ກອງກຳລັງກຳປູເຈຍກຽມພ້ອມຮັບມື ເຫດວຸ້ນວາຍກ່ອນການເລືອກຕັ້ງ
ກອງກຳລັງກຳປູເຈຍກຽມຄວາມພ້ອມກ່ອນການເລືອກຕັ້ງທົ່ວໄປໃນທ້າຍອາທິດນີ້ ເຊິ່ງຄາດກັນວ່າ: ນາຍົກລັດຖະມົນຕີ ຮຸນເຊນ ຈະໄດ້ຮັບໄຊຊະນະ.
ກອງກຳລັງຕຳຫລວດກຳປູເຈຍ 4.625 ຄົນໃນຊຸດເສື້ອເກາະກັນກະສຸນ ແລະ ອາວຸດປືນລວມພົນທີ່ສະໜາມກິລາໂອແລມປິກໃນນະຄອນຫລວງພະນົມເປັນ ວັນທີ 25 ກໍລະກົດນີ້ ເພື່ອກຽມສະກັດກັ້ນການຊຸມນຸມປະທ້ວງໃນລະຫວ່າງການເລືອກຕັ້ງ. ຜູ້ບັນຊາການຕຳຫລວດນະຄອນຫລວງພະນົມເປັນ ກ່າວວ່າ: ຈະວາງກຳລັງຮັກສາຄວາມປອດໄພທົ່ວນະຄອນຫລວງພະນົມເປັນໃນວັນທີ 29 ກໍລະກົດນີ້. ກອງກຳລັງທຸກຄົນມີໜ້າທີ່ໃນການສະກັດກັ້ນ ແລະ ປາບປາມຄວາມພະຍາຍາມໃນການຂັດຂວາງການເລືອກຕັ້ງ. ທາງການກຳປູເຈຍລະບຸວ່າ: ການຮຽກຮ້ອງໃຫ້ຂວ້ຳບາດການເລືອກຕັ້ງເປັນການກະທຳທີ່ຜິດກົດໝາຍ. ຂະນະທີ່ກຸ່ມຮັກສາສິດຂັດແຍ່ງວ່າ: ບໍ່ຂັດຕໍ່ກົດໝາຍແຕ່ຢ່າງໃດ.
ສະຫະປະຊາຊາດ ແລະ ປະເທດຕາເວັນຕົກຕ່າງວິພາກວິຈານການເລືອກຕັ້ງໃນວັນທີ 29 ກໍລະກົດນີ້ວ່າ: ມີຂໍ້ບົກຜ່ອງ ເນື່ອງຈາກສານສູງສຸດກຳປູເຈຍສັ່ງຍຸບພັກກູ້ຊາດກຳປູເຈຍ ຫລື CNRP ເຊິ່ງເປັນພັກຝ່າຍຄ້ານ ແລະ ຄວບຄຸມຕົວທ່ານ ກິມ ຊົກຄາ ແກນນຳຂໍ້ຫາກະບົດ.
