ຈີນເນັ້ນເດີນໜ້າສ້າງຄວາມກ້າວໜ້າແກ່ໂລກ
ສຳນັກຂ່າວຊິນຮົວ ລາຍງານວ່າ: ທ່ານ ຫວັງ ອີ້ ລັດຖະມົນຕີກະຊວງການຕ່າງປະເທດຂອງຈີນ ໄດ້ພົບປະສື່ມວນຊົນຈີນ ແລະ ຕ່າງປະເທດ ນອກຮອບກອງປະຊຸມສະພາປະຊາຊົນແຫ່ງຊາດຈີນ (NPC) ຊຸດທີ 13 ເພື່ອຊີ້ແຈງນະໂຍບາຍຕ່າງປະເທດ ລວມທັງຕອບຂໍ້ສົງໄສບັນຫາຕ່າງໆ ໂດຍເນັ້ນວ່າ: ຈີນຍັງເດີນໜ້າດຳເນີນນະໂຍບາຍຢ່າງເປັນກາງ ແລະ ມຸ່ງສູ່ຄວາມກ້າວໜ້າ ເພື່ອໃຫ້ໂລກມີຄວາມປອດໄພ, ສະຫງົບສັນຕິ ແລະ ມີສະຖຽນລະພາບໝັ້ນຄົງຍິ່ງຂຶ້ນ.
ທ່ານ ຫວັງ ອີ້ ຍັງກ່າວອີກວ່າ: ທ່ານ ສີ ຈິ້ນຜິງ ປະທານປະເທດຈີນ ຈະຮ່ວມພິທີເປີດກອງປະຊຸມແຜນລິເລີ່ມໜຶ່ງແລວໜຶ່ງເສັ້ນທາງ ເພື່ອການຮ່ວມມືລະຫວ່າງປະເທດ ຄັ້ງທີ 2 ໃນທ້າຍເດືອນເມສານີ້ ແລະ ແນວຄິດຂອງທ່ານ ສີ ຈິ້ນຜິງ ວ່າດ້ວຍການທູດ ຈະເປັນແນວທາງພື້ນຖານຂອງການປະຕິບັດພາລະກິດການທູດຂອງຈີນ ເຊິ່ງຖືເປັນຈຸດໝາຍສຳຄັນຂອງການທູດຈີນຍຸກໃໝ່.
ທັງນີ້, ຈີນ ສະໜັບສະໜູນການເຈລະຈາຫາລືຢ່າງຕໍ່ເນື່ອງລະຫວ່າງ ສປປ ເກົາຫລີ ແລະ ອາເມລິກາ ໃນບັນຫາແຫລມເກົາຫລີ, ຈີນ ແລະ ອາເມລິກາ ໂດຍຈະຕັກຕວງຜົນປະໂຫຍດຈາກການຮ່ວມມື ເພາະການຜະເຊີນໜ້າກັນມີແຕ່ຄວາມສູນເສຍ. ນອກຈາກນີ້ ຈີນຍັງເຊື່ອໝັ້ນວ່າ: ເອີຣົບຈະຮັກສາຜົນປະໂຫຍດຂັ້ນພື້ນຖານໃນໄລຍະຍາວ ລວມທັງດຳເນີນນະໂຍບາຍກ່ຽວກັບຈີນຢ່າງເປັນກາງ.
ຂະນະດຽວກັນ, ລັດຖະມົນຕີຕ່າງປະເທດຂອງຈີນ ຊີ້ແຈງວ່າ: ແຜນລິເລີ່ມໜຶ່ງແລວໜຶ່ງເສັ້ນທາງຂອງຈີນບໍ່ແມ່ນກັບດັກໜີ້ສິນ, ແຕ່ເປັນສ່ວນແບ່ງທາງເສດຖະກິດ ທີ່ຈະສ້າງຜົນປະໂຫຍດແກ່ປະຊາຊົນທ້ອງຖິ່ນ, ການຫລີກໜີຈີນໝາຍເຖິງການຫລີກໜີໂອກາດ ແລະ ອະນາຄົດ.
