ມົນລະພິດທາງອາກາດຂ້າຊີວິດ ປະຊາຊົນຫລາຍກວ່າຄວັນຢາສູບ
ນັກວິໄຈຢູ່ເຢຍລະມັນ ແລະ ໄຊປຣັດ ລະບຸໃນລາຍງານທີ່ມີການເຜີຍແຜ່ໃນວັນທີ 12 ມີນາວ່າ: ມົນລະພິດໃນອາກາດ ເຮັດໃຫ້ປະຊາຊົນເສຍຊີວິດໃນແຕ່ລະປີຫລາຍກວ່າຈຳນວນຂອງຜູ້ເສຍຊີວິດຈາກການສູບຢາ.
ລາຍງານການສຶກສາຂອງນັກວິໄຈຕີລາຄາວ່າ: ມົນລະພິດທາງອາກາດເຮັດໃຫ້ມີຜູ້ເສຍຊີວິດ 8,8 ລ້ານຄົນໃນປີ 2015 ເຊິ່ງເປັນຕົວເລກເກືອບສອງເທົ່າຂອງຕົວເລກທີ່ມີການຕີລາຄາໄວ້ກ່ອນໜ້ານີ້ 4,5 ລ້ານຄົນ. ຂະນະທີ່ ອົງການອະນາໄມໂລກ (WHO) ຕີລາຄາໄວ້ວ່າ: ທົ່ວໂລກຈະມີຜູ້ເສຍຊີວິດຈາກການສູບຢາປະມານປີລະ 7 ລ້ານຄົນ. ຄະນະນັກວິໄຈພົບວ່າ: ຢູ່ເອີຣົບ ມົນລະພິດໃນອາກາດເຮັດໃຫ້ມີຜູ້ເສຍຊີວິດປະມານ 790.000 ຄົນ ໃນຈຳນວນນີ້ 40-80% ເສຍຊີວິດຈາກພະຍາດທີ່ກ່ຽວກັບຫລອດເລືອດ ແລະ ຫົວໃຈເຊັ່ນ: ຫົວໃຈວາຍ ແລະ ເສັ້ນເລືອດໃນສະໝອງແຕກ ຫລື ຕີບ. ສະມາຊິກຂອງຄະນະນັກວິໄຈຈາກໄຊປຣັດ ກ່າວວ່າ: ຝຸ່ນລະອອງຂະໜາດນ້ອຍ ແລະ ມົນລະພິດທາງອາກາດອື່ນໆຢູ່ເອີຣົບເກີດຈາກການຈູດເຜົາຂອງນ້ຳມັນ. ດັ່ງນັ້ນ ຈຶ່ງມີຄວາມຈຳເປັນຕ້ອງປ່ຽນໄປໃຊ້ແຫລ່ງອື່ນໆໃນການຜະລິດພະລັງງານໂດຍໄວ ແລະ ເມື່ອມີການໃຊ້ພະລັງງານສະອາດ ຫລື ພະລັງງານທົດແທນແລ້ວ ນອກຈາກຈະເປັນການປະຕິບັດຕາມຂໍ້ຕົກລົງປາຣີ ທີ່ມີເປົ້າໝາຍໃນການຫລຸດຜົນກະທົບຈາກສະພາບໂລກຮ້ອນແລ້ວ ຍັງສາມາດຊ່ວຍຫລຸດອັດຕາການເສຍຊີວິດທີ່ກ່ຽວຂ້ອງກັບມົນລະພິດໃນອາກາດຢູ່ເອີຣົບໄດ້ເຖິງ 55%. ການສຶກສາດັ່ງກ່າວ ມຸ່ງເນັ້ນເລື່ອງໂອໂຊນ ແລະ ຝຸ່ນລະອອງທີ່ມີຂະໜາດນ້ອຍທີ່ຮູ້ຈັກກັນວ່າ: PM2,5 ເຊິ່ງມີຜົນກະທົບຕໍ່ສຸຂະພາບ. ນັກວິໄຈກ່າວວ່າ: ຂໍ້ມູນໃໝ່ທີ່ໄດ້ນັ້ນ ສະແດງໃຫ້ເຫັນເຖິງອັນຕະລາຍຂອງຝຸ່ນພິດ PM2,5 ວ່າມີອັນຕະລາຍຮຸນແຮງຫລາຍກວ່າທີ່ເຄີຍຄາດຄິດເອົາໄວ້.
