ເມືອງນອງ ທຳລາຍ ຢາຂ້າຫຍ້າ ຢາສູບ ແລະ ເຄື່ອງມືລ່າເນື້ອ ທີ່ເປັນສິນຄ້າເກືອດຫ້າມ

ວັນທີ 29 ມັງກອນ ຜ່ານມາ, ຫ້ອງການອຸດສາຫະກຳ ແລະ ການຄ້າ (ອຄ) ເມືອງນອງ ແວງສະຫວັນນະເຂດ ໄດ້ທຳລາຍ ສິນຄ້າເສື່ອມຄຸນະພາບ, ສິນຄ້າໝົດອາຍຸ ແລະ ສິນຄ້າເກືອດຫ້າມ ທີ່ຢຶດມາຈາກຫ້າງຮ້ານໃນເຂດບ້ານຕ່າງໆທົ່ວເມືອງ, ສິນຄ້າທີ່ນຳເອົາມາທຳລາຍໃນຄັ້ງນີ້ມີ ປະເພດ ເຂົ້າໜົມ, ເຄື່ອງດື່ມອັດລົມ, ຢາຂ້າຫຍ້າ, ຢາສູບ ແລະ ເຄື່ອງມືລ່າເນື້ອ ລວມມູນຄ່າ 30 ລ້ານກວ່າກີບ.

ສຳລັບປີ 2023 ຜ່ານມາ, ເມືອງນອງກວດຢຶດສິນຄ້າເສຍຄຸນ-ເສື່ອມຄຸນະພາບ, ສິນຄ້າປອມແປງ,ສິນຄ້າຮຽນແບບ, ສິນຄ້າເກືອດຫ້າມ ແລະ ສິນຄ້າ ນອກລະບົບ 22 ລາຍການ, ລວມມູນຄ່າ 21 ລ້ານກວ່າກີບ ແລະ ກ່າວເຕືອນຕໍ່ຜູ້ລະເມີດ ປັບໃໝເປັນເງິນທັງໝົດຫຼາຍກວ່າ 10 ລ້ານກີບ; ທົ່ວເມືອງມີ ຫ້າງຮ້ານທັງໝົດ 115 ຮ້ານ, ຮ້ານຄົນລາວມີ 72 ຮ້ານ, ຮ້ານ ຊາວຕ່າງປະເທດ 43 ຮ້ານ.