ລູກໄຟລອຍຂຶ້ນຈາກນໍ້າກາຍເປັນຕໍານານບັ້ງໄຟພະຍານາກ

- advert banner 728 90 728x90 - ລູກໄຟລອຍຂຶ້ນຈາກນໍ້າກາຍເປັນຕໍານານບັ້ງໄຟພະຍານາກ

ໂດຍ: ທິດ​ກໍ່າ

- new3 - ລູກໄຟລອຍຂຶ້ນຈາກນໍ້າກາຍເປັນຕໍານານບັ້ງໄຟພະຍານາກ

ຢູ່​ປະ​ເທດ​​ເຮົາຍັງ​ມີ​ປາກົດ​ການຫລາຍ​ອັນຫລາຍ​ຢ່າງ​ທີ່​​ເປັນ​ເລື່ອງ​ປິດສະໜາ ​ແລະ ​ກາຍ​ເປັນ​ຕໍານານ​ກ່າວ​ຂານ​ກັນ​ມາຈົນຮອດປັດຈຸບັນ ​ແລະ ​ກໍ​ຍັງ​ບໍ່​ທັນ​ມີ​ໃຜ​ສາມາດ​ວິ​ເຄາະ​ເຈາະ​ເລິກ​ເຖິງປັດ​​ໄຈຕົ້ນ​ເຫດ​ຄວາມ​ເປັນ​ມາ​ວ່າ​ສິ່ງເຫລົ່າ​ນັ້ນ​ແມ່ນ​ເກີດ​ມາ​ຈາກ​ຫຍັງ, ດ້ວຍ​ສາ​ເຫດອັນ​ໃດ ​ແລະ ​ເປັນ​ຫຍັງ​ຈຶ່ງ​ເປັນ​ຄື​ແນວ​ນັ້ນ ? ໜຶ່ງ​ໃນ​ປາກົດ​ການ​ທີ່​ວ່າ​ນີ້​ກໍ​ແມ່ນປາກົດການ​ລູກ​ໄຟ​ເປັນ​ແສງ​ຂະໜາດ​ນ້ອຍໆ​ທີ່ລອຍຂຶ້ນ​​ຈາກ​ໜ້າ​ນ້ຳ​ແລ້ວ​ກໍ​ມະ​ຫັບ​ມະຫາຍ​ໄປ​ເທິງອາກາດ ​ເຊິ່ງ​ຊາວ​ລາວ​ເຮົາ​ໄດ້​ກ່າວ​ຂານ​​ກາຍ​ມາ​ເປັນ​ຕໍານານ​ວ່າ: “ບັ້ງ​ໄຟ​ພະຍາ​ນາກ”.

ກ່າວ​ເຖິງ​ບັ້ງ​ໄຟ​ພະຍາ​ນາກ, ​ທິດ​ກໍ່າ​ເຄີຍ​ໄດ້​ໄປ​ສໍາຜັດ​ມາ​ແລ້ວຫລາຍ​ຄັ້ງ ​ເຊິ່ງ​ໄປ​ແຕ່ລະຄັ້ງກໍເຫັນ​ເຕັມ​ຕາ​. ກ່ອນ​ໄປ​ສໍາຜັດ ​ທິດ​ກໍ່າ​ກໍ​ຄິດ​ເປັນ​ເຄິ່ງໆ​ກາງໆຫ້າ​ສິບ​ຫ້າ​ສິບ, ​ແຕ່​ຜ່ານ​ການ​ໄປ​ເຫັນ​ຕົວ​ຈິງ​ຈຶ່ງ​ຮູ້​ສິ່ງ​ທີ່​ມັນ​ເກີດ​ຂຶ້ນ​ຢ່າງ​ອັດສະຈັນ​ ແລະ ​ລຶກລັບ​ນັ້ນ​ມັນ​ເປັນຄວາມ​ຈິງ. ສໍາລັບຈຸດ​ທີ່​ທິດ​ກໍ່າເຄີຍ​ໄດ້​ໄປ​ເບິ່ງ​ໄປ​ຊົມ​ນັ້ນ​ຄືຢູ່​ບ້ານ​ໂນນ​ຊາຍ​, ຈຸດ​ທີ​ສອງ​​ແມ່ນ​ບ້ານ​ຫ້ວຍ​ສຽດ, ​​ຈຸດ​ທີ​ສາມ​ແມ່ນ​ກະ​ໂຕ​​ແປະຂົວນ້ຳ​ງື່ມນັ້ນ​ເອງ. ສ່ວນວ່າ​ຈຸດ​ທີສີ່​​ແມ່ນ​ບຶງ​ໜອງ​ໃຫຍ່​​ເຂດບ້ານ​ນາ​ຄວາຍ ​ເມືອງ​ໄຊ​ເສດ​ຖາ ກໍ​ຄື​ທຸກ​ບ່ອນ​ທີ່​ໄດ້​​ເຄີຍ​ໄປ​ສໍາ​ຜັດ​ມາ​ກໍແມ່ນຢູ່​ຂອບ​ເຂດ​ນະຄອນຫລວງ​ວຽງ​ຈັນ​ເຮົາ​​ ​ໃນ​ໂອກາດ​ບຸນ​ອອກ​ພັນ​ສາ​ແມ່ນ​ມີ​ປາກົດການ​ດັ່ງກ່າວ​ຢ່າງ​ເຫັນ​ໄດ້​ແຈ້ງ ​ແລະ ​ແມ່ນ​ມີ​ຄວາມ​ຈິງ ​ແລະ ​​​ມີ​ຄວາມ​ລຶກລັບຂອງ​ມັນແທ້, ບໍ່​ແມ່ນ​ການ​ຕົວະລາຍ​ພາງ​​ແຕ່​ປະການ​​ໃດ. ນອກຈາກ​ເຮົາ​ເຫັນ​ແລ້ວ ກໍ​ຍັງ​ມີ​ຜູ້​ອື່ນ​ທີ່​ເປັນ​ຮ້ອຍ​ເປັນ​ພັນ​ກາຍ​ເປັນ​ພາບ​ບັນຍາ​ກາດ​ຄຶກຄື້ນ​ຕື່ນເຕັ້ນສໍາລັບ​ຜູ້​ໄປ​ເຫັນ. ພໍ​ຮອດ​ຍາມ​ບຸນ​ອອກ​ພັນ​ສາ​ເດືອນ 11 ​ລາວເພັງ 15 ຄໍ່າ ​ຜູ້​ຄົນ​ທັງຫລາຍ​ຕ່າງ​ກໍ​ພາກັນຈົດ​ຈໍ່​ໄປ​ທ່ຽວ​ຊົມ​ເບິ່ງ​ບັ້ງ​ໄຟ​ດັ່ງກ່າວ. ເມື່ອ​ກ່າວ​ເຖິງ​ເລື່ອງ​ນີ້ ​ຖ້າ​ຜູ້​ໃດຍັງ​ບໍ່​ທັນ​ໄດ້​ໄປ​ເຫັນ​ຕົວ​ຈິງ​ແລ້ວ​ກໍຢ່າ​ຟ້າວ​ຫລົບ​ລູ່ ຫລື​ ຜູ້​ໄປ​ເຫັນ​ຕົວ​ຈິງ​ແລ້ວ​ກໍ​ຢ່າ​ຟ້າວ​ໄປ​ເອິກ​ກະເຫລີ​ກຈົນ​ເກີນ​ເຫດ ເພາະ​ທຸກ​ສິ່ງ​ຢ່າງມັນ​ຍັງ​ເປັນ​ສິ່ງ​ປິດສະໜາ​ ແລະ​ ອາດ​ເປັນ​ສິ່ງ​ທີ່​ບໍ່​ແນ່ນອນ ​ເຊິ່ງວິທະຍາສາດ​ຍັງ​ບໍ່​ທັນ​ສາມາດ​ຄົ້ນຄວ້າ​​ ແລະ ​ຢັ້ງຢືນໄດ້ວ່າ​ສິ່ງ​ທີ່​ເກີດ​ຂຶ້ນ​ນີ້​ມັນ​ແມ່ນ​ເກີດ​ຈາກ​ປັດ​ໄຈ​ອັນ​ໃດ​ແທ້.

​ເມື່ອ​ພາກັນ​ຕັ້ງ​ໂຈດ​ວ່າ, ​ເປັນ​ຫຍັງ​ເຂົາ​ຈຶ່ງ​ເອີ້ນ​ວ່າ​ ບັ້ງ​ໄຟ​ພະຍາ​ນາກ ? ຄໍາ​ຕອບ​ອາດເປັນຍ້ອນ​ລູກ​ໄຟ​ດັ່ງກ່າວ​ມັນລອຍຂຶ້ນ​ມາຈາກ​ໜ້າ​ນ້ຳ, ບັ້ງ​ໄຟ​ພະຍາ​ນາກ​ມັນ​ແຕກ​ຕ່າງ​ກັບ​ບັ້ງ​ໄຟ​ຂອງ​ມະນຸດ​ເຮົາ​​ແນວ​ໃດ ? ​ນັ້ນ​ກໍຄື​ສີ​ຂອງ​ມັນ​ເປັນສີແດງ​ແກ່​ຄ້າຍຄື​ຖ່ານ​ໄຟ​ ຫລື​ ດອກຈານ, ເວລາ​ມັນພົ້ນຂຶ້ນ​ຈາກ​ໜ້າ​ນ້ຳ​ກໍ​ເປັນ​ລູກ​ດຽວ​ບໍ່​ແຕກກະຈັດກະຈາຍ ​ແລະ ຢູ່ໃນແນວ​ຕັ້ງ​ຊື່ ​ເຊິ່ງ​ບໍ່​ກົ່ງ ຫລື ​ໂຄ້ງ​ຄື​ບັ້ງ​ໄຟ​ຂອງ​ມະນຸດ​ເຮົາ​ເຮັດ​. ຈາກ​ນັ້ນມັນ​ກໍ​ມະ​ຫັບ​ມະຫາຍ​ໄປ​ເທິງ​ອາກາດ​ດ້ວຍ​ຄວາມ​ສູງ​ລະຫວ່າງ 50-100 ​ແມັດ. ສິ່ງ​ທີ່​ແຕກຕ່າງ​ອີກ​ອັນ​ໜຶ່ງ​ເວລາ​ມັນ​ຂຶ້ນ​ຈາກ​ໜ້າ​ນ້ຳ​ຈະ​ເປັນ​ລູກ​ໃຜ​ລູກ​ມັນເປັນ​ລູກດຽວ ຫລື ​ສອງ​ສາມ​ລູກ​ຕາມ​ກົ້ນ​ກັນ​ຂຶ້ນ​​ເປັນ​ໄລຍະຫ່າງກັນ​ແມັດ​ສອງ​ແມັດ, ອີກ​ສິ່ງໜຶ່ງທີ່​ຊາວ​ລາວ​ໄດ້​ຂະໜານ​ນາມ​ວ່າ​ເປັນ​ບັ້ງ​ໄຟ​ພະຍາ​ນາກ​ນັ້ນ​ມັນ​ເກີດ​ມີ​ແຕ່​ສະ​ເພາະ​ມື້​ອອກ​ພັນ​ສາ​​ໃນ​ຍາມ​ຊຸ່ມ​ມືດ​ເທົ່າ​ນັ້ນ ​ແລະ ເຫລືອ​ນັ້ນແມ່ນ​ບໍ່​ມີ​ໃຫ້​ເຫັນ.

- lattana 1 - ລູກໄຟລອຍຂຶ້ນຈາກນໍ້າກາຍເປັນຕໍານານບັ້ງໄຟພະຍານາກ

ຊາວບ້ານ​ໂນນ​ຊາຍ​ທ່ານ​ໜຶ່ງ​ອາຍຸ 70 ກວ່າປີ​ໄດ້​ເລົ່າ​ເຖິງ​​ຄວາມ​ເປັນ​ມາ​ຂອງ​ບັ້ງ​ໄຟ​ພະຍາ​ນາກ​ວ່າ: ຕັ້ງ​ແຕ່​ເພິ່ນ​ເກີດ​ມາ​ພໍຮູ້​ຄວາມ​ກໍພົບ​ເຫັນປາກົດການທໍາມະຊາດ​ນີ້, ​ແຕ່​ກ່ອນ​ນັ້ນ​ຍັງ​ບໍ່​ມີ​ໃຜ​ສົນ​ໃຈ​ມີ​ແຕ່​ຄົນ​ໃນ​ທ້ອງ​ຖິ່ນ​ພາກັນ​ມ່ວນ​ຊື່ນ​ຕາມ​ພາສາ​ຄົນ​ຊົນນະບົດ​ບ້ານນອກ​ບ້ານ​ນາ. ຄາວ​ນັ້ນພໍ່​ຕູ້​ຍັງ​ນ້ອຍ​ກັບ​ໝູ່​ເມື່ອ​ເຖິງ​ຍາມ​ຄໍ່າມື້​ອອກ​ພັນ​ສາ​ເຫັນ​ບັ້ງ​ໄຟ​ພະຍາ​ນາກ​ກໍ​ພາກັນຕົບມື ທັງ​ເຄາະ​ກະ​ໂປະ​ກະປ໋ອງຕີ​ຄ້ອງ​ຕີ​ກອງ​ວ່າ​ຂໍ​ໃຫ້​ພະຍາ​ນາກ​ຈູດ​ບັ້ງໄຟຂຶ້ນ​ມາ​ໃຫ້ເຫັນຫລາຍໆ. ຈາກ​ນັ້ນບັ້ງ​ໄຟ​ກໍ​ຈະ​ຫລຸຫລັ່ງ​ທັ່ງ​ເທ​ຂຶ້ນມາ​ເປັນ​ຮ້ອຍ​ເປັນ​ພັນ. ພໍ່​ຕູ້​ຄົນ​ນັ້ນ​​​ເວົ້າ​ຢ້ຳຕື່ມ​ວ່າ:​ ເຫັນ​ພວກ​ເຮົາ​ຕີ​ຄ້ອງ​ຕີ​ກອງເຄາະ​ກະ​ໂປະ​ກະປ໋ອງຮ້ອງ​ໂຮ​ຊົມ​ເຊີຍ​ເທົ່າ​ໃດ​ມັນ​ກໍ​ຍິ່ງ​ຂຶ້ນ​ມາຫລາຍ​ເທົ່າ​ນັ້ນ, ຂໍແຕ່​​ວ່າ​ແຕ່​ບ່ອນ​ໃດ​ມີ​ນ້ຳ​ກໍ​ແມ່ນ​ເຫັນ​ບັ້ງ​ໄຟ​ພະຍາ​ນາກ​ຈູດຂຶ້ນ​ມາ​ເຊັ່ນ: ຢູ່​ນ້ຳຂອງ, ທົ່ງ​ນາ, ຫ້ວຍຮ່ອງ​ຄອງ​ບຶງ​ ແມ່ນແຕ່​ຢູ່ໃນບໍ່​ນ້ຳສ້າງ​ກໍ​ເຫັນ​ຂຶ້ນ​ມາ​ຢ່າງຫລວງຫລາຍ​ພາຍ​ມາກ. “ຕອນ​​ເຮົາ​ຍັງ​ເປັນ​ເດັກ​ນ້ອຍເມື່ອ​ເຖິງ​ເວລາ​ນີ້​ພ້ອມ​ກັບ​ໝູ່​ພາກັນ​ໄປ​ນັ່ງ​ຈຸ້ມ​ອ້ອມ​ຢູ່​ນ້ຳສ້າງ​ແລ້ວ​ກໍ​ພາກັນ​ເຄາະ​ກະ​ໂປະ​ກະປ໋ອງຮ້ອງ​ວ່າ​ຂໍ​ໃຫ້​ພະຍາ​ນາກ​ຈູດ​ບັ້ງ​ໄຟ​ຂຶ້ນ​ມາ​ໃຫ້​ເບິ່ງ​ແດ່ ! ຈາກ​ນັ້ນ​ກໍເຫັນ​ບັ້ງ​ໄຟ​ຂຶ້ນ​ມາ​ຢ່າງ​ບໍ່​ຂາດ​ສາຍ”. ພໍ່​ຕູ້​ຄົນ​ນັ້ນ​ກ່າວ.

ຕົກ​ມາ​ຮອດ​ຍຸກ​ປັດຈຸບັນ, ​ເຫດການ ​ແລະ ​ຕໍານານ​ຂອງ​ບັ້ງ​ໄຟ​ພະຍານາ​ກໄດ້ກາຍ​ເປັນ​ເລື່ອງ​ເດັດ​ຊາລືໄປຢ່າງ​ກວ້າງ​ຂວາງ​ຂອງປວງຊົນ​ລາວ ​ຈົນ​ກາຍ​ເປັນ​ກິດຈະ​ກໍາ​ໜຶ່ງ​ໃນ​ຍາມ​ບຸນ​ອອກ​ພັນ​ສາ, ​ເຖິງ​ວ່າ​ມີຄົນ​ຈໍານວນ​ໜຶ່ງ​ວິພາກວິຈານ​ວ່າ​ມີ​ຄົນ​ຈັງ​ໄຮ​ອຸປະ​ໂຫລ​ກມຸດ​ນ້ຳ​ລົງ​ໄປ​ຈູດ​ເຮັດ​ຕັ້ງ​ແກ້ງ​ໃຫ້​ຄົນ​ເຫີ່​ໄປ​ເບິ່ງ ວ່າ​ຊັ້ນ ! ​ຫາງ​ສຽງ​ຈະ​ເວົ້າ​ໃສ່​ຮ້າຍ​ແນວ​ໃດ​ກໍຕາມ ​ຄວາມ​ຈິງ​ມັນ​ກໍ​ຍ່ອມ​ພິສູດ​ດ້ວຍ​ຄວາມ​ຈິງ, ຕາມ​ທິດ​ກໍ່​າຄິດ ຖ້າ​ຫາກ​ເຮົາ​ຮູ້​ນໍາ​ໃຊ້​ກາລະ​ໂອກາດ​ເອົາ​ສິ່ງ​ທີ່​ລຶກລັບ​ຈາກ​ທໍາ​ມະ​ຊາດ​ມາສູ່​ຈິດຕະສາດ​ຂອງ​ຜູ້​ຄົນ​ທີ່​ມີ​ຄວາມ​ເຊື່ອ​ຄິດ​ວ່າ​ເມືອງ​ປາກງື່ມ ​ແລະ ​ຢູ່​ບ່ອນ​ອື່ນ​ຕ້ອງ​ໄດ້​ເງິນ​ເປັນ​ກອບ​ເປັນ​ກໍາ.

error: Content is protected !!