຮັກສາຄວາມສະຫງົບຮອບດ້ານໃນປີທ່ອງທ່ຽວລາວ 2018