ຊາວບຣາຊິນອອກມາຊຸມນຸມຂັບໄລ່ປະທານາທິບໍດີໃນຫລາຍເມືອງ ເຫດບໍ່ພໍໃຈການຮັບມືໂຄວິດ-19
ວັນທີ 29 ພຶດສະພາ 2021, ປະຊາຊົນຊາວບຣາຊິນນັບໝື່ນຄົນອອກມາເດີນຂະບວນໄປຕາມທ້ອງຖະໜົນ ເພື່ອສະແດງຄວາມບໍ່ພໍໃຈຕໍ່ການຮັບມືໂຄວິດ-19 ຂອງປະທານາທິບໍດີ ຍາອີ ໂບລໂຊນາຣູ ເຊິ່ງຖືເປັນການປະທ້ວງຄັ້ງໃຫຍ່ທີ່ສຸດໃນບຣາຊິນຄັ້ງໜຶ່ງນັບແຕ່ເລີ່ມມີການລະບາດຂອງໂຄວິດ-19 ໃນປີຜ່ານມາ. ຂະນະທີ່ສື່ຫລາຍສຳນັກລາຍງານກົງກັນວ່າ: ຄວາມນິຍົມໃນຕົວປະທານາທິບໍດີທີ່ມີແນວຄິດຂວາຈັດຄົນນີ້ຫລຸດລົງຈາກການຮັບມືພະຍາດລະບາດ.
ການປະທ້ວງດຳເນີນໄປໃນຫລາຍເມືອງເຊັ່ນ: ເຊົາເປົາໂລ, ຣີໂອເດຈາເນໂຣ ແລະ ບຣາຊິນເລຍ ໂດຍຜູ້ປະທ້ວງຮຽກຮ້ອງໃຫ້ມີຂະບວນການຖອດຖອນປະທານາທິບໍດີ ຕະຫລອດຈົນການເຂົ້າເຖິງວັກຊີນໂຄວິດ-19 ທີ່ດີຂຶ້ນ. ຜູ້ປະທ້ວງຍົກປ້າຍຂໍ້ຄວາມເຊັ່ນ: “ໂບລໂຊນາຣູອອກໄປ” ແລະ “ຖອດຖອນດຽວນີ້”. ສຳນັກຂ່າວ Reuters ລະບຸວ່າ: ການປະທ້ວງດັ່ງກ່າວຈັດຂຶ້ນໂດຍພັກການເມືອງຝ່າຍຊ້າຍ, ສະຫະພາບແຮງງານ ແລະ ສະມາຄົມນັກສຶກສາ. ສ່ວນສຳນັກຂ່າວ CNN ລາຍງານວ່າ: ຜູ້ປະທ້ວງຫລາຍຄົນບໍ່ໄດ້ມີໄລຍະຫ່າງທາງສັງຄົມ ເຖິງວ່າສ່ວນຫລາຍຈະໃສ່ຜ້າປິດປາກ-ດັງກໍຕາມ.
ບຣາຊິນກຳລັງຜະເຊີນການລະບາດຂອງໂຄວິດ-19 ໃນຮອບທີ 3 ເມື່ອວັນທີ 22 ພຶດສະພາຜ່ານມາ ກະຊວງສາທາລະນະສຸກຂອງບຣາຊິນລາຍງານຜູ້ຕິດເຊື້ອໃໝ່ 79.670 ຄົນ ລວມທັງຜູ້ເສຍຊີວິດທີ່ກ່ຽວຂ້ອງກັບໂຄວິດ-19 ຈຳນວນ 2.012 ຄົນ, ສ່ວນຜູ້ຕິດເຊື້ອສະສົມໃນບຣາຊິນມີຫລາຍກວ່າ 16 ລ້ານຄົນ ແລະ ຜູ້ເສຍຊີວິດສະສົມມີ 460.000 ຄົນ. ຂະນະທີ່ມີຜູ້ໄດ້ຮັບວັກຊີນຄົບຖ້ວນຕາມຈຳນວນໂດສແນະນຳແລ້ວປະມານ 10% ຂອງປະຊາກອນທົ່ວປະເທດທີ່ມີຫລາຍກວ່າ 210 ລ້ານຄົນ.
ໃນໄລຍະເລີ່ມຕົ້ນຂອງການລະບາດ ທ່າທີຂອງທ່ານ ໂບລໂຊນາຣູ ຄືການພະຍາຍາມເຮັດໃຫ້ການລະບາດເບິ່ງເປັນເລື່ອງບໍ່ຮ້າຍແຮງ, ທ່ານເຄີຍເອີ້ນໂຄວິດ-19 ວ່າເປັນ “ໄຂ້ຫວັດເລັກໆນ້ອຍໆ” ແລະ ພະຍາຍາມທຳລາຍຄວາມພະຍາຍາມໃນການໃຊ້ມາດຕະການເວັ້ນໄລຍະຫ່າງທາງສັງຄົມ ຫລື ການລັອກດາວ. ຂະນະທີ່ວຸດທິສະພາຂອງບຣາຊິນກຳລັງສືບສວນການຮັບມືຕໍ່ໂຄວິດ-19 ຂອງລັດຖະບານ ໂບລໂຊນາຣູ ເຊັ່ນກັນ.
ການປະທ້ວງສ່ວນຫລາຍເປັນໄປຢ່າງສະຫງົບ ຍົກເວັ້ນໃນເມືອງເຣຊີເຟ ເມືອງຫລວງຂອງລັດເປນຳບູກູ ເຊິ່ງຕຳຫລວດໄດ້ໃຊ້ລູກປືນຢາງ ແລະ ແກັສນໍ້າຕາເພື່ອສະຫລາຍຝູງຊົນ. ຂະນະທີ່ຮອງເຈົ້າຄອງລັດດັ່ງກ່າວລະບຸວ່າ: ຄຳສັ່ງສະຫລາຍຝູງຊົນບໍ່ໄດ້ມາຈາກລັດຖະບານ ແລະ ເລີ່ມມີການສອບສວນກ່ຽວກັບຍຸດທະວິທີຂອງຕຳຫລວດແລ້ວ, ສ່ວນເຈົ້າຄອງລັດເປນຳບູກູໄດ້ສັ່ງພັກວຽກຜູ້ບັນຊາການຕຳຫລວດ ແລະ ເຈົ້າໜ້າທີ່ທີ່ກ່ຽວຂ້ອງໄວ້ກ່ອນຈົນກວ່າຂະບວນການສອບສວນຈະສຳເລັດ.
ອ້າງອີງ:
- https://edition.cnn.com/2021/05/30/americas/brazil-bolsonaro-covid-protests-intl-hnk/index.html
- https://www.reuters.com/world/americas/brazilians-stage-nationwide-protests-against-president-bolsonaros-covid-response-2021-05-29/
- https://www.aljazeera.com/news/2021/5/29/brazil-protesters-denounce-bolsonaros-covid-handling
- https://ourworldindata.org/covid-vaccinations
