ເຊື່ອມສຳພັນທຳມະຍາດຕຣາ 5 ແຜ່ນດິນ
ປີ 2019 ເປັນປີໜຶ່ງທີ່ມີຄວາມໝາຍທາງພຸດທະສາດສະໜາສຳລັບປະເທດລາວເຮົາ ຍ້ອນວ່າໄດ້ມີການຈັດກິດຈະກຳເຊື່ອມສຳພັນທຳມະຍາດຕຣາ 5 ແຜ່ນດິນໃນບັນດາປະ ເທດລຸ່ມແມ່ນ້ຳຂອງອັນໄດ້ແກ່: ລາວ, ໄທ, ມຽນມາ, ຫວຽດນາມ ແລະ ກຳປູເຈຍ. ການຈັດໃຫ້ມີກິດຈະກຳດັ່ງກ່າວໃນຄັ້ງນີ້ຖືເປັນຄັ້ງທີ II ໂດຍຄັ້ງທີ I ໄດ້ຈັດຂຶ້ນໃນປີ 2015.
ໂຄງການດັ່ງກ່າວຖືເປັນໂຄງການໜຶ່ງທີ່ສຳຄັນຕໍ່ຊາວພຸດໃນຫ້າປະເທດທີ່ໄດ້ຮ່ວມກັນມີສັດທາປະຕິບັດການເຄື່ອນໄຫວຕາມຮູບແບບຄວາມເຊື່ອມສຳພັນທະໄມຕີ ໂດຍຜ່ານອົງການພຸດທະສາດສະໜາໃນຫ້າປະເທດເຂົ້າຮ່ວມເພື່ອ ເສີມສ້າງມິດຕະພາບ, ຄວາມຮັກໄຄ່, ຄວາມສຳພັນທະໄມຕີຂອງປະຊາຊົນບັນດາເຜົ່າຫ້າປະເທດໂດຍສະເພາະແມ່ນບັນດາຊາວພຸດທີ່ຍັງມີສັດທາຢືດໜ່ຽວອານຸລັກຮັກສາພຸດທະສາດສະໜາໃຫ້ຢືນຍົງຄົງຕົວຢູ່ໃນແຫລມສຸວັນນະພູມແຫ່ງນີ້ໃຫ້ມີຄວາມຈະເລີນງອກງາມ ແລະ ຮຸ່ງເຮືອງເຫລືອງເຫລື້ອມໄປດ້ວຍອາລິຍະທຳຕາມຮອຍພຸດທະບາດອົງສຳມາສຳພະພຸດທະເຈົ້າ.
ໃນສະໄໝພຸດທະການ, ອານາຈັກສີໂຄດຕະບອງ ແລະ ອານາຈັກສຸວັນນະພູມພະພຸດທະເຈົ້າເຄີຍສະເດັດມາເຜີຍແຜ່ພຸດທະສາດສະໜາເຂດລຸ່ມແມ່ນ້ຳຂອງທິດອາຊີຕາເວັນອອກສ່ຽງໃຕ້ກາຍເປັນປະຫວັດການແຫ່ງຍຸກສາດສະໜາພຸດມີຄວາມຈະເລີນຮຸງເຮືອງໄປຄຽງຄູ່ກັບການຂະຫຍາຍຕົວຂອງປະຫວັດສາດຄົນຫລາຍເຊື້ອຊາດ, ເປັນມູນເຊື້ອແຫ່ງ ອາລິຍະທຳຈົນມາຮອດຍຸກປັດຈຸບັນ.
ເພາະສະນັ້ນ, ການກຳເນີດຂອງກິດຈະກຳເຊື່ອມສຳພັນທຳມະຍາດຕຣາ 5 ແຜ່ນດິນ ຈຶ່ງມີຄວາມໝາຍທັງເປັນນິມິດໝາຍໃຫ້ແກ່ການເຊື່ອມສຳພັນ, ຄວາມຮັກ, ຄວາມສາມັກຄີ ຂອງປະຊາຊົນຫ້າປະເທດຕອນລຸ່ມແມ່ນ້ຳຂອງ, ຫລ້າສຸດໃນວັນທີ 26 ຕຸລາ ຜ່ານມາໄດ້ມີມວນຊົນຊາວນະຄອນຫລວງວຽງຈັນຫລາຍກ່າວສາມໝື່ນຄົນພ້ອມກັນນຳ ຝ່າຍສົງ, ພະສົງສຳມະເນນຂອງຫ້າປະເທດ ແລະ ການນຳຄະລືຫັດ, ຝ່າຍລາວໄດ້ແກ່ ການນຳພັກ-ລັດຖະບານ ແລະ ຊາວນະຄອນຫລວງວຽງຈັນ ໄດ້ຮ່ວມກັນປູກຕົ້ນມະຫາໂພທີ່ນຳມາຈາກປະເທດອິນເດຍ, ມີການໄຫວ້ພະຮັບສິນ, ຟັງທຳມະເທສະໜາ ແລະ ຮ່ວມກັນໃສ່ບາດດ້ວຍຄວາມສັດທາອັນຍິ່ງໃຫຍ່ພາຍຫລັງຂະບວນທຳມະຍາດຕຣາໄດ້ ໄປເຄື່ອນໄຫວທາງພາກເໜືອຂອງລາວ ແລະ ປະເທດເພື່ອນບ້ານຄືມຽນມາ, ຫວຽດ ນາມເຂົ້າມາທາງອຸດົມໄຊ, ຫລວງພະບາງ ແລະ ສູ່ນະຄອນຫລວງວຽງຈັນກ່ອນເຂົ້າໄທຕໍ່ໃສ່ແຂວງພາກເໜືອຂອງກຳປູເຈຍຄືແຂວງຊຽມຣຽບ.
ໂຄງການເຄື່ອນໄຫວທຳມະຍາດຕຣາ 5 ແຜ່ນດິນໄດ້ສຳເລັດລົງໃນວັນທີ 31 ຕຸລານີ້ເອງ.
ກ່າວເຖິງໂຄງການທີ່ກ່າວມານີ້ແມ່ນຫາກໍເລີ່ມປະຕິບັດມາໄດ້ 2 ຄັ້ງໂດຍຂໍ້ລິເລີ່ມໂຄງການຈາກອຸດົມການຂອງ ພະອາຈານໃຫຍ່ ມະຫາຜ່ອງ ສຳມະເລີກ ອະດີດປະທານອົງການພຸດທະສາດສະໜາສຳພັນແຫ່ງປະເທດລາວ ເຊິ່ງປັດຈຸບັນເພິ່ນໄດ້ລະສັງຂານໄປຫລາຍປີແລ້ວ.
ແນວໃດກໍຕາມ, ດ້ວຍພາລະກິດອັນຍິ່ງໃຫຍ່ເພື່ອເສີມສ້າງຄວາມຮັກ, ຄວາມສາມັກຄີ, ເສີມຂະຫຍາຍມູນເຊື້ອວັດທະນະທຳ, ອະລິຍະທຳໃນຂົງເຂດອາຊີຕາເວັນອອກສ່ຽງ ໃຕ້ກໍຄືການເຊື່ອມສຳພັນຂອງຄອບຄົວໃຫຍ່ອາຊຽນໃຫ້ເປັນປຶກແຜ່ນພາຍໃຕ້ຮູບການ ເຄື່ອນໄຫວທຳມະຍາດຕຣາ 5 ແຜ່ນດິນໃຫ້ກາຍເປັນພະລັງແຫ່ງຄວາມສັດທາ, ເມດຕາ, ກະລຸນາ ແລະ ຄວາມເຂົ້າອົກເຂົ້າໃຈຮັກຫໍ່ທາງດ້ານສິລະປະວັດທະນະທຳອັນມີສາສະໜາພຸດເປັນສິ່ງເບີກທາງດົນບັນດານ, ສັກກາລະບູຊາ, ເຄົາລົບນັບຖືດ້ວຍສັດທາອັນແຮງກ້າຂອງຊາວພຸດທັງຫ້າປະເທດ.
ຊາວນະຄອນຫລວງວຽງຈັນກໍຄືຊາວລາວທົ່ວປະເທດຂໍຍິນດີເຫລື້ອມໃສດ້ວຍຈິດໃຈຮັກຫໍ່ອັນບໍລິສຸດຂໍອະນຸໂມທະນາໃຫ້ພາລະກິດການເຊື່ອມສຳພັນທຳມະຍາດຕຣາ 5 ແຜ່ນດິນ ຈົ່ງຈະເລີນງອກງາມໝັ່ນຄົງໄປດ້ວຍພະໄຕຣຍະສາມປະການຄື: ພະພຸດ, ພະທຳ ແລະ ພະສົງ ຈົ່ງຍືນຍົງໄປຕະຫລອດການລະນານດ້ວຍເທີນ./.
