ລາວພົບກໍລະນີສົງໄສຕິດເຊື້ອໂຄວິດ 78 ກໍລະນີ

ອີງຕາມບົດລາຍງານຂອງຄະນະສະເພາະກິດເພື່ອປ້ອງກັນ, ຄວບຄຸມ ແລະ ຕອບໂຕ້ການລະບາດຂອງພະຍາດອັກເສບປອດຈາກເຊື້ອຈຸລະໂລກສາຍ ພັນໃຫມ່ ຫລື ໂຄວິດ-19 ໃນວັນທີ 15 ມີນານີ້ ທີ່ຫ້ອງວ່າການສໍານັກງານນາຍົກລັດຖະມົນຕີ ໃຫ້ຮູ້ວ່າ: ປັດຈຸບັນ ສປປ ລາວພົບກໍລະນີສົງໄສຕິດເຊື້ອໂຄວິດ-19 ທັງໝົດ 78 ກໍລະນີ ນັບຕັ້ງແຕ່ວັນທີ 24 ມັງກອນຜ່ານມາຮອດວັນທີ 14 ມີນານີ້, ໃນນີ້ 70 ກໍລະນີແມ່ນກວດບໍ່ພົບເຊື້ອ ແລະ ອີກ 8 ກໍລະນີຍັງລໍຖ້າຜົນກວດຢູ່.

ໃນນັ້ນນະຄອນຫລວງວຽງຈັນ 50 ມີກໍລະນີສົງໄສ (ມີຈີນ 20 ຄົນ, ອາເມລິກາ 1 ຄົນ, ເກົາຫລີ 2 ຄົນ ແລະ ຍີ່ປຸນ 3 ຄົນ), ແຂວງບໍ່ແກ້ວ 8 ກໍລະນີ (ມີລາວ 5 ຄົນ, ຈີນ 2 ຄົນ ແລະ ອັງກິດ 1 ຄົນ), ແຂວງຫລວງພະບາງມີ3 ກໍລະນີ, ຈໍາປາສັກ 5 ກໍລະນີ, ອຸດົມໄຊ 2 ກໍລະນີ, ສາລະວັນ 3 ກໍລະນີ, ສະຫວັນນະເຂດ 3 ກໍລະນີ, ບໍລິຄໍາໄຊ, ຫລວງນໍ້າທາ, ໄຊຍະບູລີ ແລະ ແຂວງຄໍາມ່ວນ ມີແຂວງລະ 1 ກໍລະນີ.

ຜົນການລາຍງານດັ່ງກ່າວສະແດງໃຫ້ຮູ້ວ່າ: ສປປ ລາວ ຍັງບໍ່ມີຜູ້ຕິດເຊື້ອແຕ່ຢ່າງໃດ.