ສະຫະລັດກຽມປິດສະຖານທູດ ແລະ ກົງສຸນ ເກືອບ 30 ແຫ່ງທົ່ວໂລກ ເພື່ອຫລຸດງົບປະມານ ແລະ ປັບໂຄງສ້າງນະໂຍບາຍຕ່າງປະເທດ
ສໍານັກຂ່າວ CNN ຕ່າງປະເທດລາຍງານ ວັນທີ 15 ເມສາ 2025 ວ່າ: ລັດຖະບານສະຫະລັດອາເມລິກາ ພາຍໃຕ້ການນໍາຂອງປະທານາທິບໍດີ ໂດນັລ ທຣໍາ ໄດ້ເປີດເຜີຍເອກະສານ ກ່ຽວກັບແຜນການທີ່ກໍາລັງພິຈາລະນາປິດສະຖານທູດ ແລະ ກົງສຸນ ໃນທົ່ວໂລກເກືອບ 30 ແຫ່ງ ໂດຍມີເປົ້າໝາຍເພື່ອຫລຸດງົບປະມານຂອງລັດ.
ໃນລາຍລະອຽດຂອງເອກະສານດັ່ງກ່າວ ພົບຄໍາແນະນໍາໃຫປິດສະຖານທູດ 10 ແຫ່ງ ແລະ ສານຖານກົງສຸນອີກ 17 ແຫ່ງ ເຊິ່ງສ່ວນໃຫຍ່ລ້ວນແຕ່ເປັນໜ່ວຍງານທີ່ຢູ່ໃນເອີຣົບ, ອາຟຣິກາ ລວມທັງອາຊີ ແລະ ຄາຣິບຽນ, ເຊິ່ງປະເທດທີ່ອາດຈະໄດ້ຮັບຜົນກະທົບມີ ມອລຕາ, ລັກເຊມເບີກ, ເລໂຊໂທ ແລະ ຊູດານໃຕ້, ນອກຈາກນັ້ນຍັງມີກົງສຸນໃນ ຝຣັ່ງ 5 ແຫ່ງ, ເຢຍລະມັນ 2 ແຫ່ງ, ບອສເນຍ ແລະ ເຮີເຊໂກວີນາ 2 ແຫ່ງ, ອັງກິດ 1 ແຫ່ງ, ອາຟຣິກາໃຕ້ 1 ແຫ່ງ ແລະ ເກົາຫລີໃຕ້ 1 ແຫ່ງ.
ເຊິ່ງແຜນການນີ້ເປັນສ່ວນໜຶ່ງໃນການຫລຸດງົບປະມານຂອງລັດຖະບານກາງ ແລະ ປັບປຸງນະໂຍບາຍຕ່າງປະເທດຂອງ ສ.ອາເມລິກາ. ແນວໃດກໍຕາມ ແຜນການນີ້ຍັງຢູ່ໃນຂັ້ນຕອນການພິຈາລະນາ ແລະ ຍັງບໍ່ມີການຢືນຢັນຢ່າງເປັນທາງການຈາກທໍານຽບຂາວ ຫລື ກະຊວງການຕ່າງປະເທດຂອງສະຫະລັດ.
ທາງດ້ານ ໂຄສົກກະຊວງການຕ່າງປະເທດອອກມາລະບຸວ່າ ເອກະສານທີ່ຮົ່ວໄຫລ ອາດບໍ່ຈະຍັງບໍ່ຊັດເຈນ ແລະ ແນະນໍາໃຫ່ສື່ມວນຊົນກວດສອບຂໍ້ເທັດຈິງກັບທໍານຽບຂາວໂດຍກົງ.
