ກັບເມືອງແມນເຊສເຕີແລ້ວ ຣັງນິກ ເຜີຍ ປັອກບາ ພັກອີກໜຶ່ງເດືອນ
ຣາຟ ຣັງນິກ ຜູ້ຈັດການ ແມນເຊັສເຕີ ຢູໄນເຕັດ ຢືນຢັນວ່າ ພໍລ ປັອກບາ ໄດ້ບິນກັບຄືນຈາກ ດູໄບ ມາ ເມືອງແມນເຊັສເຕີ. ແຕ່ຕ້ອງພັກອີກ 1 ເດືອນ ເພື່ອໃຫ້ຮ່າງກາຍແຂງແຮງສົມບູນ.
ກອງກາງອາຍຸ 28 ປີໄດ້ຮັບບາດເຈັບຂາໃນລະຫວ່າງການຝຶກຊ້ອມກັບທີມຊາດຝຣັ່ງໃນເດືອນພະຈິກ ເຮັດໃຫ້ເຈົ້າໂຕຕ້ອງບິນໄປຟື້ນຟູທີ່ ດູໄບ ສະຫະລັດອາຣັບເອມີເຣດ ຈົນໄດ້ອົດຊ່ວຍທີມເຖິງ 8 ເກມ.
ລ່າສຸດນີ້ ນາຍໃຫຍ່ຄົນໃໝ່ຂອງທີມ ຜີສາດແດງ ອອກມາເປີດເຜີຍວ່າລາວໄດ້ໂອ້ລົມກັບນັກເຕະແລ້ວ. ພ້ອມທັງຢືນຢັນວ່ານັກເຕະຈະບິນກັບຄືນສູ່ໂອ ແທຟຟອດ ມື້ນີ້ ແລະ ຈະພັກອີກ 1 ເດືອນ ເພື່ອໃຫ້ຮ່າງກາຍແຂງແຮງ.
“ພວກເຮົາໄດ້ໂທລົມກັນແລ້ວໃນວັນອັງຄານ ແລະ ໃນເວລານັ້ນລາວຍັງຢູ່ໃນ ດູໄບ, “ຣັງນີກ ກ່າວໃນການສໍາພາດກ່ອນການແຂ່ງຂັນ ພຣີເມຍລີກ ໃນວັນເສົາກັບ ນໍຣິດ ຊິຕີ້.
“ລາວຕັ້ງໃຈຈະກັບມາມື້ນີ້ (ວັນສຸກ) ແລະ ພວກເຮົາຈະພົບກັນສ່ວນຕົວໃນວັນອາທິດ.”
“ພວກເຮົາລົມກັນໄດ້ປະມານ 10-15 ນາທີ ແລະ ລາວຮູ້ສຶກດີຂຶ້ນ. ແຕ່ເຫັນໄດ້ວ່າຍັງບໍ່ຟິດເຕັມທີ່.”
ສໍາລັບ ປັອກບາ, ມີສັນຍາກັບ ແມນເຊັສເຕີ ຢູໄນເຕັດ ຈົນຈົບລະດູການນີ້ ແຕ່ຍັງບໍ່ທັນມີວີ່ແວວຈະຕໍ່ສັນຍາອອກໄປອີກເທື່ອ.
