ທະນາຄານແຫ່ງ ສປປ ລາວ ແລະ ທະນາຄານກາງ ສ. ເກົາຫຼີ ຕົກລົງຮ່ວມມືສອງຝ່າຍ
ພິທີເຊັນບົດບັນທຶກຄວາມເຂົ້າໃຈ ວ່າດ້ວຍການຮ່ວມມື ລະຫວ່າງ ທະນາຄານ ແຫ່ງ ສປປ ລາວ ແລະ ທະນາຄານກາງ ສ. ເກົາຫຼີ ໄດ້ຈັດຂຶ້ນໃນວັນທີ 4 ທັນວານີ້ທີ່ເມືອງມໍລະດົກໂລກຫລວງພະບາງ, ຊຶ່ງແມ່ນທ່ານ ສົມພາວ ໄຟສິດ ຜູ້ວ່າການທະນາຄານແຫ່ງ ສປປ ລາວ ແລະ ທ່ານ ຈູໂຢ ລີ (Juyeol LEE) ຜູ້ວ່າການທະນາຄານກາງ ສ.ເກົາຫຼີ ເປັນຜູ້ລົງນາມໃນບົດບັນທຶກຄວາມເຂົ້າໃຈດັ່ງກ່າວເພື່ອແນໃສ່ເສີມຂະຫຍາຍການພົວພັນຮ່ວມມືໃນຂະແໜງການທະນາຄານໃຫ້ກວ້າງຂວາງກວ່າເກົ່າ, ນອກນັ້ນ, ກໍເປັນການສ້າງໂອກາດໃຫ້ພະນັກງານຂອງທັງສອງທະນາຄານໄດ້ມີການແລກປ່ຽນຢ້ຽມຢາມ
ຖອດຖອນບົດຮຽນເຊິ່ງກັນ ແລະ ກັນ, ການແລກປ່ຽນຂໍ້ມູນຂ່າວສານ ແລະ ການສຶກສາຄົ້ນຄວ້າມີຄວາມສະໜິດສະໜົມກັນຫລາຍຂື້ນ.
ນອກຈາກພິທີເຊັນບົດບັນທຶກຄວາມເຂົ້າໃຈວ່າດ້ວຍການຮ່ວມກັນແລ້ວ ໃນວັນທີ 5 ທັນວາ ທະນາຄານກາງຂອງທັງສອງປະເທດ ຍັງໄດ້ຮ່ວມກັນຈັດສຳມະນາພາຍໃຕ້ໂຄງການແລກປ່ຽນດ້ານວິຊາການລະຫວ່າງສອງຝ່າຍ (BOK-KPP 2017) ໃນຫົວຂໍ້: “ການສ້າງແຜນຫັນເປັນທັນສະໄໝຂອງລະບົບຊໍາລະສະສາງ ສປປ ລາວ ເພື່ອສົ່ງເສີມຫຼຸດຜ່ອນການນໍາໃຊ້ເງິນສົດ” ເພື່ອແລກປ່ຽນບົດຮຽນ ແລະ ປະສົບການທາງດ້ານວິຊາການໃນຂະແໜງການທະນາຄານຮ່ວມກັນລະຫວ່າງສອງຝ່າຍ.
ໃນໂອກາດນີ້, ທ່ານ ຈູໂຢ ລີ ຜູ້ວ່າການທະນາຄານກາງ ສ.ເກົາຫລີ ກໍໄດ້ໃຫ້ກຽດໄປບັນຍາຍການພັດທະນາເສດຖະກິດຂອງປະເທດເກົາຫລີໃຫ້ນັກສຶກສາຢູ່ທີ່ມະຫາວິທະຍາໄລສຸພານຸວົງ, ໂດຍການຕ້ອນຮັບຂອງທ່ານ ວິລະ ອາໂນລັກ ຮອງອາທິການບໍດີມະຫາວິທະຍາໄລດັ່ງກ່າວດ້ວຍຄວາມສະໜິດສະໜົມ.
