ປີທ່ອງທ່ຽວລາວ-ຈີນ ຍັງໜັກໃຈນຳສິ່ງທ້າທາຍບາງຢ່າງ
ໂດຍ: ທິດກ່ຳ
ພໍກ້າວເຂົ້າປີ 2019 ຍ່າງ ມາຮອດເດືອນກຸມພາ ກໍຖືວ່າ ໝົດໄປແລ້ວສອງເດືອນ, ຈາກນັ້ນຈະຍັງອີກ 10 ເດືອນກໍ ຈະໝົດປີ, ໝົດເດືອນມີນາ, ເມສາ ກໍກ້າວເຂົ້າຍາມຝົນ, ໝົດຍາມຝົນຕໍ່ໃສ່ທ້າຍເດືອນຕຸລາ, ພະຈິກຈຶ່ງຈະຮອດ ຍາມແລ້ງ. ໄລຍະນັ້ນເປັນບຸນ ອອກພັນສາແລ້ວກໍຕໍ່ໃສ່ບຸນ ທາດຫລວງ ພໍດີຕົກໃສ່ເດືອນ ທັນວາກໍຈະໝົດປີ 2019 ຕາມກົດເກນວັດຕະຈັກ.
ສະນັ້ນ, ເຮົາເຫັນວ່າໂອກາດການເຄື່ອນໄຫວກິດຈະກຳປີທ່ອງທ່ຽວລາວ-ຈີນ ໄລຍະສະດວກສະບາຍທີ່ ສຸດກໍຈະມີແຕ່ໄລຍະຍາມແລ້ງເປັນຕົ້ນແມ່ນເດືອນມີນາ, ເມສາ, ຕຸລາ, ພະຈິກ ແລະ ທັນວາ, ຄາດວ່າພິທີປິດປີ ທ່ອງທ່ຽວລາວ-ຈີນ 2019 ກໍຈະໄປເຮັດພິທີຢູ່ປັກກິ່ງນະ ຄອນຫລວງຂອງ ສປ ຈີນ.
ໃນການປິດປີທ່ອງທ່ຽວນີ້, ຕາມແຜນກໍຈະຖືເອົາໄລຍະວັນຊາດຂອງລາວເຮົາ ຫລື ວ່າວັນສຳຄັນອື່ນໆ ທາງປະຫວັດສາດຂອງສອງປະເທດ. ເພາະສະນັ້ນ, ຕາມເຮົາວ່າ ໃນໄລຍະເວລານາທີທອງນີ້ ກໍຈະເປັນກາລະໂອກາດທີ່ ພວກ ເຮົາຕ້ອງໄດ້ສຸມໃສ່ເພີ່ມທະວີຄວາມຮັບຜິດຊອບເພື່ອເຮັດໃຫ້ປີທ່ອງທ່ຽວລາວ-ຈີນ ເປັນ ໄປຕາມຄວາມຫວັງ ແລະ ມີ ບັນຍາກາດເບີກບານມ່ວນຊື່ນ, ສ່ວນວ່າກິດຈະກຳທີ່ຈະມາເຖິງໃນມໍ່ໆນີ້ກໍແມ່ນບຸນ ປີໃໝ່ລາວ, ເຊິ່ງເປັນງານ ທາງຮີດຄອງປະເພນີອັນ ດີງາມຂອງຊາດ, ເອກອ້າງ ດ້ວຍວັດທະນະທຳທີ່ເຕັມໄປດ້ວຍຫລາກຫລາຍສີສັນ ທີ່ຈະດຶງດູດນັກທ່ອງທ່ຽວຈີນກໍຄືຊາວໂລກໄດ້ເຂົ້າມາສຳພັດ ແລະ ຮ່ວມມ່ວນຊື່ນງານປະເພນີຫລີ້ນບຸນປີໃໝ່ລາວ ແລະ ນອກຈາກນັ້ນ ເຮົາກໍເຫັນວ່າຜ່ານການຈັດຕັ້ງປະຕິບັດໃນໂຄງການຕ່າງໆ.
ໃນໂອກາດປີທ່ອງທ່ຽວ ລາວ 2018, ພວກເຮົາກໍສາ ມາດຖອດຖອນໄດ້ບົດຮຽນ ແລະ ເຫັນໄດ້ປັດໄຈຫລາຍ ຢ່າງ ທີ່ເຮັດໃຫ້ປີທ່ອງທ່ຽວ ລາວບໍ່ໄປເຖິງເປົ້າ, ແນວໃດ ກໍຕາມ, ຊາໃຈທິດກ່ຳຄິດໃນ ໂອກາດປີທ່ອງທ່ຽວລາວ- ຈີນນີ້ ເຮົາຍັງໜັກໃຈນຳສິ່ງ ທ້າທາຍບາງຢ່າງທີ່ຈະມາ ກະທົບເປັນຕົ້ນ: ອັນທີໜຶ່ງ ແມ່ນ: ເວົ້າເລື່ອງການໄປມາ ຕ້ອງສະດວກສະບາຍໂລງ ລ່ຽນ ໄປບໍ່ຄາມາບໍ່ຂ້ອງ, ເຊິ່ງ ຂອດຕັດສິນແມ່ນເລື່ອງເສັ້ນທາງ. ຕາມທິດກ່ຳໄດ້ຮູ້ ແລະ ໄດ້ເຫັນມາຮອດປັດຈຸບັນນີ້, ເສັ້ນທາງສຳຄັນຫລາຍເສັ້ນ ໃນທົ່ວປະເທດໄດ້ຮັບການບູ ລະນະສ້ອມແປງ, ເສັ້ນທາງ ຫລັກໆກໍແມ່ນທາງ 13 ເໜືອ ແລະ ໃຕ້, ຈາກນັ້ນ, ກໍແຍກ ໃສ່ຫລາຍແຂວງຫລາຍ ເມືອງຈົນໄປຮອດແຫລ່ງ ທ່ອງທ່ຽວແຕ່ລະບ່ອນໃນ ທົ່ວປະເທດ.
ບັນຫາອັນທີສອງ: ກໍ ແມ່ນໃນເລື່ອງຂອງການຮັກສາຄວາມສະຫງົບປອດໄພ, ມາຮອດໄລຍະນີ້ ເບິ່ງຄືວ່າ ສິ່ງຫຍໍ້ທໍ້ໄດ້ປະກົດຕົວຢູ່ບ້ານເຮົາມັນນັບມື້ກຳເລີບເຕີບສານ, ບໍ່ວ່າການປຸ້ນຈີ້, ການຍິງກັນຂ້າກັນຕາຍ, ອຸປະຕິເຫດຕາມຖະໜົນ, ດື່ມ ເຫລົ້າເມົາແລ້ວຂັບຂີ່ລົດນັບທັງການວັດແທກເບິ່ງຂະບວນການ 6 ສໍ ກໍຄືວ່າເປັນສີອືດໆ ບໍ່ທັນສ່ອງແສງເປັນຕົນເປັນໂຕຢ່າງຈະແຈ້ງເຊັ່ນ: ສ.ສະອາດ, ສ.ສະຫວ່າງ, ສ.ສີວິໄລ, ສ.ສີຂຽວ, ສ.ສະຫງົບ ແລະ ອື່ນໆ ກໍຍັງບໍ່ທັນໄດ້ເຕັມຮ້ອຍ. ສ່ວນວ່າອັນທີສາມ: ກ່ຽວກັບການຄຸ້ມຄອງການບໍລິການນັບທັງການຈຳໜ່າຍສິນຄ້າສ່ວນຫລາຍ ຢູ່ບ້ານເຮົາມັກມີປະກົດການ ປາກໃຫຍ່ກວ່າທ້ອງຢາກໄດ້ມື້ໜຶ່ງຍາມດຽວສວຍໂອກາດ ຂຶ້ນລາຄາສິນຄ້າແທນທີ່ ການບໍລິການ ຫລື ສິນຄ້າທີ່ ເຮົາເອົາໄປຈຳໜ່າຍນັ້ນຍັງ ບໍ່ທັນໄດ້ມາດຕະຖານໃນ ຫລາຍຢ່າງ, ຊ້ຳບໍ່ໜຳການບໍ ລິການຊັກຊ້າຖ້າທຽບໃສ່ ເພື່ອນມິດ ແລະ ສາກົນ.
ເຖິງຢ່າງໃດກໍດີ, ຕາມເຮົາວ່າໃນໂອກາດປີທ່ອງທ່ຽວລາວ-ຈີນນີ້, ຄາດຫວັງວ່າເປົ້າໝາຍທີ່ພວກເຮົາຄາດກະໄວ້ນັ້ນມັນຈະເປັນໄປຕາມເປົ້າ ແລະ ສິ່ງທ້າທາຍຕ່າງໆ ທີ່ຍັງຄ້າງຄາເກາະຫ້ອຍຕ່າງໆນຳພວກນັ້ນຈະຫລຸດໜ້ອຍຖອຍລົງ ແລະ ດີຂຶ້ນເທື່ອລະກ້າວ.
