ຄົນຂາຍຊີ້ນເອົາຄ່າຫົວແທນໜີ້

ລູກເມືອງພວນ

ອີງຕາມແຫຼ່ງຂ່າວຈາກໜັງສືພິມ ບາວເມີຍ ຂອງຫວຽດນາມໃນວັນທີ 2/3 ນີ້ໃຫ້ຮູ້ວ່າ ເຈົ້າໜ້າທີ່ຕຳຫຼວດແຂວງ ບັກຢາງ ໄດ້ກັກຕົວທ້າວ ຕາວັນຮຽນ ອາຍຸ 39 ປີຢູ່ທີ່ເທສະບານເມືອງ ໂຟອຽນ ແຂວງ ທາຍຫງວຽນ ໃນຂໍ້ຫາຂ້າຄົນ.

ອີງຕາມຂໍ້ມູນເອກະສານໃນປີ 2016 ທ້າວຮ່ຽນ ແລະ ນາງ…(ບໍ່ອອກຊື່) ອາຍຸ 38 ປີ ຢູ່ແຂວງ ບັກຢາງ ໄປຄ້າຂາຍຊີ້ນ ແລ້ວຮັກກັນ. ສອງປີຕໍ່ມາ ຮ່ຽນໄດ້ເອົາເງິນໃຫ້ຄົນຮັກຂອງຕົນເອງຢືມຈຳນວນ 250 ລ້ານດົ່ງ ເພື່ອເປັນທຶນໃນການຄ້າຂາຍ.

ມາເຖິງເດືອນກຸມພາຜ່ານມານີ້, ຍ້ອນມີຄວາມຕ້ອງການເງິນເພື່ອຄ້າຂາຍ ຈຶ່ງໄດ້ບອກໃຫ້ແຟນສາວສົ່ງເງິນທີ່ຢືມໄປນັ້ນຄືນໃຫ້ຕົນເອງ ແຕ່ບໍ່ເປັນຜົນ, ຈຶ່ງຄິດວ່າແຟນສາວຫຼອກລວງຕົນເອງເພື່ອເອົາເງິນ, ທ້າວ ຮ່ຽນ ຈຶ່ງເກີດແນວຄວາມຄິດຂ້າແຟນສາວ ແລ້ວຈະຂ້າຕົວເອງຕາຍຕາມ.

ເພື່ອປະຕິບັດແຜນກົນອຸບາຍດັ່ງກ່າວ ຮ່ຽນ ຈຶ່ງໄດ້ນັດແຟນສາວໄປເຮືອນພັກ ຢູ່ທີ່ເທສະບານເມືອງ ຮຽບຮວາ ແຂວງ ບັກຢາງ. ເມື່ອແຟນສາວເຫັນດີ ເຂົາຈຶ່ງໄດ້ຕຽມເອົາພ້າອີ່ໂຕ້ ແລະ ຢາຂ້າຫຍ້າ ແລ້ວກໍໄປເປີດຫ້ອງໄວ້ຖ້າ.

ຄໍ່າຄືນວັນທີ 16/2 ຜ່ານມາ ແຟນສາວໄດ້ກໍໄດ້ໄປຕາມນັດ ກໍຖືກທ້າວ ຮ່ຽນເອົາຊີວິດ. ເມື່ອກໍ່ເລື່ອງສຳເລັດ ຜູ້ກ່ຽວກໍໂຕນໜີເມືອບ້ານເກີດຂອງຕົນ ແລ້ວກິນຢາຂ້າຫຍ້າຫວັງຂ້າຕົນເອງ ແຕ່ຄົນໃນເຮືອນຮູ້ເຫັນກ່ອນ ຈຶ່ງກູ້ໄພເອົາໄປໂຮງໝໍທັນ ຈຶ່ງບໍ່ຕາຍ.

ຕໍ່ກັບເລື່ອງດັ່ງກ່າວ ເຈົ້າເມືອງ ເມືອງຕຽນຟ໊ອງ ໃຫ້ຮູ້ວ່າ: ທ້າວ ຮ່ຽນ ເປັນຜູ້ດຸໝັ່ນຂະຫຍັນພຽນຊອກຢູ່ທຳກິນ. ທ້າວ ຮ່ຽນມີເມຍ ແລະ ລູກ 4 ຄົນ. ເສດຖະກິດຄອບຄົວກໍພໍຢູ່ພໍກິນ, ເມື່ອໄດ້ຍິນຂ່າວວ່າ ຮ່ຽນ ເປັນອາດສະຍາກອນ ເຮັດໃຫ້ທຸກຄົນໃນບ້ານຕົກຕະລຶງ.