ໂຄງການກໍ່ສ້າງທາງປູຢາງ2 ຊັ້ນ ເມືອງປາກທາ-ຜາອຸດົມ ແຂວງບໍ່ແກ້ວ ຄືບໜ້າ 26.24% ຫລຸດແຜນ 14.83%

ວັນທີ 18 ທັນວາ 2024 ນີ້ ທ່ານ ລີນຕາ ຂັດທິຍະ ຮອງລັດຖະມົນຕີ ກະຊວງໂຍທາທິການ ແລະ ຂົນສົ່ງ ພ້ອມຄະນະ ສະເພາະກິດ ໄດ້ລົງຊຸກຍູ້ ແລະ ປືກສາຫາລືກຳນົດທິດທາງວິທີການຈັດຕັ້ງປະຕິ ບັດໂຄງການກໍ່ສ້າງເສັ້ນທາງປູຢາງ 2 ຊັ້ນ ແຕ່ເມືອງປາກທາ ຫາ ເມືອງຜາອຸດົມ ແຂວງບໍ່ແກ້ວ.

ໂຄງການກໍ່ສ້າງທາງປູຢາງ 2 ຊັ້ນ ແຕ່ເມືອງປາກທາ ຫາ ເມືອງຜາອຸດົມ ທີ່ມີຄວາມຍາວ 30 ກິໂລ ແມັດກວ່າ ໃນປີ 2019 ມີການດັດປັບທາງດ້ານເຕັກນິກຈາກຄວາມກວ້າງ 9 ແມັດ ເປັນ 8 ແມັດ ແລະ ຈາກ 8 ແມັດມາເປັນ 7 ແມັດ ເຮັດໃຫ້ມູນຄ່າກໍ່ສ້າງບ້ວງກະຊວງຮັບຜິດຊອບ 80% ຫລຸດລົງຈາກມູນຄ່າ 192,163,604,442 ກີບ ມາເປັນ 187,879,332,442 ກີບ (ຫລຸດລົງ 4.2 ຕື້ກີບ ) ແລະ ໃນໄລຍະເວລາດັ່ງກ່າວການກໍ່ສ້າງໄດ້ຢຸດຕິຊົ່ວຄາວ ເພື່ອປັບປຸງໂຄງສ້າງຕ່າງໆ ຈົນເຖິງປີ 2021 ໄດ້ປະຕິບັດສັນຍາໃໝ່ ດ້ານເຕັກນິກຄວາມກວ້າງ 8 ແມັດ ແລະ ນອກເທສະບານ 7 ແມັດ ໄດ້ເຊັນສັນຍານໍາບໍລິສັດ ຜູ້ຮັບເໝົາ ມູນຄ່າ 113.13 ຕື້ກີບ, ໃນໄລຍະການກໍ່ສ້າງ 24 ເດືອນ ແລະ ລັດວິສາຫະກິດວິສະວະກຳ ຄົມມະນາຄົມເປັນທີປືກສາ

ຄວາມຄືບໜ້າຂອງວຽກມາຮອດປັດຈຸບັນປະຕິບັດໄດ້ 26.24% ຕາມແຜນແມ່ນ 41.08% ຫລຸດແຜນການ 14.83% ລວມມູນຄ່າປະຕິບັດໄດ້ 29.69 ຕື້ກີບ, ການເບີກຈ່າຍຕາມເງື່ອນໄຂແມ່ນການຊຳລະແມ່ນ 7 ປີ ສະເລ່ຍປີລະ 16.16 ຕື້ກີບ. ພ້ອມນີ້ ແຕ່ລະຂົງເຂດຂັ້ນກະຊວງ ຂັ້ນແຂວງ ແລະເມືອງໄດ້ປະກອບຄໍາເຫັນຫຼາຍດ້ານຕໍ່ການກໍ່ສ້າງເສັ້ນທາງ ເປັນຕົ້ນ: ດ້ານງົບປະມານ, ການປັບປຸງໂຄງລ່າງເສັ້ນທາງລະຫວ່າງເມືອງ ຫາ ບ້ານ, ບ້ານ ຕໍ່ ບ້ານ ແລະບັນຫາອື່ນໆ ເພື່ອເປັນທິດທາງແກ້ໄຂໃນຕໍ່ໜ້າ.

ທີ່ມາ: ໜັງສືພິມບໍ່ແກ້ວ