ທະນາຄານກາງອາເມລິກາປັບຂຶ້ນອັດຕາ ດອກເບ້ຍສູງທີ່ສຸດໃນຮອບ 10 ປີ

- advert banner 728 90 728x90 - ທະນາຄານກາງອາເມລິກາປັບຂຶ້ນອັດຕາ ດອກເບ້ຍສູງທີ່ສຸດໃນຮອບ 10 ປີ

ທະນາຄານ​ກາງ​ອາ​ເມ​ລິ​ກາ​ປັບ​ເພີ່ມ​ອັດຕາ​ດອກ​ເບ້ຍ​ສູ່​ລະດັບ 1,75% ຖື​ເປັນ​ເທື່ອ​ທຳ​ອິດ​ຂອງ​ປີ​ນີ້​ພາຍ​ໃຕ້​ການ​ບໍລິຫານ​ຂອງ​ປະທານ​ຄົນ​ໃໝ່ ​ແລະ ສູງ​ທີ່​ສຸດ​ນັບ​ແຕ່​ວິ​ກິດ​ການ​ເງິນ​ໃນ​ປີ 2008.

- lattana 1 - ທະນາຄານກາງອາເມລິກາປັບຂຶ້ນອັດຕາ ດອກເບ້ຍສູງທີ່ສຸດໃນຮອບ 10 ປີ

 

ສຳນັກ​ຂ່າວ​ຕ່າງປະ​ເທດ​ລາຍ​ງານ​ຈາກ​ນະຄອນຫລວງ​ວໍ​ຊິງ​ຕັນ ປະ​ເທດ​ສະຫະລັດ​ອາ​ເມ​ລິ​ກາ ​ໃນ​ວັນ​ທີ 21 ມີນາ​ວ່າ: ທ່ານ ​ເຈີ​ໂຣມ ພາວ​ເວລ ປະທານ​ທະນາຄານ​ກາງ​ອາ​ເມ​ລິ​ກາ (​ເຟດ) ຖະ​ແຫລ​ງ​ໃນ​ວັນ​ທີ 21 ມີນາ​ວ່າ: ກອງ​ປະຊຸມ​ຄະນະ​ກຳມະການ​ກຳນົດ​ນະ​ໂຍບາຍ​ການ​ເງິນ (FOMC) ທັງ 8 ຄົນ​ມີ​ມະຕິ​ເປັນ​ເອກະ​ພາບ ປັບ​ເພີ່ມ​ອັດຕາ​ດອກ​ເບ້ຍ​ນະ​ໂຍບາຍ​ໄລຍະ​ສັ້ນອີກ 0,25% ​ເປັນ 1,50% ​ເຖິງ 1,75% ຄວບ​ຄຸມ​ສິນ​ເຊື່ອ​ທຸກ​ຮູບ​ແບບ ນັບ​ແຕ່​ອະສັງຫາລິມະ​ຊັບ​ໄປ​ຈົນ​ເຖິງ​ກອງ​ທຶນ​ກູ້​ຢືມ​ເພື່ອ​ການ​ສຶກສາ.

ທັງ​ນີ້, ການ​ປັບ​ຂຶ້ນອັດຕາ​ດອກ​ເບ້ຍ​ດັ່ງກ່າ​ວຖື​ເປັນ​ເທື່ອ​ທຳ​ອິດ​ໃນ​ປີ​ນີ້ ​ແລະ ​ເທື່ອ​ທຳ​ອິດ​ພາຍ​ໃຕ້​ການ​ບໍລິຫານ​ຂອງ​ທ່ານ ພາວ​ເວລ ​ເຊິ່ງຮັບ​ຕຳ​ແໜ່​ງປະທານ​ເຟດ​ໃນ​ເດືອນ​ກຸມພາ​ຜ່ານ​ມາ ​ແລະ ອັດຕາ​ດອກ​ເບ້ຍ​ທີ່​ມີ​ການ​ປັບ​ເພີ່ມ​ໃນ​ຄັ້ງນີ້​ຖື​ວ່າ​ສູງ​ທີ່​ສຸດ​ນັບ​ແຕ່​ວິ​ກິດ​ການ​ເງິນ​ໃນ​ປີ 2008. ອີກ​ທັງ​ຖື​ເປັນຄັ້ງທີ 6 ນັບ​ແຕ່​ເຟດປັບ​ເພີ່ມ​ອັດຕາ​ດອກ​ເບ້ຍ​ເທື່ອ​ທຳ​ອິດ​ໃນ​ຮອບ​ເກືອບ 1 ທົດ​ສະ​ວັດ.

ຂະນະ​ດຽວ​ກັນ, ທ່ານ ພາວ​ເວລ ຍັງ​ປັບ​ເພີ່ມ​ຄາດ​ຄະ​ເນ​ການ​ຂະຫຍາຍຕົວ​ທາງ​ເສດຖະກິດ​ຂອງ​ອາ​ເມ​ລິ​ກາ​ໃນ​ປີ​ນີ້​ເປັນ 2,7% ຈາກ​ຄາດ​ຄະ​ເນ​ເກົ່າ 2,5% ​ໃນ​ເດືອນ​ທັນວາ​ຜ່ານ​ມາ ​ແລະ ອັດຕາ​ຫວ່າງ​ວຽກ​ໃນ​ປີ​ນີ້​ຄາດ​ວ່າ​ຈະ​ຫລຸດ​ລົງ​ເຫລືອ 3,8% ​ແລະ ຫລຸດ​ລົງ​ອີກ​ເຫລືອ 3,6% ​ໃນ​ປີ 2019, ສ່ວນ​ຄາດ​ຄະ​ເນ​ອັດຕາ​ເງິນ​ເຟີ້​ພື້ນຖານ​ຂອງ​ອາ​ເມ​ລິ​ກາ​ໃນ​ປີ​ນີ້​ຢູ່​ປະມານ 1,9% ກ່ອນ​ປັບ​ຕົວ​ຂຶ້ນ​ເປັນ 2,1% ​ໃນ​ປີ​ຕໍ່​ໄປ ​ເຊິ່ງສູງ​ກວ່າ​ເປົ້າໝາຍ 2,0% ​ເລັກ​ໜ້ອຍ.