ຮ້ານອາຫານອິດຕາລີ “Villa Opera” ເປີດໃຫ້ບໍລິການແລ້ວ
ໃນວັນທີ 27 ມີນານີ້, ໄດ້ມີພິທີເປີດຮ້ານອາຫານອິດຕາລີ “Villa Opera” ໂດຍການເຂົ້າຮ່ວມຂອງທ່ານ ນາງ ເຂັມມະນີ ພົນເສນາ ລັດຖະມົນຕີ ກະຊວງການຄ້າ ແລະ ອຸດສາຫະກໍາ, ມີຮອງລັດຖະມົນຕີກະຊວງແຜນການ ແລະ ການລົງທຶນ, ມີສິງກະໂປປະຈໍາລາວ, ທູດ ສ ເກົາຫຼີ ແລະ ອຸປະທູດການາດາ ເຂົ້າຮ່ວມນໍາດ້ວຍ. ຮ້ານດັ່ງກ່າວຕັ້ງຢູ່ບ້ານ ສີຖານເໜືອ ເມືອງສີໂຄດ ນະຄອນຫຼວງວຽງຈັນ (ໜ້າວັດຊຽງແວ), ເປີດໃຫ້ບໍລິການວັນຈັນ-ອາທິດ ເລີ່ມແຕ່ເວລາ 11:00-14:00 ໂມງ ແລະ ເວລາ 18:00-22:00 ໂມງ.
ທ່ານ ປີໂນ້ ຜູ້ບໍລິຫານ ແລະ ເຈົ້າຂອງຮ້ານ ແລະ ທ່ານ ອຸເດດ ສຸວັນນະວົງ ຜູ້ຮ່ວມທຶນ ໄດ້ກ່າວວ່າ: ອາຫານໃນຮ້ານເປັນອາຫານອີຕາລຽນແທ້ໆ, ອາຫານທຸກຢ່າງ ແລະ ສ່ວນປະສົມຕ່າງໆ ແມ່ນໄດ້ນໍາເຂົ້າຈາກຕ່າງປະເທດເຊັ່ນ: ປະເພດຊີ້ນ, ປາ, ພິດຊ້າ, ໄຂປາຄາເວຍ, ຫອຍ ແລະ ອື່ນໆ. ຊຶ່ງຮ້ານອາຫານດັ່ງກ່າວ ຖືວ່າເປັນອີກຮ້ານອາຫານທີ່ເປັນເອກະລັກຂອງຊາວອິດຕະລີ ແລະ ກຳລັງໄດ້ຮັບຄວາມສົນໃຈບັນດາລູກຄ້າ, ເປັນຮ້ານອາຫານທີ່ສ້າງຂຶ້ນມາເພື່ອເອົາໃຈຜູ້ທີ່ມັກຊີມ ແລະ ມັກສ້າງສັນຊຸມແຊວ ເພາະໃນຮ້ານຕົບແຕ່ງສວຍງາມ, ມີໂຊນຫ້ອງອາຫານໃຫຍ່, ຫ້ອງວີໄອພີ, ໂຊນທາງນອກ, ໂຊນພິດຊ້າ, ທາປາດ ແລະ ໂຊນບາ ແລະ ມີອາຫານຫຼາຍເມນູໃຫ້ເລືອກ ແລະ ເຄື່ອງດື່ມຫຼາກຫຼາຍຊະນິດ.
ຮ້ານອາຫານອິດຕາລີ “Villa Opera” ແຕ່ກ່ອນຕັ້ງຢູ່ເຂດນໍ້າພຸ ແລະ ເປີດໃຫ້ບໍລິການມາເປັນເວລາ 25 ປີແລ້ວ. ແຕ່ປັດຈຸບັນໄດ້ຍ້າຍສະຖານທີ່ມາບ່ອນໃໝ່ ຢູ່ບ້ານ ສີຖານເໜືອ ເມືອງ ສີໂຄດ ນະຄອນຫຼວງວຽງຈັນ (ໜ້າວັດຊຽງແວ) ແລະ ໄດ້ປັບປຸງປະຍຸກໃຫ້ມີຄວາມທັນສະໄໝຂຶ້ນກວ່າເກົ່າ.
