ສປປ ລາວ ຮ່ວມກັບສາກົນ ຍົກສູງສ້າງວິໄສທັດຂອງເດັກຍິງເພື່ອອະນາຄົດ

ວັນທີ 15 ຕຸລາ 2024, ກະຊວງສຶກສາທິການ ແລະ ກິລາ ຮ່ວມກັບອົງການສະຫະປະຊາຊາດກອງທຶນສຳລັບປະຊາກອນ (UNFPA) ຈັດງານສະຫລອງວັນເດັກຍິງສາກົນ ແລະ ວັນຄົບຮອບ 8 ປີ ແຜນງານນາງນ້ອຍ ໃນຫົວຂໍ້: “ວິໄສທັດຂອງເດັກຍິງເພື່ອອະນາຄົດ”, ມີທ່ານ ກິ່ງມະໂນ ພົມມະຫາໄຊ ຮອງລັດຖະມົນຕີ ກະຊວງສຶກສາທິການ ແລະ ກິລາ, ທ່ານ ດຣ. ບາກຕິຢໍ ກາດີເຣີບຜູ້ຕາງໜ້າ UNFPA ປະຈຳ ສປປ ລາວ ພ້ອມພາກສ່ວນກ່ຽວຂ້ອງເຂົ້າຮ່ວມ.

ທ່ານ ຮອງລັດຖະມົນຕີ ກະຊວງສຶກສາທິການ ແລະ ກິລາ ກ່າວວ່າ: ແມ່ຍິງໃນຊຸມຊົນມີຄວາມດ້ອຍໂອກາດຫລາຍກວ່າຜູ້ຊາຍ, ພວກເຮົາ ກໍຮູ້ວ່າການສະໜັບສະໜູນລວມທັງເດັກຊາຍ, ຜູ້ທີ່ມີຄວາມພິການ ແລະ ກຸ່ມອື່ນໆທີ່ມີຄວາມສ່ຽງ, ສະນັ້ນ ຕ້ອງມີນະໂຍບາຍ ແລະ ມີແຜນງານທີ່ຊັດເຈນ ເພື່ອຊ່ວຍເຫລືອເຂົາເຈົ້າໃຫ້ໄດ້ຮັບໂອກາດໃນການມີສ່ວນຮ່ວມ, ການຕັດສິນໃຈໃນຂັ້ນນະໂຍບາຍ ຫລື ມີສ່ວນຮ່ວມໃນການຈັດຕັ້ງປະຕິບັດແຜນງານ. ດັ່ງນັ້ນ, ຕ້ອງຮ່ວມກັນເພື່ອສະໜັບສະໜູນ ແລະ ສ້າງຄວາມເຂັ້ມແຂງໃຫ້ເຂົາເຈົ້າ ມີສຸຂະພາບທີ່ດີ, ໄດ້ຮັບການສຶກສາ, ມີວຽກເຮັດງານທໍາ, ໄດ້ຮັບການປົກປ້ອງທາງສັງຄົມ ແລະ ມີສ່ວນຮ່ວມ ເພື່ອບັນລຸຄວາມຝັນຂອງເຂົາເຈົ້າ.”

ປັດຈຸບັນ ສປປ ລາວ ປະເຊີນກັບອັດຕາການຖືພາໃນໄວໜຸ່ມສູງທີ່ສຸດໃນພາກພື້ນ, ໂດຍອັດຕາການເກີດລູກຂອງໄວໜຸ່ມເພີ່ມຂຶ້ນຈາກ 83 ຄົນ/1,000 ຄົນ ໃນປີ 2017 ເພີ່ມຂື້ນເປັນ 89 ຄົນ/1,000 ຄົນປີ 2023. ນອກນັ້ນ, ອັດຕາສ່ວນຂອງເດັກຍິງອາຍຸ 15-19 ປີ ທີ່ແຕ່ງງານແລ້ວ ຫລື ຢູ່ນຳກັນໂດຍບໍ່ໄດ້ແຕ່ງງານ ເພີ່ມຂຶ້ນຈາກ 23,5% ໃນປີ 2017 ເປັນ 26,5% ໃນປີ 2023. ປີ 2016 ສປປ ລາວ ໄດ້ເປີດແຜນງານ ນາງ ນ້ອຍ ແລະ ສ້າງໃຫ້ເປັນຕົວແທນຂອງເດັກຍິງໄວໜຸ່ມທັງໝົດ (700,000 ກວ່າຄົນ) ໃນທົ່ວປະເທດ; ໄດ້ຮັບຮອງເອົາ ເພື່ອແກ້ໄຂບັນຫາສຳຄັນຕ່າງໆເຊັ່ນ: ການຂາດສານອາຫານ, ການສຶກສາ, ຄວາມບໍ່ສະເໝີພາບ ລະຫວ່າງ ຍິງ-ຊາຍ, ສຸຂະພາບ ແລະ ສະຫວັດດີການໂດຍລວມ, ຄຽງຄູ່ກັບການມຸ່ງໝັ້ນສູ່ເປົ້າໝາຍການພັດທະນາແບບຍືນຍົງ (SDGs) ແລະ ປູກຝັງຈິດສຳນຶກ ບໍ່ປ່ອຍປະຜູ້ໃດໄວ້ເບື້ອງຫລັງ.

ການຈັດງານສະຫລອງວັນ ນາງ ນ້ອຍ ຄົບຮອບ 18 ປີ ແລະ ວັນເດັກຍິງສາກົນ 11ຕຸລາ ເປັນການສະຫລອງຄວາມຄືບໜ້າກ່ຽວກັບ ໂຄງການໄວໜຸ່ມ ແລະ ການສ້າງຄູ່ຮ່ວມງານ ແລະ ເສີມຂະຫຍາຍຄຳໝັ້ນສັນຍາໃນການຊຸກຍູ້ສ້າງຄວາມເຂັ້ມແຂງໃຫ້ແກ່ໄວໜຸ່ມຍິງ ແລະ ຊາຍ ໃຫ້ບັນລຸເປົ້າໝາຍທີ່ໄດ້ລະບຸໄວ້ໃນແຜນງານປີ 2030 ໃນການເຊື່ອມສານເພດສຶກສາແບບຄົບຊຸດ, ການປັບປຸງການເຂົ້າເຖິງຂໍ້ມູນ ແລະ ການບໍລິການດ້ານສຸຂະພາບທາງເພດ ແລະ ການຊ່ວຍເຫລືອດ້ານສຸຂະພາບຈິດ ສໍາລັບຜູ້ລອດຊີວິດຈາກຄວາມຮຸນແຮງທາງເພດ.