ອາເມລິກາຂໍອິນເດຍ-ປາກິດສະຖານ ໃຫ້ອົດກັ້ນຈາກຄວາມເຄັ່ງຕຶງຕໍ່ກັນ
ທ່ານ ໄມ ປອມເປໂອ ລັດຖະມົນຕີຕ່າງປະເທດອາເມລິກາ ຮຽກຮ້ອງໃຫ້ ອິນເດຍ ແລະ ປາກິດສະຖານ ອົດກັ້ນຕໍ່ກັນໄວ້ກ່ອນ ທ່າມກາງຄວາມເຄັ່ງຕຶງເພີ່ມຂຶ້ນລະຫວ່າງສອງປະເທດ ແລະ ອາເມລິກາຍັງຂໍໃຫ້ປາກິດສະຖານກຳຈັດກຸ່ມຕິດອາວຸດທີ່ລີ້ຊ້ອນຢູ່ພາຍໃນປະເທດ.
ທ່ານ ປອມເປໂອ ອອກຖະແຫລງການພາຍຫລັງຫາລືກັບລັດຖະມົນຕີຕ່າງປະເທດອິນເດຍ ແລະ ປາກິດສະຖານວ່າ: ອາເມລິກາຂໍໃຫ້ອິນເດຍ ແລະ ປາກິດສະຖານອົດກັ້ນໄວ້ ແລະ ຫລີກເວັ້ນບໍ່ໃຫ້ຄວາມເຄັ່ງຕຶງຮຸນແຮງຂຶ້ນ. ທ່ານ ປອມເປໂອ ກ່າວວ່າ: ໃນການຫາລືກັບທ່ານ ຊາເມມູດ ຄູເຣຊີ ລັດຖະມົນຕີຕ່າງປະເທດປາກິດສະຖານ, ທ່ານໄດ້ເນັ້ນເຖິງຄວາມຈຳເປັນໃນການບັນເທົາສະຖານະການເຄັ່ງຕຶງທີ່ມີຢູ່ໃນປັດຈຸບັນ ໂດຍການຫລີກເວັ້ນການໃຊ້ກຳລັງທະຫານຕໍ່ກັນ ໂດຍຂໍໃຫ້ປາກິດສະຖານດຳເນີນການຢ່າງຮີບດ່ວນໃນການປາບປາມກຸ່ມກໍ່ການຮ້າຍທີ່ເຂົ້າລີ້ຊ້ອນຢູ່ພາຍໃນປະເທດ. ອິນເດຍຖະແຫລງວ່າ: ໄດ້ໃຊ້ປະຕິບັດການທະຫານໂຈມຕີທາງອາກາດຢູ່ທີ່ໝັ້ນກຸ່ມຕິດອາວຸດໃນປາກິດສະຖານ ຫລັງກຸ່ມຕິດອາວຸດກໍ່ເຫດລະເບີດໃນແຄວ້ນກາສເມຍສ່ວນທີ່ຢູ່ໃນການປົກຄອງຂອງອິນເດຍ ເຮັດໃຫ້ທະຫານເສຍຊີວິດ 40 ຄົນ. ຄັ້ງນີ້ຖືເປັນຄັ້ງທຳອິດທີ່ອິນເດຍໃຊ້ປະຕິບັດການໂຈມຕີທາງອາກາດໃນດິນແດນຂອງປາກິດສະຖານປະເທດເພື່ອນບ້ານ ນັບແຕ່ອິນເດຍ ແລະ ປາກິດສະຖານເຮັດສົງຄາມກັນໃນປີ 1971.
