ການດື່ມນ້ຳບໍ່ໄດ້ຊ່ວຍໃຫ້ເຊົາເຜັດໄດ້ໄວ
ມື້ນີ້ພວກເຮົາມີຄວາມຮູ້ກ່ຽວກັບການເຮັດໃຫ້ເຊົາຈາກອາການເຜັດໄດ້ໄວຍິ່ງຂຶ້ນມາແນະນຳທ່ານ ເຊິ່ງເປັນຄວາມລຶ້ງເຄີຍຂອງທຸກຄົນທີ່ຫາກກິນຫຍັງທີ່ມີລົດຊາດເຜັດເຂົ້າໄປຍາມໃດ ບໍ່ວ່າຈະແມ່ນຕຳໝາກຫຸ່ງ, ແກງ ຫລື ຕົ້ມຍຳເຜັດໆ ຫລື ແມ່ນແຕ່ກິນໝາກເຜັດດິບ – ເຜັດແຫ້ງເຂົ້າໄປຈົນເກີດອາການເຜັດຂຶ້ນມາ ສິ່ງທຳອິດທີ່ທຸກຄົນເຮັດກ່ອນເລີຍກໍແມ່ນການດື່ມນ້ຳໂດຍສະເພາະແມ່ນນ້ຳເຢັນໆ ເພາະມີຄວາມເຊື່ອວ່າຈະເຮັດໃຫ້ຄວາມເຜັດນັ້ນຫລຸດຜ່ອນລົງ ຫລື ເຊົາເຜັດໄດ້, ແຕ່ຄວາມຈິງແລ້ວ ການດື່ມນ້ຳບໍ່ໄດ້ຊ່ວຍໃຫ້ອາການເຜັດຫາຍໄປ ຄວາມຈິງແລ້ວ ການຍິ່ງດື່ມນ້ຳເຂົ້າໄປຫລາຍເທົ່າໃດກໍຍິ່ງເປັນການກະຈາຍຄວາມເຜັດໃຫ້ແຜ່ໄປທົ່ວປາກຫລາຍຂຶ້ນກວ່າເກົ່າ.
ວິທີແກ້ອາການເຜັດທີ່ຖືກຕ້ອງກໍຄື ການກິນເຂົ້າ, ເຂົ້າໜົມປັງ, ເຂົ້າຈີ່ ຫລື ດື່ມນົມ ແທນການດື່ມນ້ຳເພາະຄວາມຫວານຈາກແປ້ງໃນເຂົ້າ, ຈາກເຂົ້າໜົມປັງ, ຈາກເຂົ້າຈີ່ ຫລື ນົມ ຈະຊ່ວຍດູດຊຶມສານແຄບໄຊຊິນ ທີ່ເປັນສານເຮັດໃຫ້ເກີດຄວາມເຜັດທີ່ຢູ່ໃນໝາກເຜັດໃຫ້ໝົດໄປໄດ້ນັ້ນເອງ.
