ອຸຕຸເຕືອນຈະມີຝົນຕົກ ແລະ ລົມແຮງອີກຫລາຍວັນ

ກົມອຸຕຸນິຍົມ ແລະ ອຸທົກກະສາດ, ໄດ້ເຕືອນໃຫ້ປະຊາຊົນໃນຂອບເຂດທົ່ວປະເທດ ມີສະຕິ​ກຽມພ້ອມ​ຮັບ​ມື​ກັບ​ສະພາບ​ອາກາດ​ມີ​ການ​ປ່ຽນ​ແປງ​ໃນ​ໄລຍະ​​ຕໍ່ໜ້ານີ້ຄື: ວັນ​ທີ 1-3 ມິຖຸນານີ້ ຄວາມ​ກົດ​ດັນ​ອາກາດ​ຕໍ່າ​ຂອງ​ອາກາດ​ຮ້ອນ​ຈະ​ມີ​ກຳລັງ​ອ່ອນ​ຫາ​ປານ​ກາງ​ປົກ​ຄຸມ​ຢູ່​ທົ່ວ​ທຸກ​ພາກ​ຂອງ​ປະ​ເທດ ສົມ​ທົບ​ກັບ​ມໍ​ລະ​ສຸມ​ຕາ​ເວັນ​ຕົກ-ຕາ​ເວັນ​ຕົກ​ສຽງ​ໃຕ້​ພັດ​ປົກ​ຄຸມ​ເປັນ​ສ່ວນ​ໃຫຍ່, ​ເຊິ່ງຈະ​ເຮັດ​ໃຫ້​ອາກາດ​ຮ້ອນຂຶ້ນ​ຕື່ມ​ອີກ, ພ້ອມ​ມີ​ຝົນຕົກ​ໃນ​ລະດັບ​ຄ່ອຍ​ຢູ່​ທົ່ວທຸກພາກ​​ແລະ ຕົກ​ໜັກ​ຢູ່​ບາງ​ທ້ອງ​ຖິ່ນ, ພ້ອມ​ມີ​ຟ້າ​ເຫລື້ອມ ​ແລະ ​ລົມ​ພັດ​ແຮງ​. ດັ່ງນັ້ນ ຈຶ່ງ​ເຕືອນ​ໃຫ້​ປະຊາຊົນ​ບັນດາ​ເຜົ່າ ​ແລະ ອຳນາດ​ການ​ປົກຄອງ​ ​ຈົ່ງ​ມີ​ສະຕິ​ກຽມພ້ອມ​ຮັບ​ມື​ກັບ​ສະພາບ​ອາກາດ​ມີ​ການ​ປ່ຽນ​ແປງ​ນີ້, ພ້ອມ​​ໃຫ້ກວດກາສະພາບ ເຮືອນຊານບ້ານຊ່ອງຂອງຕົນເອງໃຫ້ຮັບປະກັນຄວາມແໜ້ນໜາ, ລວມທັງສັດ​ລ້ຽງຕ່າງໆຕ້ອງນໍາໄປໄວ້ບ່ອນປອດໄພ ແລະ ໃຫ້ຕິດຕາມ​ການ​ລາຍ​ງານ​ຂ່າວ​ສະພາບອາກາດຢ່າງໃກ້ຊິດ.

ສໍາລັບສະພາບອາກາດແຕ່ວັນທີ 30 ພຶດສະພາຫາ 1 ມິຖຸນານີ້, ພາກ​ເໜືອ​ດ້ານ​ຕາ​ເວັນ​ອອກ: ຈະມີ​ເຝື້ອປົກ​ຄຸມ​ເປັນ​ສ່ວນ​ຫລາຍ, ​ມີ​ຝົນຕົກຟ້າ​ເຫລື້ອມ ​ແລະ ​ລົມ​ພັດ​ແຮງ​ຢູ່​ບ້າງ​ທ້ອງ​ຖິ່ນ. ​ແຂວງ​ຜົ້ງສາລີ, ຫົວພັນ ​ແລະ ຊຽງ​ຂວາງ ອຸນຫະພູມ​ຕໍ່າ​ສຸດ 17-19 ອົງສາ ​ແລະ ສູງ​ສຸດ 28-31 ອົງສາ. ພາກ​ເໜືອ​ດ້ານ​ຕາ​ເວັນ​ຕົກ: ​ ​ຈະ​ມີ​ຝົນຕົກ​ຟ້າ​ເຫລື້ອມ​​​ເປັນ​ບໍລິ​ເວນ​ກວ້າງ ​ແລະ ​ມີ​ລົມ​ພັດ​ແຮງ​ເປັນ​ບາງ​ໂອກາດ​ຢູ່​ບ້າງ​ທ້ອງ​ຖິ່ນ, ​ແຂວງ​ຫລວງ​ນ້ຳທາ, ຫລວງ​ພະ​ບາງ ​ແລະ ​ໄຊຍະ​ບູລີ ອຸນຫະພູມ​ຕໍ່າ​ສຸດ 21-23 ອົງສາ ​ແລະ ສູງ​ສຸດ 33-35 ອົງສາ. ພາກ​ກາງ: ອາກາດ​​ຈະ​ຮ້ອນ​ຢູ່​ທົ່ວ​ໄປ ​ແລະ ມີ​ເຝື້ອປົກ​ຄຸມ​ເປັນ​ສ່ວນ​ຫລາຍ, ພ້ອມ​ມີ​ຝົນຕົກ​ໃນ​ລະດັບ​ຄ່ອຍ​ເປັນ​ບໍລິ​ເວນ​ກວ້າງ, ​ມີຟ້າ​ເຫລື້ອມ ​ແລະ ​ລົມ​ພັດ​ແຮງ​ຢູ່​ບາງ​ທ້ອງ​ຖິ່ນ, ​ແຂວງ​ວຽງ​ຈັນ, ບໍລິ​ຄຳ​ໄຊ, ຄຳ​ມ່ວນ ​ແລະ ສະຫວັນ​ນະ​ເຂດ ອຸນຫະພູມ​ຕໍ່າ​ສຸດ 22-23 ອົງສາ ​ແລະ ສູງ​ສຸດ 32-34 ອົງສາ , ​ແຂວງ​ໄຊ​ສົມບູນ: ອາກາດ​ເຢັນ​ໃນ​ຕອນ​ກາງຄືນ​ຫາ​ຕອນ​ເຊົ້າ ​ແລະ ​ມີ​ຝົນຕົກ​ຟ້າ​ເຫລື້ອມ​, ພ້ອມ​ມີ​ລົມ​ພັດ​ແຮງ​ເປັນ​ບາງ​ໂອກາດ​ ອຸນຫະພູມ​ຕໍ່າ​ສຸດ 16-18 ອົງສາ ​ແລະ ສູງ​ສຸດ 26-28 ອົງສາ. ພາກ​ໃຕ້: ​ອາກາດ​ຈະ​ຮ້ອນ​ຢູ່​ທົ່ວ​ໄປ ​ແລະ ​ຝົນຕົກ​ຟ້າເຫລື້ອມ​ ພ້ອມ​ມີ​ລົມ​ພັດ​ແຮງ​ຢູ່​ບາງທ້ອງ​ຖິ່ນ​ແຂວງ​ສາລະ​ວັນ, ຈຳປາ​ສັກ, ​ເຊ​ກອງ ​ແລະ ອັດ​ຕະປື ອຸນຫະພູມ​ຕໍ່າ​ສຸດ 23-25 ອົງສາ ​ແລະ ສູງ​ສຸດ 33-35 ອົງສາ. ສະ​ເພາະ​ເຂດ​ພູ​ພຽງ​ບໍລະ​ເວນ: ອາກາດ​​ຈະ​ເຢັນ​ຫາ​ໜາວ​ເຢັນ ​ແລະ ​ມີ​ຝົນຕົກ​ຟ້າ​ເຫລື້ອມ​​ໃນ​ລະດັບ​ຄ່ອຍ ພ້ອມ​ມີ​ລົມ​ພັດ​ແຮງ ອຸນຫະພູມ​ຕໍ່າ​ສຸດ 13-15 ອົງສາ ​ແລະ ສູງ​ສຸດ 25-27 ອົງສາ. ສໍາລັບ ນະຄອນຫລວງ​ວຽງ​ຈັນ: ອາກາດ​ຈະ​ຮ້ອນ, ມີ​ເຝື້ອຂະຫຍາຍຕົວ​ໃນ​ຕອນ​ບ່າຍ​ຫາ​ຄໍ່າ ​ແລະ ຈະ​ມີ​ຝົນຕົກ​ຟ້າ​ເຫລື້ອມ​ໃນ​ລະດັບ​ຄ່ອຍ​ເປັນ​ບໍລິ​ເວນ​ກວ້າງ ​ແລະ ມີ​ລົມ​ພັດ​ແຮງ​ເປັນ​ບາງ​ໂອກາດ​ ອຸນຫະພູມ​ຕໍ່າ​ສຸດ 22-24 ອົງສາ ​ແລະ ສູງ​ສຸດ 33-35 ອົງສາ.