ການສົ່ງອອກກາເຟລາວບັນລຸໄດ້ປະມານ 100 ລ້ານໂດລາສະຫະລັດຕໍ່ປີ
ປັດຈຸບັນກາເຟໄດ້ກາຍເປັນສິນຄ້າສົ່ງອອກທີ່ສ້າງລາຍຮັບບໍ່ໜ້ອຍໃຫ້ລາວເຮົາ ສະເລ່ຍ 100 ລ້ານໂດລາສະຫະລັດຕໍ່ປີ ລວມທັງການສ້າງວຽກເຮັດງານທຳໃຫ້ປະຊາຊົນໄດ້ເປັນຈຳນວນຫລວງຫລາຍ.
ທ່ານ ບຸນທ່ຽງ ສຸລິວັນ ປະທານສະພາການຄ້າ ແລະ ອຸດສາຫະກຳແຂວງຫລວງພະບາງ ໄດ້ລາຍງານໃຫ້ຮູ້ໃນໂອກາດສະເຫລີມສະຫລອງງານກາເຟລາວ ເມື່ອບໍ່ດົນມານີ້ວ່າ: ປະເທດລາວເຮົາ ໂດຍສະເພາະແມ່ນຢູ່ພາກໃຕ້ເຂດພູພຽງບໍລະເວນ ການປູກກາເຟຖືວ່າໄດ້ຮັບການພັດທະນາ ແລະ ມີໂຄງສ້າງດ້ານການຈັດຕັ້ງການຜະລິດທຸລະກິດກາເຟຢ່າງກວ້າງຂວາງ, ສ່ວນຢູ່ພາກເໜືອ ເຫັນວ່າຍັງມີຫລາຍຢ່າງເປັນສິ່ງທ້າທາຍຫລາຍ ເປັນຕົ້ນພື້ນຖານໂຄງລ່າງມີຄວາມສູງຊັ້ນ, ເຫວເລິກ ບວກກັບຄວາມຮູ້ດ້ານວິຊາການດ້ານການພັດທະນາການປູກກາເຟຍັງຈຳກັດ, ແຕ່ຍັງມີໂອກາດ ແລະ ສິ່ງເອື້ອອຳນວຍທີ່ບົ່ມຊ້ອນຫລາຍເຊັ່ນ: ມີຄວາມອຸດົມສົມບູນທາງດ້ານຊັບພະຍາກອນທຳມະຊາດ, ວັດທະນະທຳຮີດ-ຄອງປະເພນີ ແລະ ປະຫວັດສາດ ອັນໄດ້ເຮັດໃຫ້ພາກເໜືອມີການພັດທະນາດີຂຶ້ນ. ການເຕີບໂຕທາງດ້ານເສດຖະກິດ ມີການຂະຫຍາຍຕົວຢ່າງຕໍ່ເນື່ອງ. ປັດຈຸບັນກາເຟລາວໄດ້ຮັບການຊຸກຍູ້ສົ່ງເສີມດ້ວຍການປັບປຸງຜະລິດຕະພັນໃຫ້ຫລາກຫລາຍ ຈົນກາຍເປັນສິນຄ້າຍອມຮັບຈາກພາກພື້ນ ແລະ ສາກົນ.
ປັດຈຸບັນທົ່ວປະເທດມີເນື້ອທີ່ປູກກາເຟປະມານ 1 ແສນເຮັກຕາ, ແຕ່ລະປີໃຫ້ຜົນຜະລິດໄດ້ 1 ແສນກວ່າໂຕນຕໍ່ປີ ໃນນີ້ການຜະລິດກວມເອົາ 90% ແມ່ນຢູ່ພາກກາງ ແລະ ພາກໃຕ້, ສ່ວນພາກເໜືອຂອງລາວກວມພຽງ 10% ເທົ່ານັ້ນ. ແຕ່ເຖິງຢ່າງໃດກໍສາມາດສ້າງຜົນປະໂຫຍດໃຫ້ຜູ້ອອກແຮງງານໃນເຂດນັ້ນປະມານ 3 ແສນຄົນ.
