ຄຳມ່ວນເກັບລາຍຮັບຈາກການທ່ອງທ່ຽວໄດ້ 236 ຕື້ກວ່າກີບ ໃນປີມີໂຄວິດ-19

ຮອງເຈົ້າແຂວງຄໍາມ່ວນ ລາຍງານໃຫ້ຮູ້ໃນກອງປະຊຸມໃຫຍ່ຜູ້ແທນຄັ້ງທີ X ຂອງອົງຄະນະພັກແຂວງ ເມື່ອບໍ່ດົນມານີ້ວ່າ: ໃນປີ 2020 ນີ້, ແຂວງຄຳມ່ວນ ສາມາດດຶງດູດນັກທ່ອງທ່ຽວທັງພາຍໃນ ແລະ ຕ່າງປະເທດເຂົ້າມາທ່ຽວແຂວງຂອງຕົນໄດ້ຫລາຍກວ່າ 313.400 ຄົນ, ສາມາດສ້າງລາຍລາຍຮັບໄດ້ທັງໝົດ 236 ຕື້ກວ່າກີບ, ເປັນລາຍຮັບທີ່ສູງສົມຄວນເຖິງຈະມີການລະບາດຂອງພະຍາດໂຄວິດ-19. ປັດຈຸບັນທົ່ວແຂວງມີແຫລ່ງທ່ອງທ່ຽວທັງໝົດ 207 ແຫ່ງ, ໃນນັ້ນ ມີແຫລ່ງທ່ອງທ່ຽວທຳມະຊາດ 143 ແຫ່ງ, ວັດທະນະທຳ 33 ແຫ່ງ ແລະ ປະຫວັດສາດ 31 ແຫ່ງ.

ທ່ານຮອງເຈົ້າແຂວງ ໃຫ້ຮູ້ອີກວ່າ: ໃນໄລຍະ 5 ປີ ຜ່ານມາ, ແຂວງສາມາດດຶງດູດນັກທ່ອງທ່ຽວເຂົ້າມາທ່ຽວບັນລຸໄດ້ 2,3 ລ້ານກວ່າຄົນ ສາມາດສ້າງລາຍຮັບໄດ້ປະມານ 1.619 ຕື້ກີບ ລື່ນແຜນ 61,16% ໃນນີ້ອັນພົ້ນເດັ່ນແມ່ນໄດ້ສະເໜີອຸທິຍານແຫ່ງຊາດຫີນໜາມໜໍ່ ທີ່ເມືອງບົວລະພາ ເຖິງອົງການ ອຸຍເນັດສະໂກ ເພື່ອພິຈາລະນາຮັບຮອງເປັນມໍລະດົກໂລກທາງທຳມະຊາດແຫ່ງທຳອິດຂອງ ສປປ ລາວ ແລະ ໄດ້ສຳຫລວດຕາມສາຍພູຄັນນາ ເພື່ອກຳນົດເປັນເຂດອະນຸລັກຈຳນວນ 8 ຈຸດ ແລະ ພ້ອມນີ້ ຍັງໄດ້ຮັບທຶນຊ່ວຍເຫລືອຈາກຕ່າງປະເທດ ເພື່ອພັດທະນາພື້ນຖານໂຄງລ່າງດ້ານການທ່ອງທ່ຽວຈຳນວນໜຶ່ງ ແລະ ສາມາດດຶງດູດການລົງທຶນຂອງເອກະຊົນເຂົ້າໃນການພັດທະນາແຫລ່ງທ່ອງທ່ຽວທາງທຳມະຊາດ ເປັນຕົ້ນພູຜາມ່ານ, ຂຸນກອງແລງ, ທ່າຝຣັ່ງ, ຂຸນນໍ້າຄຳດິບ, ຕາດຊຽງລື ແລະ ອື່ນໆ ມີມູນຄ່າຫລາຍກວ່າ  617 ຕື້ກີບ ເຊິ່ງສາມາດສ້າງຄວາມສົນໃຈໃຫ້ແກ່ນັກທ່ອງທ່ຽວທັງພາຍໃນ ແລະ ຕ່າງປະເທດເປັນຈຳນວນບໍ່ຫນ້ອຍ, ພິເສດແມ່ນຖໍ້ານໍ້າລອດເຊບັ້ງໄຟເປັນທີ່ສົນໃຈຂອງນັກລົງທຶນຢາກມາພັດທະນາ, ສ່ວນຖ້ຳກອງລໍ ເມືອງຄູນຄຳ ໄດ້ຮັບລາງວັນດີເດັ່ນຂອງອາຊຽນ ດ້ານການທ່ອງທ່ຽວແບບປະຊາຊົນມີສ່ວນຮ່ວມເຖິງ 2 ຄັ້ງ. ສະເພາະສະຖານທີ່ສຳຄັນທາງປະຫວັດສາດ ແລະ ວັດທະນະທຳ ກໍໄດ້ມີການພັດທະນາຢ່າງຕໍ່ເນື່ອງ ໂດຍສົມທົບກັບກຳລັງແຮງຂອງສັງຄົມ ເປັນຕົ້ນກົມມະລຽນພະທາດສີໂຄດ, ວົງວຽນຫລັກ 2, ຫໍລະນຶກ 21 ມີນາ, ຫໍຫລັກເມືອງ ແລະ ຂັ້ນໄດພະຍານາກ ມີມູນຄ່າທັງໝົດຫລາຍກວ່າ 4 ຕື້ກີບ.