ໄຟໄໝ້ເຮືອນປະຊາຊົນ ຢູ່ແຂວງ ຫລວງພະບາງມີຜູ້ເສຍຊີວິດ 3 ຄົນ

    ເຈົ້າໜ້າທີ່ ປກສ ແຂວງ ຫລວງພະບາງ ໃຫ້ຮູ້ວ່າ: ໃນຕອນເຊົ້າຂອງວັນທີ 16 ທັນວາ ນີ້, ໄດ້ເກີດເຫດໄຟໄໝ້ເຮືອນສອງຊັ້ນ ຂອງປະຊາຊົນ ຢູ່ບ້ານ ເມືອງ ງາ ນະຄອນຫລວງພະບາງ, ສົ່ງຜົນເຮັດໃຫ້ມີຜູ້ເສຊີວິດຄາທີ່ 3 ຄົນຄື: ເປັນເພດຊາຍອາຍຸ 37 ປີ ແລະ 17 ປີ ແລະ ອີກ 1 ຄົນ ເປັນເພດຍິງອາຍຸ 20 ປີ, ຊຶ່ງເປັນລູກ ແລະ ນ້າບ່າວຂອງເຈົ້າຂອງເຮືອນ, ໂດຍສາເຫດການເສຍຊີວິດຍ້ອນສູດດົມຄວນໄຟເຂົ້າໄປຫລາຍ, ຜ່ານການສືບສວນ-ສອບສວນເບື້ອງຕົ້ນ ສາເຫດການເກີດອັກຄີໄພແມ່ນຍ້ອນໄຟຟ້້າລັດວົງຈອນ, ໂດຍເຈົ້າໜ້າທີ່ໄດ້ລະດົມລົດມອດໄຟເຂົ້າສະກັດກັ້ນເປັນເວລາກ່ວາ 2 ຊົ່ວໂມງ ຈຶ່ງສາມາດຄວບຄຸມໄຟໄວ້ໄດ້.

    ເຈົ້າໜ້າທີ່ກົມຕຳຫລວດສະກັດກັ້ນ ແລະ ມອດໄຟ ໃຫ້ຮູ້ວ່າ: ໃນເດືອນ ພະຈິກ ຜ່ານມາ, ທົ່ວປະເທດມີອັກຄີໄພເກີດຂຶ້ນກ່ວາ 20 ຄັ້ງ, ມີຜົນເສຍຫາຍເປັນເຮືອນປະຊາຊົນ 15 ຫລັງ ແລະ ອື່ນໆ, ໂດຍສາເຫດສ່ວນໃຫຍ່ແມ່ນຍ້ອນໄຟຟ້າລັດວົງຈອນ ແລະ ໃຕ້ທູບທຽນບູຊາ.