ລະວັງຂະບວນການຄ້າມະນຸດມາແຮງໃນຮູບແບບແຕ່ງງານ

ໂດຍ: ທ່ຽງ​ທຳ

ສະບາຍດີ, ເພື່ອນຜູ້ອ່ານ  ທີ່ຮັກແພງ, ຫລາຍຄົນກໍອາດຈະຮູ້ດີໃນປັດຈຸບັນນີ້ ຂະບວນການຄ້າມະນຸດໄດ້ແຜ່ລະບາດໄປທົ່ວໂລກໂດຍສະເລຍໃນ ທົ່ວໂລກແຕ່ລະປີຈະມີຜູ້ຖືກເຄາະຮ້າຍຈາກຂະບວນການນີ້ນັບເປັນຫລາຍສິບລ້ານຄົນ, ໃນນັ້ນປະມານ 1 ສ່ວນ 3 ແມ່ນຖືກບັງຂັບໃຫ້ແຕ່ງດອງ.

ສະເພາະຢູ່ປະເທດເຮົາໃນປັດຈຸບັນ, ການຫລອກລວງເພື່ອຂໍແຕ່ງງງານແມ່ນນັບມື້ພົ້ນເດັ່ນ, ໂດຍສະເພາະຢູ່ບັນດາແຂວງພາກເໜືອລາວຍ້ອນບັນຫາຄວາມທຸກຍາກ, ລະດັບການສຶກສາຄວາມຮູ້ວິຊາຊີບຕ່ຳ, ຄວາມແຕກໂຕນດ້ານການພັດທະນາໃນຂົງເຂດ ແລະ ສິ່ງອຳນວຍຄວາມສະດວກໃນດ້ານສາທາລະນະ, ເຕັກໂນໂລຊີ ແລະ ການສືສານທີ່ບໍ່ມີເຂດແດນ, ໄດ້ກາຍເປັນສິ່ງກະຕຸກຊຸກຍູ້ ແລະ ເປັນປັດໃຈດຶງດູດເຮັດໃຫ້ມີການເຄື່ອນຍ້າຍ ພົນລະເມືອງຈາກຊົນນະບົດເຂົ້າສູ່ຕົວເມືອງ   ແລະ ຈາກລາວໄປຫາປະເທດອື່ນ ເພື່ອສະແຫວງຫາຊີວິດ ການເປັນຢູ່ທີ່ດີກວ່າ.

ເວົ້າສະເພາະການຂໍແຕ່ງ ງານຂອງຄົນຕ່າງປະເທດຢູ່ເຂດພາກເໜືອລາວແມ່ນມີ ຫລາຍ, ເພາະລາຄາຄ່າດອງ ພ້ອມການປະກອບເອກະສານ ຕ່າງໆ ຂອງທ້ອງຖິ່ນແມ່ນມີລາຄາບໍ່ແພງ ແລະ ເຮັດໄດ້ ງ່າຍ, ພ້ອມທັງການຄຸ້ມ   ຄອງກວດກາຂອງເບື້ອງເຈົ້າ ໜ້າ ທີ່ກໍຍັງຫລົ່ມເຫລວຢູ່, ອັນເປັນຊ່ອງວ່າງໃຫ້ພວກ ຄ້າມະນຸດດຳເນີນການໄດ້ ໂດຍງາຍ ແລະ ມີຄວາມ ປອດໄພໃນເບື້ອງຕົ້ນ.

ດັ່ງທ່ານລັດຖະມົນຕີ ກະຊວງປ້ອງກັນຄວາມສະຫງົບມີຄຳເຫັນໃນງານໂຮມຊຸມນຸມລະນຶກວັນສາກົນເພື່ອຕ້ານ ການຄ້າມະນຸດໃນວັນທີ 27  ກໍລະກົດ ຜ່ານມານີ້ ຢູ່ນະຄອນຫລວງວຽງຈັນວ່າ: ປະເພດຂອງການຄ້າມະນຸດພົ້ນ  ເດັ່ນກວ່າໝູ່ໃນປັດຈຸບັນແມ່ນການຂູດຮີດທາງເພດ, ການຂູດຮີດແຮງງານ, ຕົວຍົວະ ຫລອກລອງໃນຮູບແບບໄປ ທ່ອງທ່ຽວ, ຄ້າຂາຍ, ໄປ ອອກແຮງງານ ແລະ ການແຕ່ງງານກັບຄົນຕ່າງປະເທດໂດຍບໍ່ຜ່ານອົງການ ກ່ຽວຂ້ອງ.

ດັ່ງນັ້ນທ່ານລັດຖະມົນຕີໄດ້ຮຽກຮ້ອງມາຍັງອົງການຈັດຕັ້ງພັກ, ລັດຖະບານ, ອົງການຈັດຕັ້ງສາກົນກໍຄື ປະຊາຊົນລາວບັນດາເຜົ່າຈົ່ງໃຫ້ຄວາມຮ່ວມມື ພ້ອມກັນສະກັດກັ້ນສິ່ງຫຍໍ້ ທໍ້ດັ່ງກ່າວໃຫ້ມີຜົນ, ຮຽກຮ້ອງໃຫ້ອຳນາດການປົກ ຄອງທ້ອງຖິ່ນເອົາໃຈໃສ່ໂຄສະນາສຶກສາອົບຮົມໃຫ້ ປະຊາຊົນ ໄດ້ຮັບຮູ້ໄດ້ກວ້າງຂວາງເຖິງຜົນຮ້າຍ ແລະ  ເຫລ່ຫລ່ຽມກົນອຸບາຍຕ່າງໆ ຂອງພວກການຄ້າມະນຸດ ດັ່ງກ່າວ, ເພື່ອພວກເຮົາສາມາດຫລກລ້ຽງມັນໄດ້, ພ້ອມນັ້ນ  ກໍຕ້ອງເພີ່ມທະວີວຽກງານກວດກາ, ຄຸ້ມຄອງການເຂົ້າອອກເມືອງຢູ່ບັນດາດ່ານຊາຍແດນທີ່ມີຄວາມສ່ຽງ ຕ່າງໆ, ສຸມໃສ່ສ້າງຄວາມເຂັ້ມແຂງຂອງວຽກງານຕ້ານການຄ້າມະນຸດຢູ່ປະເທດເຮົາໃຫ້ດີຂຶ້ນກວ່າເກົ່າ./.