ກ້າວ​ສູ່​ສະພາວະ​ອັນ​ໃໝ່ ​ຕ້ອງ​ພ້ອມ​ກັນ​ໃສ່​ໃຈ​ຕ້ານ​ໂຄ​ວິດ

ກ້າວ​ສູ່​ສະພາວະ​ອັນ​ໃໝ່ ​ຕ້ອງ​ພ້ອມ​ກັນ​ໃສ່​ໃຈ​ຕ້ານ​ໂຄ​ວິດ - AGL banner - ກ້າວ​ສູ່​ສະພາວະ​ອັນ​ໃໝ່ ​ຕ້ອງ​ພ້ອມ​ກັນ​ໃສ່​ໃຈ​ຕ້ານ​ໂຄ​ວິດ

ໂດຍ: ທິດ​ກໍ່າ

ວາລະ​ການ​ເຮັດ​ສົງຄາມ​ຕ້ານ​ໂຄ​ວິດ-19 ​ໃນ​ປະ​ເທດ​ເຮົາ ​ໄດ້​ຜ່ານ​ພົ້ນ​ໄປ​ສອງ​ໄລຍະ​ແລ້ວ. ​ໃນ​ສອງ​ໄລຍະ​ນີ້ ​ເຫັນ​ວ່າ​ພວກ​ເຮົາ​ໄດ້​ຮັບ​ໄຊຊະນະ​ຢ່າງ​ໃຫຍ່​ຫລວງ​ທີ່​ບໍ່​ເຄີຍ​ມີ​ມາ​ໃນ​ປະຫວັດສາດ​ຂອງ​ຊາດ​ລາວ, ຄົນ​ລາວ​ເຮົາ​ ​ເພາະ​ທຸກ​ສິ່ງ​ຢ່າງ​ມັນສະ​ແດງ​ອອກ​ຄື: ​ໄດ້​ມີ​ຄົນ​ຕິດ​ເຊື້ອພຽງ 19 ກໍລະນີ ​ໃນ​ນີ້​ໄດ້​ປິ່ນປົວ​ໃຫ້ຫາ​ຍດີ​ໄປ​ແລ້ວ​ຈຳນວນ 8 ຄົນ, ຍັງ​ປິ່ນປົວ​ຢູ່​ໂຮງໝໍ 11 ຄົນ. ອັນ​ພິ​ເສດ​ສຸດ​ໃນ​ການ​ປິ່ນປົວ​ຂອງ​ແພດ​ໝໍ​ລາວ​ເຮົາ​ແມ່ນ​ຍັງ​ບໍ່​ທັນ​ມີ​ຜູ້​ໃດ​ເສຍ​ຊີວິດ​ຍ້ອນ. ​ເມື່ອທຽບ​ໃສ່​ບັນດາ​ປະ​ເທດ​ຕ່າງໆ​ໃນ​ພາກພື້ນ ​ແລະ ​ໃນ​ໂລກ​ແມ່ນ​ມີ​ທັງ​ຜູ້​ຕິດ​ເຊື້ອ, ຜູ້​​ເຈັບ​ເປັນ, ປິ່ນປົວ​ດີ, ມີ​ຜູ້​ລົ້ມຕາຍ​ຫາຍ​ຍານະ​ຕາມ​ສະພາບ​ຄວາມ​ເປັນ​ຈິງ ​ແລະ ປະລິມານ​ໜ້ອຍ, ຫລາຍ​ຂອງ​ແຕ່ລະ​ປະ​ເທດ.

​ແນວ​ໃດ​ກໍ​ດີ, ຕາມ​ທິດ​ກໍ່າ​ວ່າ ຈາກ​ຜົນງານ ​ແລະ ​ໄຊຊະນະ​ທີ່​ປະ​ເທດ​ເຮົາ​ສາມາດ​ຍາດ​ມາ​ໄດ້​ນັ້ນ ​ແມ່ນ​ຍ້ອນ​ມາ​ຈາກ​ຫລາຍ​ປັດ​ໄຈ ​ເປັນຕົ້ນອັນ​ທີ​ໜຶ່ງ​ແມ່ນ​ພັກ ​ແລະ ລັດຖະບານ​ເຮົາ​ມີ​ການ​ສະດຸ້ງ​ໄວ ​ເພື່ອ​ການ​ຕໍ່ຕ້ານ ​ແລະ ສະກັດ​ກັ້ນການ​ແຜ່​ລະບາດ​ຂອງ​ໂຄ​ວິດ-19 ​ແຕ່​ຫົວທີ. ອັນ​ທີ​ສອງ​ຍ້ອນ​ພວກ​ເຮົາ​ມີ​ການ​ກັ່ນ​ຕອງ​ຄັດ​ກອງ​ຢ່າງ​ເຄັ່ງ​ຂັດ​ຕໍ່​ຄົນ​ເຂົ້າ-ອອກ​ພາຍ​ໃນ, ພາຍ​ນອກ ​ແລະ ຄົນ​ທີ່​ມາ​ຈາກ​ປະ​ເທດ​ທີ່​ມີ​ຄວາມ​ສ່ຽງ. ອັນ​ທີ​ສາມ​ແມ່ນ​ຍ້ອນ​ການ​ປິດ​ຊາຍ​ແດນ​ລະຫວ່າງ​ປະ​ເທດ, ກ້າວ​ໄປ​ເຖິງ​ປິດ​ການ​ຮຽນ-ການ​ສອນ​ຂອງ​ນັກຮຽນ, ຄູ-ອາຈານ​ໃນ​ທຸກ​ສະ​ຖາ​ບັນ ນັບ​ແຕ່​ຂັ້ນລ້ຽງ​ເດັກ, ອະນຸບານ ຂຶ້ນຮອດ​ວິທະຍາ​ໄລ, ມະຫາວິທະຍາ​ໄລ ທັງ​ພາກ​ລັດ ​ແລະ ​ເອກະ​ຊົນ. ອັນ​ທີ​ສີ່​ກໍ​ແມ່ນ​ປະຊາຊົນ​ເຮົາ​ພ້ອມ​ກັນ​ເປັນ​ຈິດ​ໜຶ່ງ​ໃຈ​ດຽວ​ກັນ​ປະຕິບັດ​ຄຳ​ສັ່ງ​ຂອງ​ພັກ ​ແລະ ລັດຖະບານ, ບັນດາ​ນິຕິ​ກຳ​ຕ່າງໆ​ຂອງ​ຄະນະ​ສະ​ເພາະ​ກິດ, ກົມ​ກອງ​ທ້ອງ​ຖິ່ນ​ໄດ້​ເປັນ​ຢ່າງ​ດີ ທັງ​ເຂັ້ມງວດ ​ແລະ ​ເດັດຂາດ ​ໂດຍ​ສະ​ເພາະ​ແມ່ນ​ຄຳ​ສັ່ງ​ເລກທີ 06/ນຍ ຂອງ​ທ່ານ​ນາຍົກລັດຖະມົນຕີ ​ແລະ ຄຳ​ສັ່ງ​ເລກທີ 07/ຄລສພ ຂອງ​ຄະນະ​ເລຂາທິການ​ສູນ​ກາງ​ພັກ. ອັນ​ທີ​ຫ້າ​ກໍ​ແມ່ນ​ຍ້ອນ​ໄດ້​ຮັບ​ການ​ຊ່ວຍ​​ເຫລືອ​ຈາກ​ສາກົນ​ທາງ​ດ້ານ​ວັດຖຸ ​ແລະ ​ເງິນ​ຄຳ ​ເປັນຕົ້ນ ສະຫະລັດ​ອາ​ເມ​ລິ​ກາ​ໄດ້​ຊ່ວ​ຍ​ເຫລືອ​ເຖິງ 2 ລ້ານ​ໂດ​ລາ​ສະຫະລັດ. ນອກຈາກ​ນັ້ນ ກໍ​ມີ ສປ ຈີນ ທີ່​ເປັນ​ເພື່ອນ​ຮ່ວມ​ຊາຕາກຳ​ໄດ້​ຊ່ວຍ​ເຫລືອ​ທັງ​ນັກ​ຊ່ຽວຊານ ​ແລະ ວັດຖຸ​ຢຸກຢາ​ທາ​ນັງ, ອຸປະກອນ​ຮັບ​ໃຊ້​ຕ່າງໆ​ຢ່າງ​ມະຫາສານ. ຍັງ​ມີ ສສ ຫວຽດນາມ ກໍ​ໄດ້​ຊ່ວຍ​ເຫລືອ​ທັງ​ເງິນ ​ແລະ ວັດຖຸ​ນັບ​ແຕ່​ຂັ້ນສູນ​ກາງ​ລົງ​ຮອດ​ທ້ອງ​ຖິ່ນ​ໃນ​ບາງ​ແຂວງ​ໃນ​ທົ່ວ​ປະ​ເທດ. ​ແຕ່​ວ່າ​ໃນ​ນີ້ ​ໂຕ​ອັນ​ສຳຄັນ​ຕັດສິນ​ໄຊຊະນະ​ໃນ​ການ​ຕ້ານ​ໂຄ​ວິດ-19 ​ໃນ​ໄລຍະ​ຜ່ານ​ມານັ້ນ ​ແມ່ນ​ຍ້ອນ​ແພດ​ໝໍ​ເຮົາ​ໄດ້​ພ້ອມ​ກັນ​ຕັດສິນ​ໃຈ​ສູງ​ໃນ​ການ​ສູ້​ຮົບ​ໂດຍ​ກົງ​ຈົນ​ສັງຄົມ​ໄດ້​ໃຫ້​ສາຍາ​ນາມ​ວ່າ: ນັກຮົບ​ເສື້ອຂາວ ​ໃນ​ທົ່ວ​ປະ​ເທດ​ໄດ້​ເອົາ​ໃຈ​ໃສ່​ເຮັດ​ໜ້າ​ທີ່​ຂອງ​ຕົນ​ຢ່າງ​ບໍ່​ຮູ້​ອິດ​ຮູ້​ເມື່ອຍ. ​ແຕ່ລະ​ເຂດ​ແຂວງ​ນັບ​ແຕ່​ຂັ້ນສູນ​ກາງ ​ແລະ ທ້ອງ​ຖິ່ນ​ໄດ້​ເອົາ​ໃຈ​ໃສ່​ຄັດ​ກອງ, ກຳນົດ​ໄດ້​ເປົ້າໝາຍ​ຄວາມ​ສ່ຽງ. ບັນດາ​ແພດ​ໝໍ​ຢູ່​ສູນ​ປິ່ນປົວ​ຂັ້ນສູນ​ກາງ ​ແລະ ​ແຂວງ​ກໍ​ໄດ້​ຍົກ​ສູງ​ຄວາມ​ຮັບຜິດຊອບ​ໃນ​ການ​ປິ່ນປົວ​ຜູ້​ຕິດ​ເຊື້ອຈຶ່ງ​ສາມາດ​ກູ້​ເອົາ​ຊີວິດ​ຜູ້​ເຈັບ​ເປັນ​ໃຫ້​ລອດ​ຊີວິດ​ຈາກ​ໂຣກຮ່າ​ກ້ອມ​ໂຄ​ວິດ-19 ນີ້​ໄດ້​ຢ່າງ​ເພິ່ງ​ພໍ​ໃຈ. ຈາກ​ບັ້ນຮົບ​ສູ້​ເສິກ​ກັບ​ໂຄ​ວິດ-19 ທີ່​ເປັນ​ພະຍາດ​ອັນຕະລາຍ​ຮ້າຍ​ກາດ​ຊະນິດ​ໃໝ່​ນັບ​ແຕ່​ວັນ​ທີ 1 ມີນາ ຫາ​ວັນ​ທີ 3 ພຶດສະພາ ພວກ​ເຮົາ​ສາມາດ​ເວົ້າ​ໄດ້​ຢ່າງ​ເຕັມ​ປ່ຽມ​ວ່າ​ໄດ້​ຮັບ​ໄຊຊະນະ​ຢ່າງ​ໃຫຍ່​ຫລວງ​ຄັ້ງປະຫວັດສາດ​ທີ່​ບໍ່​ເຄີຍ​ມີ​ມາ​ໃນ​ຫລາຍ​ເຊັ່ນຄົນ.

​ແນວ​ໃດ​ກໍ​ຕາມ, ນັບ​ຈາກ​ນີ້​ໄປ​ ຄື​ນັບ​ແຕ່​ວັນທີ 4 ຫາ​ວັນ​ທີ 17 ພຶດສະພາ ພວກ​ເຮົາ​ຍັງ​ຈຳ​ເປັນ​ຕ້ອງ​ໄດ້​ສືບ​ຕໍ່​ພາລະກິດ​ຕ້ານ​ໂຄ​ວິດ​ໄປ​ຕື່ມ​ອີກ ​ເພາະ​ຢູ່​ບັນດາ​ປະ​ເທດ​ຕ່າງໆ​ໃນ​ພາກພື້ນ ​ແລະ ​ໃນ​ໂລກ​ຍັງ​ມີ​ຜູ້​ຕິດ​ເຊື້ອ​ໂຄ​ວິດ-19 ​ໄປ​ຕິກໆ. ບາງ​ປະ​ເທດ​ກໍ​ຍັງ​ມີ​ຜູ້​ຕິດ​ເຊື້ອ​ເພີ່ມ​ຂຶ້ນຕໍ່​ເນື່ອງ ຈຶ່ງ​ມີ​ຄວາມ​ຈຳ​ເປັນ​ເຝົ້າລະວັງ​ຢ່າງ​ໃກ້ຊິດ​ດ້ວຍ​ຕົນ​ເອງ. ຕໍ່​ການ​ອະນຸຍາດ, ຜ່ອນຜັນ​ຕາມ​ແຈ້ງ​ການ​ສະບັບ​ເລກທີ 524/ຫສນຍ, ລົງ​ວັນ​ທີ 1 ພຶດສະພາ 2020 ​ໃນ​ຈຳນວນ 5 ຂໍ້​ນັ້ນ ​ເປັນ​ພຽງ​ມາດ​ຕະການ​ຜ່ອນຜັນ​ຕາມ​ສະພາບ​ຄວາມ​ເປັນ​ຈິງ​ຂອງ​ບັ້ນຮົບ​ໃນ​ການ​ຕ້ານ​ສົງຄາມ​ໂຄ​ວິດ-19 ຢູ່​ປະ​ເທດ​ເຮົາ​ສະ​ເພາະ​ປະ​ເທດ​ເຮົາ​ໃນ​ພາກພື້ນ ​ແລະ ​ໃນ​ໂລກ. ​ໃນ​ຂັ້ນຕໍ່​ໄປ ຖ້າ​ຫາກ​ປະ​ເທດ​ເຮົາ​ຫາກ​ປອດ​ການ​ແຜ່​ລະບາດ​ເຊື້ອ​ໂຄ​ວິດ-19 ​ໄປ​ຈົນ​ຮອດ​ວັນ​ທີ 17 ຫລື ຊິ້ນ​ເດືອນ​ພຶດສະພາ ກໍ​ເປັນ​ອັນວ່າ​ປະ​ເທດ​ເຮົາ​ຍິ່ງ​ໄດ້​ຮັບ​ໄຊຊະນະ​ເກີນ​ຄາດ​ໃນ​ສົງຄາມ​ຕໍ່ສູ້​ຕ້ານ​ໂຄ​ວິດ-19 ​ໃນ​ຄັ້ງນີ້.

​ເຖິງ​ຢ່າງ​ໃດ​ກໍ​ດີ, ຫລາຍ​ຄົນ​ອາດ​ເຂົ້າ​ໃຈ​ວ່າ​ເຊື້ອ​ໂຄ​ວິດ-19 ມັນ​ຈະ​ໝົດ​ໄປ​ຕາມ​ການ​ເວລາ​ຂອງ​ມັນ ​ແຕ່​​ໃນ​ເມື່ອ​ຍັງ​ມີ​ຄົນ​ຕິດ​ເຊື້ອ​ໃນ​ທົ່ວ​ໂລກ​ມີ​ປະລິມານ​ຢູ່​ເກົ່າ ຫລື ​ເພີ່ມ​ຂຶ້ນ ກໍ​ສະ​ແດງ​ວ່າ​ໂຄ​ວິດ-19 ຍັງ​ຝັງ​ເລິກ​ຢູ່​ໃນ​ຄົນ​ເຮົາ​ນັ້ນອີກ​ຕໍ່​ໄປ. ​ເ​ພາະສະນັ້ນ, ພາລະກິດ​ຕ້ານ ​ແລະ ສະກັດ​ກັ້ນຂອງ​ພວກ​ເຮົາ​ຕ້ອງ​ໄດ້​ພ້ອມ​ກັນ​ສືບ​ຕໍ່​ຕະຫລອດ​ໄປ​ຈົນ​ກວ່າ​ເຊື້ອພະຍາດ​ຈະ​ດັບ​ຫາຍ​ຕາຍ​ຈາກ​ຢ່າງ​ຮຽບຮ້ອຍ. ກ້າວ​ສູ່​ສະ​ພາວະ​ອັນ​ໃໝ່​ຕ້ອງ​ຮ່ວມ​ໃຈ​ກັນ​ຕ້ານ​ໂຄ​ວິດ​ເພື່ອ​ຊີວິດ​ຢູ່​ລອດ​ປອດ​ໄພ​ຂອງ​ຊາດ​ລາວ​ຄົນ​ລາວ​ພວກ​ເຮົາ.

ກ້າວ​ສູ່​ສະພາວະ​ອັນ​ໃໝ່ ​ຕ້ອງ​ພ້ອມ​ກັນ​ໃສ່​ໃຈ​ຕ້ານ​ໂຄ​ວິດ - Wave100S AD to Website 2020 0 - ກ້າວ​ສູ່​ສະພາວະ​ອັນ​ໃໝ່ ​ຕ້ອງ​ພ້ອມ​ກັນ​ໃສ່​ໃຈ​ຕ້ານ​ໂຄ​ວິດ

ກ້າວ​ສູ່​ສະພາວະ​ອັນ​ໃໝ່ ​ຕ້ອງ​ພ້ອມ​ກັນ​ໃສ່​ໃຈ​ຕ້ານ​ໂຄ​ວິດ -    AD conten website - ກ້າວ​ສູ່​ສະພາວະ​ອັນ​ໃໝ່ ​ຕ້ອງ​ພ້ອມ​ກັນ​ໃສ່​ໃຈ​ຕ້ານ​ໂຄ​ວິດ
ກ້າວ​ສູ່​ສະພາວະ​ອັນ​ໃໝ່ ​ຕ້ອງ​ພ້ອມ​ກັນ​ໃສ່​ໃຈ​ຕ້ານ​ໂຄ​ວິດ - lattana banner 1 - ກ້າວ​ສູ່​ສະພາວະ​ອັນ​ໃໝ່ ​ຕ້ອງ​ພ້ອມ​ກັນ​ໃສ່​ໃຈ​ຕ້ານ​ໂຄ​ວິດ
ກ້າວ​ສູ່​ສະພາວະ​ອັນ​ໃໝ່ ​ຕ້ອງ​ພ້ອມ​ກັນ​ໃສ່​ໃຈ​ຕ້ານ​ໂຄ​ວິດ - lattana banner - ກ້າວ​ສູ່​ສະພາວະ​ອັນ​ໃໝ່ ​ຕ້ອງ​ພ້ອມ​ກັນ​ໃສ່​ໃຈ​ຕ້ານ​ໂຄ​ວິດ
error: Alert: ເນື້ອຫາຂ່າວມີລິຂະສິດ !!