ບົດ​ຄຳ​​ເຫັນຂອງ​ສະຫາຍ ຫງວຽນ ບ໋າ ຮຸ່ງ, ​ເອກ​ອັກຄະ​ລັດຖະທູດ​ສສ ຫວຽດນາມ ປະຈຳ ສປປ ລາວ

- advert banner 728 90 728x90 - ບົດ​ຄຳ​​ເຫັນຂອງ​ສະຫາຍ ຫງວຽນ ບ໋າ ຮຸ່ງ, ​ເອກ​ອັກຄະ​ລັດຖະທູດ​ສສ ຫວຽດນາມ ປະຈຳ ສປປ ລາວ

- fff3532a c300 4936 9fc7 eb34494bf62c 1 - ບົດ​ຄຳ​​ເຫັນຂອງ​ສະຫາຍ ຫງວຽນ ບ໋າ ຮຸ່ງ, ​ເອກ​ອັກຄະ​ລັດຖະທູດ​ສສ ຫວຽດນາມ ປະຈຳ ສປປ ລາວ

(ເນື່ອງ​ໃນ​ໂອກາດ​ສະ​ເຫຼີ​ມສະຫຼອງ​ວັນຊາດ ສສ ຫວຽດນາມ ຄົບຮອບ 72 ປີ (02/9/1945-02/9/2017)

ເນື່ອງໃນໂອກາດສະເຫຼີມສະຫຼອງວັນຊາດ ສສ ຫວຽດນາມ ຄົບຮອບ 72 ປີ (2/9/1945-2/9/2017), ວັນສ້າງຕັ້ງສາຍພົວພັນການທູດ ລາວ​-ຫວຽດນາມ ຄົບຮອບ 55 ປີ (5/9/1962-5/9/2017) ​ແລະ ວັນເຊັນສົນທິສັນຍາມິດຕະພາບ ແລະ ການຮ່ວມມື ຫວຽດນາມລາວ ຄົບຮອບ 40 ປີ (18/7/1977-18/7/2017). ຕາງໜ້າພັກ, ລັດ ແລະ ປະຊາຊົນຫວຽດນາມ, ຂ້າພະເຈົ້າຂໍສະແດງຄວາມນັບຖືຢ່າງສູງ, ຄວາມຮັກແພງ ຖານສະຫາຍອ້າຍນ້ອງອັນດູດດື່ມ ມາຍັງບັນດາສະຫາຍການນຳພັກ, ລັດ ແລະ ປະຊາຊົນລາວອ້າຍນ້ອງ.

ກ່ອນໜ້າ​ນີ້ 72 ປີ, ພາຍໃຕ້ການນຳພາຂອງພັກກອມມູນິດຫວຽດນາມ ປະຊາຊົນ​ຫວຽດນາມ​ໄດ້​ດຳ​ເນີນ​ການ​ປະຕິວັດ​ເດືອນສິງຫາຢ່າງ​ມີ​ໄຊ, ​ໂຄ່ນ​ລົ້ມ​ລະບອບ​ສັກ​ດິນາ, ທັບ​ມ້າງ​ແອກ​ປົກຄອງ​ຂອງ​ພວກລ່າ​ເມືອງ​ຂຶ້ນ, ຍາດ​ເອົາ​ອຳນາດ​ການ​ປົກຄອງ​ມາ​ສູ່ກຳມືປະຊາຊົນ. ວັນ​ທີ 2 ກັນຍາ 1945 ຢູ່ນະຄອນຫຼວງ​ຮ່າ​ໂນ້ຍ, ປະທານ ​ໂຮ່ຈິ​ມິນ ​ໄດ້​ອ່ານ​ບົດ​ຖະ​ແຫຼ​ງປະກາດ​ເອກະລາດ ​​ໃຫ້ປະຊາຊົນ​ທັງ​ຊາດ ​ແລະ ທົ່ວໂລກ​ຊາບ​ກ່ຽວ​ກັບການ​ສະຖາປະນາ​ປະ​ເທດ ສາທາລະນະ​ລັດ ປະຊາທິປະ​ໄຕ ​ຫວຽດນາມ. ນີ້​ແມ່ນ​ນິມິດ​ໝາຍ​ທີ່​ຮຸ່ງເຮືອງ​ເຫຼືອງ​ເຫຼື້ອມ​ໃນ​ປະຫວັດສາດ​ແຫ່ງ​ຊາດ​ຫວຽດນາມ ທີ່​ໄດ້​ນຳ​ເອົາ​ປະ​ເທດ​ຫວຽດນາມ​ກ້າວ​ເຂົ້າ​ສູ່ສັງກາດ​ໃໝ່​ແຫ່ງ​ເອກະລາດ, ອິດສະຫຼະພາບ ແລະ ເປັນເຈົ້າຊາຕະກຳຕົນເອງ.

ນັບ​ແຕ່​ນັ້ນ​ມາ, ພາຍ​ໃຕ້​ການ​ນຳພາ​ອັນ​ຖືກຕ້ອງ ​ແລະ ສະຫຼາດ​ສ່ອງ​ໃສ​ຂອງ​ພັກ​ກອມ​ມູນິດ​ຫວຽດນາມ, ປະຊາຊົນ​ຫວຽດນາມ​ໄດ້​ຜ່ານ​ຜ່າ​ຄວາມ​ຫຍຸ້ງຍາກ, ສິ່ງທ້າທາຍ​ທົດ​ສອບ​ນາໆປະການ ສາມາດຍາດ​ໄດ້ໄຊຊະນະ​ອັນ​ໃຫຍ່​ຫຼວງຕະຫລອດ​ມາ​ເຊັ່ນ: ດຳ​ເ​ນີນການ​ຕໍ່ຕ້ານ​ຕີ​ເອົາຊະນະ​ສັດຕູ​ຕ່າງ​ດ້າວ​ຜູ້​ຮຸກ​ຮານ, ທ້ອນ​ໂຮມ​ປະ​ເທດ​ຊາດ​ເປັນ​ເອກະ​ພາບ, ໄດ້ລິ​ເລີ່​ມ ​ແລະ ​ປະຕິບັດ​​ພາລະກິດ​ປ່ຽນ​ແປງ​ໃໝ່​ໄດ້​ຮັບ​ຜົນ. ຈາກປະເທດທີ່ດ້ອຍພັດທະນາ ແລະ ຫຼ້າຫຼັງ, ມາເຖິງປັດຈຸບັນ ຫວຽດນາມ​ໄດ້​ພົ້ນ​ອອກ​ຈາກ​ສະພາບປະເທດທຸກຍາກ ແລະ​ ດ້ອຍ​ພັດທະນາ, ຊຸກຍູ້ຂະບວນການຫັນເປັນອຸດສາຫະກຳ ແລະ ທັນສະ​ໄໝ, ຍົກ​ສູງຊີວິດການ​ເປັນ​ຢູ່​ຂອງ​ປະຊາຊົນ​ໄດ້​ໃຫ້​ດີ​ຂຶ້ນ; ການ​ປ້ອງ​ກັນຊາ​ດ-ປ້ອງ​ກັນ​ຄວາມ​ສະຫງົບ​ໄດ້​ຮັບ​ການ​ຮັກສາ​ໄວ້​ໄດ້​ຢ່າງ​ໝັ້ນຄົງ; ການ​ເມືອງ, ສັງຄົມ​ມີ​ຄວາມສະຖຽນ​ລະ​ພາບ; ຂົງ​ເຂດ​ວັດທະນະທຳ, ການ​ສຶກສາ, ສາທາລະນະ​ສຸກ​ບັນ​ລຸ​ໄດ້ຜົນ​ງານ​ຫຼາຍ​ຢ່າງ​ທີ່​ສຳຄັນ; ວຽກ​ງານ​ການ​ຕ່າງປະ​ເທດ ​ແລະ ​ການ​ເຊື່ອມ​ໂຍງ​ເຂົ້າ​ກັບ​ສາກົນ​ກໍ​ໄດ້​ຮັບ​ການຊຸກຍູ້ຢ່າງ​ແຂງແຮງ, ຖານະ​ບົດບາດ ​ແລະ ອິດ​ທິພົນ​ຊື່​ສຽງ​ຂອງ​ ຫວຽດນາມ ​ສູງ​ເດັ່ນ​ຂຶ້ນບົນ​ເວທີ​ສາກົນ ແລະ ພາກພື້ນ.

ໃນ​ໄລຍະ​ຜ່ານມາ, ເຖິງວ່າສະພາບການຂອງພາກພື້ນ ແລະ ສາກົນມີການຜັນແປ​ໄປຢ່າງໄວວາ ແລະ ສັບສົນ ຍາກ​ທີ່​ຈະຄາດຄະເນໄດ້, ເສດຖະກິດສາກົນມີການຟື້ນຕົວຢ່າງຊັກຊ້າ, ການຜະລິດພາຍໃນພົບກັບຄວາມຫຍຸ້ງຍາກຫຼາຍ, ໄພທຳມະຊາດ, ມົນລະພິດສິ່ງແວດລ້ອມ, ພະຍາດ ລະບາດເກີດຂຶ້ນຢ່າງຕໍ່ເນື່ອງກໍຕາມ, ແຕ່ພາຍໃຕ້ການນຳພາອັນສະຫຼາດສ່ອງໃສຂອງພັກກອມມູນິດ ຫວຽດນາມ ບວກກັບການເຂົ້າຮ່ວມຂອງທົ່ວລະບົບການເມືອງ ແລະ ການເຫັນດີ​ເຫັນ​ພ້ອມເປັນຈິດ​ໜຶ່ງ​ໃຈ​ດຽວຂອງທົ່ວປວງຊົນ, ຫວຽດນາມສາມາດຍາດມາໄດ້ຫຼາຍຜົນງານທີ່ສຳຄັນຫລາຍ​ດ້ານຄື:

ສະພາບເສດຖະກິດ-ສັງຄົມ ມີການຫັນປ່ຽນຢ່າງຕັ້ງໜ້າ. GPD ​ໃນປີ 2016 ບັນລຸໄດ້ 6,21% ​ແລະ ພຽງ 7 ເດືອນຕົ້ນປີ 2017 GDP ຄາດວ່າຈະເພີ່ມຂຶ້ນ 5,6% ຖ້າທຽບໃສ່ໄລຍະດຽວກັນຂອງປີ 2016; ການ​ເກັບລາຍຮັບງົບປະມານແຫ່ງລັດຈະບັນລຸໄດ້ 584,6 ພັນຕື້ດົງ ​ເທົ່າ​ກັບ 48,2% ຂອງແຜນປີ; ມູນຄ່າການນຳເຂົ້າ-ສົ່ງອອກສິນຄ້າຄາດວ່າ​ຈະບັນລຸໄດ້ 233,5 ຕື້ໂດລາສະຫະລັດ; ສາມາດດຶງດູດນັກທ່ອງທ່ຽວຕ່າງປະເທດໄດ້ປະມານ 7,2 ລ້ານເທື່ອຄົນມາທ່ຽວຫວຽດນາມ, ເພີ່ມຂຶ້ນ 28,8% ຖ້າທຽບໃສ່ໄລຍະດຽວກັນຂອງປີກາຍ; ​ໄດ້ອະນຸມັດໃຫ້ 1.378 ໂຄງການລົງທຶນໂດຍກົງຈາກຕ່າງປະເທດ ດ້ວຍມູນຄ່າທຶນຈົດທະບຽນທັງໝົດແມ່ນ 12,3 ຕື້ໂດລາ ສະຫະລັດ. ການເຊື່ອມໂຍງ​ເຂົ້າກັບສາກົນ​ໄດ້​ຮັບ​ການ​ເພີ່ມ​ທະວີ. ປັດຈຸບັນນີ້ ຫວຽດນາມກຳລັງກະກຽມເປັນ​ເຈົ້າພາບ​ຈັດກອງປະຊຸມສຸດຍອດ APEC ຄັ້ງທີ 29 ທີ່ຈະຈັດຂຶ້ນ ໃນເດືອນພະຈິກ 2017 ຢູ່ນະຄອນດານັງ.

- lattana 1 - ບົດ​ຄຳ​​ເຫັນຂອງ​ສະຫາຍ ຫງວຽນ ບ໋າ ຮຸ່ງ, ​ເອກ​ອັກຄະ​ລັດຖະທູດ​ສສ ຫວຽດນາມ ປະຈຳ ສປປ ລາວ
- 1 1 - ບົດ​ຄຳ​​ເຫັນຂອງ​ສະຫາຍ ຫງວຽນ ບ໋າ ຮຸ່ງ, ​ເອກ​ອັກຄະ​ລັດຖະທູດ​ສສ ຫວຽດນາມ ປະຈຳ ສປປ ລາວ

ພັກ, ລັດ ແລະ ປະຊາຊົນຫວຽດນາມ ຍາມໃດກໍມີຄວາມຮັບຮູ້ຢ່າງເລິກເຊິ່ງວ່າ: ໃນພາລະກິດ ການປົກປັກຮັກສາ ແລະ ສ້າງສາພັດທະນາປະເທດຊາດຫວຽດນາມ ​ໄປຄຽງຄູ່ກັບຄວາມພະຍາຍາມ ບຸກໜ້າບືນຕົວຂອງຕົນ, ພວກຂ້າພະເຈົ້າຍັງໄດ້ຮັບການສະໜັບສະໜູນ, ການຊ່ວຍເຫຼືອອັນລ້ຳຄ່າ ຈາກເພື່ອນມິດສາກົນ, ພິເສດແມ່ນຄວາມສາມັກຄີ ແລະ ການຊ່ວຍເຫຼືອອັນໃຫຍ່ຫຼວງ ​ແລະ ຈິງໃຈ ຂອງພັກ, ລັດ ແລະ ປະຊາຊົນລາວ. ໃນໂອກາດການສະ​ເຫຼີ​ມສະຫຼອງ​ອັນ​ສະຫງ່າ​ລາສີ​ນີ້, ຕາງໜ້າພັກ, ລັດ ແລະ ປະຊາຊົນຫວຽດນາມ ຂ້າພະເຈົ້າຂໍສະແດງຄວາມຮູ້ບຸນຄຸນຢ່າງເລິກເຊິ່ງມາຍັງພັກ, ລັດ ແລະ ປະຊາຊົນລາວອ້າຍນ້ອງ ທີ່ຍາມໃດກໍໄດ້​ໃຫ້ການສະໜັບສະໜູນ ແລະ ຊ່ວຍເຫຼືອແກ່ຫວຽດນາມ. ​ຂ້າພະ​ເຈົ້າ​ຂໍ​ສະ​ແດງ​ຄວາມ​ຂອບ​ອົກ​ຂອບ​ໃຈ​ຢ່າງ​ຈິງ​ໃຈ​ມາ​ຍັງ​​ອົງຄະ​ນະ​ພັກ, ອົງການ​ປົກຄອງ​ຂັ້ນ​ຕ່າງໆ ​ແລະ ປະຊາຊົນ​ລາວ​ໄດ້​ສ້າງ​ເງື່ອນ​ໄຂ​ອຳນວຍ​ຄວາມ​ສະດວກ​ທຸກ​ຢ່າງ​ໃຫ້​ວົງ​ຄະນາ​ຍາດ​ຊາວ​ຫວຽດນາມ ​ຢູ່ລາວດຳລົງ​ຊີວິດຢ່າງ​ຖາວອນ, ປະກອບ​ສ່ວນ​ເຂົ້າ​ໃນ​ພາລະກິດ​ສ້າງສາ​ປະ​ເທດ​ລາວ ​ແລະ ​ເປັນ​ຂົວ​ຕໍ່​ທີ່​ໜັກ​ແໜ້ນ​ໃຫ້​ແກ່​ສາຍ​ພົວພັນ​ພິ​ເສດ​ລະຫວ່າງ​ສອງ​ປະ​ເທດ.

ການສະ​ເຫຼີ​ມສະຫຼອງ​ວັນຊາດ​ຫວຽດນາມ​ຄົບຮອບ 72 ປີໃນ​ປີ​ນີ້ ​ໄດ້​ດຳ​ເນີນ​ໄປໃນທ່າມກາງ​ບັນຍາກາດອັນຟົດຟື້ນ​ຂອງ​ປີ “​ແຫ່ງ​ຄວາມ​ສາມັກຄີ​ມິດຕະພາບ​ ຫວຽດນາມ-ລາວ, ລາວ-ຫວຽດນາມ” ​ເຊິ່ງສອງພັກ, ສອງລັດ ແລະ ປະຊາຊົນສອງຊາດ ພວມຈັດຕັ້ງປະຕິບັດບັນດາກິດຈະກຳຕ່າງໆຂຶ້ນຢ່າງຄຶກຄືຶ້ນ ເພື່ອສະເຫຼີ​ມສະຫຼອງ​ວັນປະຫວັດສາດ​ສຳຄັນ​ດັ່ງກ່າວ. ພວກ​ເຮົາ​ມີ​ຄວາມ​ພາກພູມ​ໃຈ ​ແລະ ​ປິ​ຕິ​ຊົມ​ຊື່ນ​ເປັນ​ຢ່າງ​ຍິ່ງ​ທີ່​ເຫັນ​ວ່າ ​ໃນ​ຊຸມ​ປີ​ທີ່​ຜ່ານ​ມາ, ສາຍ​ພົວພັນ​ມິດຕະພາບ​ອັນ​ເປັນ​ມູນ​ເຊື້ອ, ຄວາມ​ສາມັກຄີ​ພິ​ເສດ ​ແລະ​ ການ​ຮ່ວມ​ມື​ຮອບດ້ານ​ຫວຽດນາມ-ລາວ ​ໄດ້​ມີ​ບາດ​ກ້າວ​ຂະຫຍາຍຕົວ​ຢ່າງ​ຕໍ່​ເນື່ອງ, ນັບ​ມື້​ນັບກວ້າງຂວາງ ​ແລະ ​ເລິກ​ເຊິ່ງ, ແທດເໝາະກັບຕົວຈິງ ແລະ ມີປະສິດທິ​ຜົນ ​ເຊິ່ງ​ໄດ້​ນຳ​ເອົາຜົນປະໂຫຍດອັນ​ໃຫຍ່​ຫຼວງມາ​​ໃຫ້​ສອງ​ປະ​ເທດ. ການ​ພົວພັນ​ທາງ​ດ້ານ​ການ​ເມືອງ​, ການ​ທູດ ນັບ​ມື້​ນັບຕິດ​ພັນ​ສະໜິດ​ແໜ້ນ ​ແລະ​ ຄວາມ​ໄວ້​ເນື້ອ​ເຊື່ອ​ໃຈ​ເຊິ່ງ​ກັນ ​ແລະ ​ກັນ​ໄດ້​ຮັບ​ການ​ເສີມ​ຂະຫຍາຍ ​ແລະ ​ເພີ່ມ​ທະວີ. ການ​ຮ່ວມ​ມື​ດ້ານ​ເສດຖະກິດມີ​ບາດກ້າວ​ຂະຫຍາຍຕົວກະ​ໂດດ​ຂັ້ນ, ຫວຽດນາມ ​ສືບ​ຕໍ່​ແມ່ນໜຶ່ງ​ໃນ​ບັນດາ​ປະ​ເທດ​ຢືນ​ຢູ່​ແຖວໜ້າກ່ຽວ​ກັບ​ການ​ລົງທຶນ ​ແລະ​ ເປັນ​ຄູ່​ຮ່ວມ​ມື​ການ​ຄ້າ​ລາຍ​ໃຫຍ່​ຂອງ​ລາວ. ການ​ເຊື່ອມ​ຈອດ​ສອງ​ພື້ນຖານ​ເສດຖະກິດ ໂດຍ​ສະ​ເພາະ​ແມ່ນ​ການ​ເຊື່ອມ​ຈອດ​ດ້ານ​ການ​ຄົມມະນາຄົມ​ກຳລັງ​ໄດ້​ຮັບ​ການ​ຊຸກຍູ້​ຢ່າງ​ແຂງ​ແຮງ, ຂ້າພະ​ເຈົ້າ​​ເຊື່ອ​ໝັ້ນ​ວ່າ: ​ໃນ​ໄລຍະ​ອັນ​ໃກ້ໆ​ນີ້​, ສປປ ລາວ ຈະ​ບ່ໍ​ແມ່ນ​ປະ​ເທດ “ບໍ່​ມີ​ທະ​ເລ” ອີກ ​ເຊິ່ງ ສປປ ລາວ ​ຈະສາມາດ​ນຳ​ໃຊ້ສ່ວນ​ໜຶ່ງ​ຂອງທ່າ​ເຮືອຫວຸ້ງອາງຫວຽດນາມ​ໄດ້​ຢ່າງ​ມີ​ປະສິດທິ​ຜົນ. ການ​ຮ່ວມ​ມື​ດ້ານ​ການ​ສຶກສາ-ບຳລຸງ​ກໍ່ສ້າງ, ການພັດທະນາ​ແຫຼ່ງຊັບພະຍາກອນ​ມະນຸດ​ສືບ​ຕໍ່​ໄດ້​ເພີ່ມ​ຂຶ້ນ​ທັງ​ດ້ານ​ປະ​ລີ​ມານ ​ແລະ ​ຄຸນ​ນະພາ​ບ. ການ​ພົວພັນ​ຮ່ວມ​ມື​ດ້ານ​ປ້ອງ​ກັນຊາ​ດ-ປ້ອງ​ກັນ​ຄວາມ​ສະຫງົບ, ການ​ຕ່າງປະ​ເທດນັບ​ມື້​ນັບ​ແໜ້​ນ​ແຟ້ນ ​ແລະ​ ມີ​ປະສິດທິ​ຜົນ, ປະກອບສ່ວນ​ເຂົ້າ​ໃນ​ການຮັກສາ​ສະຖຽນ​ລະ​ພາບ​ດ້ານການ​ເມືອງ, ຄວາມ​ເປັນ​ລະບຽບ​ຮຽບຮ້ອງ​ທາງ​ສັງຄົມ​ຂອງ​ແຕ່ລະ​ປະ​ເທດ, ຍົກ​ສູງ​ຖານະ​ບົດບາດ​ຂອງ​​ຫວຽດນາມ ​ແລະ ​ລາວ​ຢູ່ໃນ​ພາກ​ພື້ນ ​ແລະ ​ເວທີ​ສາກົນ. ວຽກ​ງານ​ໂຄສະນາ​ສຶກສາ​ອົບຮົມ​ປະຊາຊົນ​ສອງ​ປະ​ເທດ​ກ່ຽວ​ກັບ​ມູນ​ເຊື້ອ ​ແລະ​ ຄວາມ​ສຳຄັນ​ພິ​ເສດ​ຂອງ​ສາຍ​ພົວພັນ​ ຫວຽດນາມ-ລາວ​ ໄດ້​ຮັບ​ການ​ເອົາ​ໃຈ​ໃສ່​ເປັນ​ພິ​ເສດ ​ແລະ ​ໄດ້ຮັບ​ການ​ປະຕິບັດ​ຢ່າງ​ເປັນ​ປະຈຳ. ຜົນ​ງານ​ອັນ​ໃຫຍ່​ຫຼວງ​ດັ່ງກ່າວ​ນັ້ນ ​ແມ່ນ​ຍ້ອນ​ມີ​ຄວາມ​ຕັດສິນ​ໃຈດ້ານ​ການ​ເມືອງ ​ແລະ ​ການ​ນຳພາ​ຂອງ​ທັງສອງ​ພັກ ​ແລະ ຄວາມ​ມານະ​ພະຍາຍາມ​ຢ່າງ​ບໍ່​ຮູ້​ອິດ​ຮູ້​ເມື່ອຍ​ຂອງ​ປະຊາຊົນ​ສອງ​ຊາດ ​ເພື່ອ​ແນ​ໃສ່​ຮັກສາ ​ແລະ ​ເຮັດ​ໃຫ້​ມໍລະດົກ​ອັນ​ລ້ຳຄ່າດັ່ງກ່າວ​ໄດ້​ຮັບ​ການ​ເພີ່ມ​ພູນ​ຄູນ​ສ້າງ​ດ້ວຍ​ເລືອດ​ເນື້ອ​ເຫື່ອ​ແຮງ, ກຳລັງ​ໃຈ​ ​ແລະ​ ສະຕິ​ປັນຍາຂອງພະນັກງານ, ນັກຮົບ ​ແລະ ປະຊາຊົນສອງ​ຊາດ ​ຫວຽດນາມ-ລາວ.

ໃນ​ປີ​ 2017 ນີ້, ພວກ​ເຮົາ​ມີ​ຄວາມ​ປິ​ຕິ​ຊົມ​ຊື່ນ​ເປັນ​ຢ່າງ​ຍິ່ງ​ທີ່​ເຫັນວ່າ ​​ບັນດາ​ກິດ​ຈະ​ກຳຕ່າງໆ​ໄດ້​ຮັບ​ການຈັດ​ຕັ້ງ​ຂຶ້ນຢູ່ທັງ​ສອງ​ປະ​ເທດຢ່າງ​ເປັນ​ຂະ​ບວນຟົດ​ຟື້ນ ​ເພື່ອ​ຂ່ຳນັບ​ຮັບ​ຕ້ອນ “ປີ​ສາມັກຄີ​ ມິດຕະພາບ​ ຫວຽດນາມ-ລາວ, ລາວ-ຫວຽດນາມ” ສະ​ເຫຼີ​ມສະຫຼອງ​ສອງ​ວັນ​ປະຫວັດສາດ​ແຫ່ງ​ການ​ພົວພັນ​ລະຫວ່າງ​ສອງ​ປະ​ເທດ, ​ການ​ຢ້ຽມຢາມ​ເຊິ່ງ​ກັນ ​ແລະ ​ກັນ​ຂອງ​ການ​ນຳ​ຂັ້ນ​ສູງ​ຂອງ​ສອງ​ພັກ, ສອງ​ລັດ; ພິທີ​ໂຮມ​ຊຸມນຸມລະດັບ​ຊາດ​ສະ​ເຫຼີ​ມສະຫຼອງ​ສອງ​ວັນປະຫວັດ​ສາດ; ການ​ແຂ່ງຂັນ​ຊອກຮູ້​ກ່ຽວ​ກັບ​ສາຍ​ພົນ​ພັນ​ພິ​ເສດ ຫວຽດນາມ-ລາວ, ລາວ-ຫວຽດນາມ; ການ​ສຳ​ມະ​ນາວິທະຍາສາດ, ງານ​ພົບ​ປະສ້າງສັນລະ​ຫວ່າງ​ສອງ​ສະພາ​ແຫ່ງ​ຊາດ, ລະຫວ່າງ​ບັນດາ​ກະຊວງ, ຂະ​ແໜງ​ການ, ອົງການ​ຈັດ​ຕັ້ງ​ມະຫາຊົນ ​ແລະ ທ້ອງ​ຖິ່ນຕ່າງໆຂອງສອງປະເທດ; ບັນດາ​ງານ​ພົບ​ປະແລກປ່ຽນ​ສິ​ລະ​ປະວັດທະນະທຳ, ກິລາ; ການ​ເຄື່ອນ​ໄຫວ​ດ້ານ​ເສດຖະກິດ, ການ​ຄ້າ; ບັນດາ​ມາດ​ຕະການ​ໂຄສະນາ, ​ຍ້ອງຍໍຊົມເຊີຍ ​ແລະ ​ກິດ​ຈະ​ກຳອື່ນໆ​ນັ້ນ ​ແນ່ນອນ​ວ່າ​ຈະ​ສ້າງ​ຄວາມ​ປະ​ທັບ​ໃຈ​ທີ່​ເລິກ​ເຊິ່ງ, ເຮັດ​ໃຫ້​ນ້ຳ​ໃຈ​ສາມັກຄີ ​ມິດຕະພາບ​ພິ​ເສດ​ ຫວຽດນາມ-ລາວ ​ນັບ​ມື້ນັບຂະຫຍາຍຕົວ, ຊືມ​ເລິກ​​ເຂົ້າ​ເຖິງ​ປະຊາຊົນທຸ​ກຊັ້ນ​ຄົນ​ຂອງ​ສອງປະ​ເທດ​, ສ້າງ​ບາດກ້າວ​ຫັນປ່ຽນ​ທີ່​ສຳຄັນ​ທັງດ້ານ​ຄວາມ​ຮັບ​ຮູ້ ​ແລະ ​ການ​ກະທຳ ​ເພື່ອນຳ​​ເອົາສາຍ​ພົວພັນ​ມິດຕະພາບ​ທີ່​ເປັນ​ມູນ​ເຊື້ອ, ຄວາມ​ສາມັກຄີ​ພິ​ເສດ ​ແລະ ​ການ​ຮ່ວມ​ມື​ຮອບດ້ານ​ລະຫວ່າງ​ສອງ​ປະ​ເທດ ຂຶ້ນ​ສູ່ຈຸດ​ສູງ​ອັນ​ໃໝ່.

​ໃນ​ສະພາບ​ການ​ໂລກ ​ແລະ ​ພາກ​ພື້ນ​ມີ​ການ​ຜັນ​ແປ​​ອັນໃໝ່ທີ່ສັບສົນຄື​ໃນ​ປັດຈຸບ​ັນນີ້, ​ທັງ​ສອງ​ປະ​ເທດພວກເຮົາ​ລ້ວນ​ແຕ່​ກຳລັງ​ຢູ່​ຕໍ່ໜ້າ​ບັນດາ​ກາລະ​ໂອກາດ​ເພື່ອການພັດທະນາ, ແຕ່ຄຽງ​ຄູ່​ກັນ​ນັ້ນ ກໍຜະເຊີນກັບຄວາມຫຍຸ້ງຍາກ ແລະ ສິ່ງ​ທ້າ​ທາຍ, ຍິ່ງ​ກວ່າ​ເວລາ​ໃດ​ໝົດ ພວກ​ເຮົາ​ຍິ່ງ​ຈຳ​ເປັນມີ​ການ​​ເສີມ​ຂະ​ຫາຍ ​ແລະ ​ເພີ່ມ​ທະວີ​ສາຍ​ພົວພັນ​ພິ​ເສດ ​ຫວຽດນາມ-ລາວ ​ໃຫ້​ຈະ​ເລີ​ນງອກ​ງາມ​ກວ່າ​ເກົ່າ ​ໂດຍ​ເຊື່ອມ​ຊຶມ​ຕໍ່ການ​ສັ່ງສອນ​ຂອງ​ປະທານ ​ໂຮ່ຈິ​ມິນ ທີ່​ວ່າ: ສອງ​ຊາດຫວຽດ​ລາວໄດ້ ຝັງ​ຄວາມ​ຮັກ​ຢູ່ໃນ​ໃຈ; ຮົ່ງຮາ​ທັງ​ແມ່​ຂອງ ບໍ່​ເລິກ​ປຸນ​ປານ​ໄດ້”, ດ້ວຍ​ຄວາມ​ຕັດສິນ​ໃຈ ​ແລະ ພະຍາຍາມ​ຢ່າງ​ສູງ​ທີ່​ສຸດ​ຂອງ​ທັງ​ສອງ​ພັກ ​ແລະ​ ປະຊາຊົນ​ສອງ​ຊາດ, ພວກ​ເຮົາ​ມີ​ຄວາມ​ເຊື່ອ​ໝັ້ນ​ຢ່າງ​ໜັກ​ແໜ້ນ​ວ່າ ສາຍ​ພົວພັນ​ມິດຕະພາບ​ທີ່​ເປັນ​ມູນ​ເຊື້ອ, ຄວາມ​ສາມັກຄີ​ພິ​ເສດ ​ແລະ​ ການ​ຮ່ວມ​ມື​ຮອບດ້ານ​ລະຫວ່າງ​ ຫວຽດນາມ-​ລາວ ຈະ​ໄດ້​ຮັບ​ການ​ປົກ​ປັກ​ຮັກສາ, ​ຖະໜຸຖະໜອມ​ຄື​ດັ່ງ​ຄວາມ​ມຸ້ງ​ມາດ​ປາຖະໜາ​ຂອງ​ປະທານ ​ໄກສອນ ພົມວິຫານ ທີ່​ວ່າ: “​ເຖິງ​ວ່າ​ພູ​ຈະ​ຖືກເຊາະ​ເຈື່ອນ, ​ແມ່​ນຳ້​ລຳ​ເຊຈະ​ເຫືອດ​ແຫ້ງ, ​ແຕ່​ສາຍ​ພົວພັນ​ມິດຕະພາບລາວ​ຫວຽດ​ນາມ​ ຈະ​ໝັ້ນຄົງ​ທະ​ນົງ​ແກ່ນ​ຊົ່ວ​ກາລະ​ນານ ​ແລະ​ ປະທານ ສຸພານຸວົງ ທີ່​ວ່າ: ມິດຕະພາບ​ ລາວຫວຽດນາມ ສູງກວ່າພູຜາ, ຍາວຍິ່ງກວ່າແມ່ນ້ຳ, ກວ້າງຍິ່ງກວ່າທະ​ເລ​ຫຼວງ, ງາມ ຍິ່ງກວ່າເດືອນເພັງ, ຫອມຫວນຍິ່ງ​ກວ່າດອກໄມ້ທີ່ຫອມທີ່ສຸດ.

​​ໃນ​ໂອກາດອັນສະຫງ່າລາສີ​ທີ່​ມີ​ຄວາມ​ໝາຍ​ສຳຄັນ​ຍິ່ງ​ນີ້, ຂ້າພະ​ເຈົ້າ​ຂໍ​ອວຍພອນ​ຢ່າງ​ຈິງ​ໃຈ​ ​ໃຫ້ປະຊາຊົນ​ລາວ​ອ້າຍ​ນ້ອງ ພາຍ​ໃຕ້​ການ​ນຳພາ​ຂອງ​ພັກ​ປະຊາຊົນ ປະຕິວັດ​ລາວ ຈົ່ງສືບ​ຕໍ່​ຍາດ​ມາ​ໄດ້ບັນດາຜົນ​ງານ​ໃ​ໝ່​ໃຫຍ່​ຫຼວງ​ກວ່າ​ເກົ່າ​ໃນ​ພາລະກິດ​ປ່ຽນ​ແປງ​ໃໝ່, ປະຕິບັດ​ມະຕິ​ກອງ​ປະຊຸມ​ໃຫຍ່​ຄັ້ງ​ທີ X ຂອງພັກ​ຢ່າງ​ມີ​ໄຊ, ປະຕິບັດ​ສຳ​ເລັດ​ຈຸດໝາຍນຳ​ປະ​ເທດ​ລາວຫຼຸ​ດພົ້ນ​ອອກ​ຈາກ​ສະຖານະ​ພາບ​ດ້ອຍ​ພັດທະນາ​ໃນ​ປີ 2020, ສ້າງ​ປະ​ເທດ​ລາວ​ໃຫ້​ມັ່ງ​ຄັ່ງ​ເຂ້ັມແຂງ, ປະຊາຊົນ​ມີ​ຄວາມ​ຮັ່ງມີ​ຜາ​ສຸກ, ສັງຄົມ​ມີ​ຄວາມ​ສາມັກຄີ​ປອງ​ດອງ, ປະຊາທິປະ​ໄຕ, ຍຸຕິ​ທຳ ​ແລະ ສີວິ​ໄລ, ຖານະ​ບົດບາດ​ ​ແລະ ​ອິດ​ທິພົນ​ຊື່​ສຽງ ຂອງ ສປປ ລາວ ​ໄດ້​ຮັບ​ການ​ຍົກ​ສູງ​ເດ່ັ​ນຂຶ້ນ​ຢູ່​ໃນ​ພາກ​ພື້ນ ​ແລະ​ ໃນ​ໂລກ​ຢ່າງ​ບໍ່​ຢຸດ​ຢັ້ງ.

error: Content is protected !!