ຖ້ຳພະ-ໜອງປາຝາ ແຫລ່ງທ່ອງທ່ຽວເມືອງທ່າແຂກ

ໂດຍ: ຄຳພຸດ ເທບພະນົມ

ຖ້າທ່ານໃດໄດ້ເດີນທາງລົງໄປແຂວງຄຳມ່ວນໄຫວ້ພະທາດສີໂຄດຕະບອງແລ້ວຢ່າລືມແວ່ຖໍ້າພະ-ໜອງປາຝາ ແຫຼ່ງທ່ອງທ່ຽວທາງວັດທະ ນະທຳຂອງແຂວງຄຳມ່ວນຕື່ມອີກ, ເພື່ອໄປຂາບໄຫວ້ພະພຸດທະຮູບສັກສິດອັນເປັນມູນມັງມໍລະດົກທີ່ລໍ້າຄ່າ ແລະ ຢ້ຽມຊົມຄວາມງົດງາມຂອງຖໍ້າໃຫ້ຊື່ນໃຈ. 

ຖໍ້າພະ-ໜອງປາຝາຕັ້ງຢູ່ໃກ້ກັບບ້ານນາຂ້າງຊ້າງ,  ຕາມທາງເລກທີ 12  ຫ່າງ ຈາກຕົວເມືອງທ່າແຂກໄປ ທາງທິດຕາເວັນອອກສຽງ ເໜືອປະມານ 14 ກິໂລ ແມັດ. ບໍລິເວນຖ້ຳພະ-ໜອງປາຝາ ແມ່ນຖ້ຳສອງຊັ້ນ ຢອງກັນ, ຢູ່ຂ້າງເທິງແມ່ນຖ້ຳມີລັກສະນະແຫ້ງ, ສ່ວນຖໍ້າທີ່ຢູ່ດ້ານ  ລຸ່ມແມ່ນມີສາຍນ້ຳຈາກໜອງປາຝາໄຫຼຜ່ານທະລຸເຂົ້າ ໄປໃນຖ້ຳ. ຖ້ຳທັງສອງນີ້ມີຄວາມຍາວປະມານ 200 ແມັດ ເຕັມໄປດ້ວຍຫີນຍ້ອຍຫຼາຍຂະໜາດ ແລະ ຮູບຮ່າງແຕກຕ່າງຢັ່ງຢາຍກັນຢູ່ເປັນຍ່ານໆ.

ຖໍ້າແຫ່ງນີ້ຖືກຄົ້ນພົບໃນ  ປີ 2004, ໂດຍຊາວບ້ານນາ ຂ້າງຊ້າງທີ່ໄດ້ສັງເກດເຫັນ ຝູງເຈຍບິນເຂົ້າ-ບິນອອກຮູຕາມໜ້າຜາສູງ 28 ແມັດ, ຈຶ່ງໄດ້ປີນໜ້າຝາຂຶ້ນໄປເພື່ອຈັບເອົາເຈຍ ແຕ່ເມື່ອຂຶ້ນໄປ ແລ້ວຈຶ່ງໄດ້ພົບປາກຖ້ຳທີ່ມີ ຄວາມກວ້າງ 15 ແມັດ ແລະ ມີພະພຸດທະຮູບຈຳນວນຫຼວງຫຼາຍ, ຕໍ່ມາອຳນາດການປົກຄອງ ແລະ ຊາວບ້ານ ຈຶ່ງໄດ້ທຳພິທີຄາລະວະ ແລະ ປົກປັກ ຮັກສາພະພຸດທະຮູບອັນລ້ຳຄ່າເຫຼົ່ານີ້ໄວ້ໃນສະຖານທີ່ດັ້ງເດີມ.  ພະພຸດທະຮູບທີ່ປະດິດສະຖານຢູ່ໃນຖໍ້າແຫ່ງນີ້ ມີຂະໜາດໃຫຍ່ ແລະ ນ້ອຍແຕກຕ່າງກັນທັງໝົດ 229 ອົງ, ເຊິ່ງສັນນິຖານວ່າ ເປັນມູນມໍລະດົກຕົກທອດມາແຕ່ຍຸກສະໄໝ ຂອງອານາຈັກສີ ໂຄດຕະບອງ ແລະ ລ້ານຊ້າງມີອາຍຸເກົ່າແກ່ກວ່າ 600 ປີແລ້ວ. ດ້ານໜ້າຂອງຖໍ້າຍັງມີໜອງປາຝາສີເຫລືອງເອີ້ນວ່າປາຝາຄໍາໃຫ້ໄດ້ຊື່ນຊົມ ແລະ ສາມາດສຳຜັດກັບໂຕຂອງມັນໄດ້ອີກດ້ວຍ. ໂດຍມີເລື່ອງເລົ່າຕ່າງໆນານາສຳລັບປາຝາແຫ່ງນີ້ ຈົນກາຍເປັນສິ່ງສັກສິດ ແລະ ສັກກາລະບູຊາຂອງຊາວບ້ານຕະຫລອດມາ.