ແຂວງສະຫວັນນະເຂດຕ້ອງເອົາໃຈໃສ່ຫລາຍດ້ານໃນວຽກງານໂພຊະນາການ
ໃນໄລຍະຜ່ານມາ, ເຖິງວ່າແຂວງສະຫວັນນະເຂດຈະມີຜົນສຳເລັດຫລາຍດ້ານໃນວຽກງານໂພຊະນາການ, ແຕ່ກໍເຫັນວ່າອັດຕາການຂາດສານອາຫານແບບຊໍ້າເຮື້ອ (ລວງສູງບໍ່ໄດ້ມາດຕາຖານ ຫລື ເຕ້ຍ), ນໍ້າໜັກຫລຸດມາດຕະຖານ ແລະ ການຂາດສານອາຫານແບບຈ່ອຍຜອມຂ້ອນຂ້າງສູງ, ເຊິ່ງເປັນບັນຫາທ້າທາຍໃນວຽກງານສາທາລະນະສຸກທີ່ຕ້ອງຮີບຮ້ອນແກ້ໄຂ.
ສະຫວັນນະເຂດ, ເປັນແຂວງໜຶ່ງທີ່ມີການຈັດຕັ້ງປະຕິບັດໂພຊະນາການບໍ່ທັນສູງ, ໂດຍສະເພາະການເຂົ້າເຖິງນໍ້າສະອາດ ແລະ ສິ່ງອໍານວຍຄວາມສະດວກດ້ານວຽກງານສຸຂະອະນາໄມຍັງບໍ່ພຽງພໍ ແລະ ການປະຕິບັດຕົວຈິງຂອງປະຊາຊົນຍັງບໍ່ເໝາະສົມ ເປັນຕົ້ນ: ຄວາມບໍ່ປອດໄພໃນການຈັດການກັບອາຈົມຂອງເດັກ, ອັດຕາການລ້ຽງລູກດ້ວຍນົມແມ່ພຽງຢ່າງດຽວຍັງຕໍ່າກວ່າເຄິ່ງໜຶ່ງ ຂອງລະດັບຊາດ.
ອີງໃສ່ບົດລາຍງານການວິເຄາະແບບທັບຊ້ອນເຫັນວ່າ: ເຄິ່ງໜຶ່ງຂອງເດັກນ້ອຍທີ່ອາຍຸຕໍ່າກວ່າ 5 ປີ ໃນແຂວງດັ່ງກ່າວ ແມ່ນຢູ່ໃນຄວາມສ່ຽງທີ່ມີໂພຊະນາການບໍ່ພຽງພໍ ແລະ ມີບັນຫາສຸຂະພາບ, ເຊິ່ງເປັນອັນຕະລາຍຕໍ່ການພັດທະນາທາງດ້ານການຮຽນຮູ້ ແລະ ດ້ານຮ່າງກາຍ.
ທ່ານ ເລໂອ ຟາເບີ (Leo Faber) ເອກອັກຄະລັດຖະທູດສະຫະພາບເອີຣົບປະຈໍາລາວ ໄດ້ມີຄໍາເຫັນວ່າ: ສະຫະພາບເອີຣົບ, ອົງການອຸຍນິເຊບ ແລະ ລັດຖະບານລາວ, ໄດ້ຜັນຂະຫຍາຍການຮ່ວມມືເພື່ອປັບປຸງດ້ານໂພຊະນາການ ໂດຍສຸມໃສ່ການປະສານງານຫລາຍພາກສ່ວນໃນການເກັບກຳຂໍ້ມູນ, ການສ້າງຈິດສໍານຶກ ແລະ ເສີມຂະຫຍາຍຄວາມອາດສາມາດຂອງອົງກອນຕ່າງໆ, ທັງຕິດຕາມຕົວຊີ້ວັດດ້ານໂພຊະນາການຢ່າງຕໍ່ເນື່ອງໃນແຂວງຕ່າງໆ ເພື່ອປະເມີນສະພາບ ແລະ ດັດປັບກິດຈະກຳທີ່ໄດ້ປະຕິບັດຜ່ານມາ ເພື່ອປັບປຸງກິດຈະກໍາດ້ານວຽກງານໂພຊະນາການຂອງແມ່ຍິງ ແລະ ເດັກ. ອີງໃສ່ບົດສຳຫລວດ ການວັດແທກຄວາມຄືບຫນ້າຂອງການປັບປຸງຊີວິດການເປັນຢູ່ຂອງເດັກໃນ ສປປ ລາວ ເຫັນວ່າແຂວງສະຫວັນນະເຂດແມ່ນຈັດຢູ່ໃນກຸ່ມບັນດາແຂວງທີ່ມີເດັກທຸກຍາກໃນຂ້ອນຂ້າງສູງ, ຫາກທຽບໃສ່ຄ່າສະເລ່ຍລະດັບຊາດຄື 50,4%-65% ຂອງເດັກແມ່ນບໍ່ສາມາດບັນລຸສິດທິ ແລະ ຄວາມຕ້ອງການທີ່ຈໍາເປັນ ແລະ ຄວາມທຸກຍາກ, ສ່ວນໃຫຍ່ແມ່ນໃນເດັກອາຍຸຕໍ່າກວ່າ 5 ປີໃນເຂດຫ່າງໄກສອກຫລີກ.
ທ່ານ ອົກຕາວຽນ ບີໂວລ ຜູ້ຕາງໜ້າຈາກອົງການອຸຍນີເຊັບ ກ່າວວ່າ: “ໂພຊະນາການທີ່ເຫມາະສົມໃນລະຫວ່າງ 1.000 ວັນທໍາອິດມີຜົນກະທົບຕໍ່ຄວາມສາມາດໃນການເຕີບໃຫຍ່ຂອງເດັກຮຽນຮູ້ ແລະ ຄວາມສໍາເລັດຂອງເດັກ, ການຮ່ວມມືເພື່ອປັບປຸງວຽກໂພຊະນາການ, ການຮ່ວມມືຫລາຍພາກສ່ວນແມ່ນລິເລີ່ມໂດຍທຶນຂອງສະຫະພາບເອີຣົບ. ໂຄງການຮ່ວມມືເພື່ອການປັບປຸງໂພຊະນາການໄດ້ເລີ່ມຕົ້ນໃນເດືອນກໍລະກົດ 2016 ແລະ ຈະດຳເນີນເປັນໄລຍະ 60 ເດືອນຈົນຮອດເດືອນມິຖຸນາ 2021 ໃນງົບປະມານທັງໝົດ 11 ລ້ານກວ່າເອີໂຣ, ເຊິ່ງເປັນຂອງສະຫະພາບເອີຣົບ 9 ລ້ານເອີໂຣ ແລະ ອົງການອຸຍນິເຊບ 2,2 ລ້ານກວ່າເອີໂຣ, ໂດຍໄດ້ປະຕິບັດຢູ່ 10 ແຂວງເປົ້າໝາຍເພື່ອສ້າງຄວາມເຂັ້ມແຂງການຄຸ້ມຄອງດ້ານໂພຊະນາການທີ່ຍືນຍົງແກ່ເດັກ ແລະ ແມ່ຍິງໃນ ລາວ.
