ບຸກຄະລາກອນຣັກບີ້ລາວ ໄດ້ຮັບການຍົກລະດັບ ຄູເຝິກຂັ້ນ 1 ແລະ 2 ຈາກຊ່ຽວຊານໂລກ
ບຸກຄະລາກອນກິລາຣັກບີ້ລາວ ຈາກ 4 ແຂວງ ປະກອບມີແຂວງສະຫວັນນະເຂດ, ຈຳປາສັກ, ຊຽງຂວາງ, ຫຼວງພະບາງ ແລະ 1 ນະຄອນຫຼວງວຽງຈັນ ໄດ້ຮັບການຍົກລະດັບຄວາມຮູ້ຄວາມສາມາດການເປັນຄູເຝິກລະດັບ 1 ແລະ ລະດັບ 2 ຈາກຜູ້ຊ່ຽວຊານຂອງສະຫະພັນຣັກບີ້ນາໆຊາດ ລະຫວ່າງວັນທີ 29 ພະຈິກ ຫາ 3 ທັນວາ 2017 ເພື່ອສົ່ງເສີມໃຫ້ຄູເຝິກແຕ່ລະພາກສ່ວນນຳເອົາຄວາມຮູ້ຄວາມສາມາດໄປຜັນຂະຫຍາຍລົງສູ່ທ້ອງຖິ່ນສ້າງນັກກິລາຮຸ້ນສືບທອດກ້າວຂຶ້ນສູ່ລະດັບຊາດ.
ກອງປະຊຸມເຝິກອົບຮົມຍົກລະດັບຄວາມຮູ້ຄວາມສາມາດຄູເຝິກລະດັບ 1 ແລະ ລະດັບ 2 ໃຫ້ບຸກຄະລາກອນກິລາຣັກບີ້ຈາກ 4 ແຂວງ ແລະ 1 ນະຄອນຫຼວງວຽງຈັນ ໃນຄັ້ງນີ້ຈັດຂຶ້ນໃນຕອນເຊົ້າວັນທີ 29 ພະຈິກ ທີ່ຫ້ອງການຄະນະກໍາມະການໂອລິມປິກແຫ່ງຊາດລາວ (ຄອລ) ເມືອງຈັນທະບູລີ ນະຄອນຫຼວງວຽງຈັນ ໂດຍໃຫ້ກຽດເຂົ້າຮ່ວມຂອງທ່ານ ວິຣະຢຸດ ລາຕິກຸນ ປະທານສະຫະພັນຣັກບີ້ແຫ່ງຊາດລາວ ແລະ ທ່ານ ໄພບູນ ຈັນທະມາລີ ນາຄັງ ຄອລ, ມີທ່ານ ຄຣິສ ກາວີ ຜູ້ຊ່ຽວຊານຄູເຝິກຊາວອັງກິດຂອງສະຫະພັນຣັກບີ້ນາໆຊາດ ແລະ ທ່ານ ປີຊາ ວົງເດືອນເພັງ ຜູ້ຊ່ຽວຊານຄູເຝິກສະຫະພັນຣັກບີ້ແຫ່ງຊາດລາວ ຕະຫຼອດຮອດບຸກຄະລາກອນ ແລະ ວິຊາການທີ່ກ່ຽວຂ້ອງເຂົ້າຮ່ວມ.
ໂອກາດນີ້, ທ່ານ ຄຣິສ ກາວີ ກໍໄດ້ກ່າວສະແດງຄວາມຂອບໃຈຕໍ່ຄະນະກໍາມະການໂອລິມປິກແຫ່ງຊາດລາວ ແລະ ສະຫະພັນຣັກບີ້ແຫ່ງຊາດ ທີ່ໄດ້ອຳນວຍຄວາມສະດວກມາຖ່າຍທອດຄວາມຮູ້ຄວາມສາມາດໃຫ້ບຸກຄະລາກອນກິລາຣັກບີ້ລາວ ໃນຄວາມຮູ້ສຶກສ່ວນຕົວແມ່ນມີຄວາມພາກພູມໃຈ ແລະ ດີໃຈຫຼາຍທີ່ໄດ້ມາຢ້ຽມຢາມ ສປປ ລາວ ເຊິ່ງເປັນປະເທດທີ່ໜ້າທ່ອງທ່ຽວທີ່ສຸດໃນໂລກ ແລະ ຫວັງວ່າການເຝິກອົບຮົມໃນຄັ້ງນີ້ ຈະສ້າງຄວາມຮູ້ຄວາມສາມາດໃຫ້ບຸກຄະລາກອນກິລາຣັກບີ້ໄດ້ເຕີບໃຫຍ່ຂະຫຍາຍຕົວຢ່າງກວ້າງຂວາງ.
ທ່ານ ວິຣະຢຸດ ລາຕິກຸນ ກ່າວວ່າ: ຕະຫຼອດໄລຍະການສ້າງຕັ້ງກິລາຣັກບີ້ລາວຫຼາຍປີຜ່ານມາ ໃນການເຄື່ອນໄຫວທັງພາຍໃນ ແລະ ພາຍນອກ ເຫັນວ່າມີຄວາມເຕີບໃຫຍ່ຂະຫຍາຍຕົວຢ່າງກວ້າງຂວາງ ໂດຍສະເພາະໃນປີນີ້ ໄດ້ມີການເຄື່ອນໄຫວຈັດກິດຈະກຳຫຼາຍລາຍການ ພ້ອມທັງສົ່ງນັກກິລາຣັກບີ້ສາວລາວ 15 ຄົນ ໃນນັ້ນມີນັກກິລາ 12 ຄົນ ຄະນະນຳ 3 ຄົນ ເຂົ້າຮ່ວມແຂ່ງຂັນຣັກບີ້ຊີງແຊ້ມອາຊີ ຮຸ້ນອາຍຸບໍ່ເກີນ 17 ປີ ປະຈຳປີ 2017 ທີ່ນະຄອນດູໄບ ປະເທດສະຫະລັດ ອາຣັບ ເອມິເຣດ ລະຫວ່າງວັນທີ 29-30 ພະຈິກນີ້. ແນວໃດກໍດີ, ສຳລັບແຜນທິດທາງປີ 2018 ຈະສືບຕໍ່ສົ່ງເສີມພັດທະນານັກກິລາຣັກບີ້ໃຫ້ກວ້າງຂວາງກວ່າເກົ່າ ເຊິ່ງແຜນຈັດກອງປະຊຸມເຝິກອົບຮົມໃນເທື່ອນີ້ ກໍເປັນບັ້ນສຳຄັນໃນການສ້າງບຸກຄະລາກອນເພື່ອນຳເອົາຄວາມຮູ້ຄວາມສາມາດດັ່ງກ່າວໄປເສີມຂະຫຍາຍສ້າງນັກກິລາຮຸ້ນສືບທອດເພື່ອກ້າວສູ່ລະດັບຊາດຕາມຈຸດປະສົງ ແລະ ເປົ້າໝາຍຂອງສະຫະພັນຣັກບີ້ແຫ່ງຊາດວາງໄວ້. ພິເສດໃນເດືອນກຸມພາ 2018 ສປປ ລາວ ອາດຈະໄດ້ເປັນເຈົ້າພາບຈັດການແຂ່ງຂັນຣັກບີ້ນາໆຊາດ ປັດຈຸບັນກໍໄດ້ມີການປະສານພົວພັນກັບສະຫະພັນຣັກບີ້ອາຊີ ແລະ ສະຫະພັນຣັກບີ້ໂລກແລ້ວ ຍັງລໍຖ້າແຕ່ການອະນຸມັດ. ນອກຈາກນັ້ນ, ໃນທ້າຍປີ 2018 ກໍຈະນຳເອົານັກກິລາຣັກບີ້ 7 ຄົນ ແລະ 15 ຄົນ ໄປສາທິດກ່ອນງານເປີດງານມະຫະກໍາກິລາແຫ່ງຊາດ ຄັ້ງທີ 11 ທີ່ແຂວງຊຽງຂວາງ ຮັບກຽດເປັນເຈົ້າພາບອີກດ້ວຍ.
