ສະຫະພັນແມ່ຍິງລາວຈະຈັດ 7 ກິດຈະກໍາຫຼັກສະຫຼອງວັນແມ່ຍິງສາກົນ
ໃນວັນທີ 28 ກຸມພານີ້, ທ່ານນາງ ບົວຈັນ ສີຫານາດ ຮອງປະທານສະຫະພັນແມ່ຍິງລາວ ໃຫ້ຮູ້ວ່າ: ໃນໂອກາດວັນແມ່ຍິງສາກົນທີ 8 ມີນານີ້, ສູນກາງສະຫະພັນແມ່ຍິງລາວ ຈະຮ່ວມກັບກະຊວງແຜນການ ແລະ ການລົງທຶນ ຈັດ 7 ກິດຈະກໍາຫຼັກ, ເພື່ອສ້າງຂະບວນການສະເຫຼີມສະຫລອງວັນປະຫວັດສາດສໍາຄັນດັ່ງກ່າວ ໃຫ້ເປັນຂະບວນຟົດຟື້ນ ພາຍໃຕ້ຄໍາຂວັນ “ຄິດຢ່າງສະເໜີພາບ, ສ້າງຄວາມສະຫຼາດ ແລະ ປະດິດສ້າງເພື່ອການປ່ຽນແປງ”. ຄື: ໃນວັນທີ 10 ມີນາ, ຈະມີຂະບວນຂີ່ລົດຖີບເພື່ອການກຸສົນ, ຊຶ່ງຈະເລີ່ມແຕ່ ສາມແຍກ ວິທະຍາໄລເຕັກນິກປາກປາສັກ ເຖິງ ສາມແຍກປາກຕອນ ເມືອງສັງທອງ ນະຄອນຫຼວງວຽງຈັນ, ໃນວັນທີ 6 ຈະມີການແຂ່ງຂັນກິລາຊີງຂັນປະທານສູນກາງສະຫະພັນແມ່ຍິງລາວ, ວັນທີ 7 ຈະມີກິດຈະກໍາສົ່ງເສີມຄວາມຮູ້ ພາຍໃຕ້ຫົວຂໍ້ “ການສ້າງຄວາມເທົ່າທຽມໃຫ້ເພດຍິງ, ການມີສ່ວນຮ່ວມຂອງເພດຊາຍໃນການສົ່ງເສີມແມ່ຍິງ”, ໃນວັນທີ 4-7 ຈະມີກິດຈະກໍາກວດສຸຂະພາບໂດຍບໍ່ໄດ້ເສຍຄ່າໃຫ້ເອື້ອຍນ້ອງແມ່ຍິງຢູ່ສູນຝຶກອົບຮົມແມ່ຍິງລາວ, ຖາມ-ຕອບຄວາມຮູ້ແບບຄອບຄົວ, ງານວາງສະແດງສິນຄ້າຜະລິດຕະພັນສີໄມ້ລາຍມື ແລະ ຫົວຄິດປະດິດສ້າງຂອງແມ່ຍິງ, ສະແດງສິລະປະວັນນະຄະດີ ແລະ ງານໂຮມຊຸມນຸມໃຫຍ່ ເພື່ອຫວນຄືນປະຫວັດການຕໍ່ສູ້ຢ່າງພິລະອາດຫານຂອງແມ່ຍິງ ເພື່ອທວງເອົາສິດຂອງຕົນ ແລະ ກິດຈະກໍາອື່ນໆ ໃຫ້ມີບັນຍາກາດຟົດຟື້ນຍິ່ງຂຶ້ນ.
