ແມນຢູ ຈັດໂຕເຕັມເປີດບ້ານຖະຫລົ່ມ ເຣດດິງ 3-1 ຜ່ານເຂົ້າຮອບ 5 ເອຟເອຄັບ
ໃນການແຂ່ງຂັນບານເຕະ ເອຟເອ ຄັບ ຮອບທີ 4 ຄູ່ສຸດທ້າຍຂອງເມື່ອຄືນວານນີ້ ແມນເຊັສເຕີ ຢູໄນເຕັດ ຍັງຄົງຟອມທີ່ຮ້ອນແຮງຈັດເຊັດໃຫຍ່ເປີດບ້ານຊະນະ ເຣດດິງ 3-1 ເຂົ້າສູ່ຮອບ 5 ໄດ້ຢ່າງສະບາຍ.
ໃນເຄິ່ງເວລາທໍາອິດ, ຜູ້ຈັດການທີມ ພອລ ອິ້ນ ຂອງ ເຣດດິງ ຕັ້ງຮັບຢັນສະເໝີ 0-0 ໄວ້ຈົນຈົບ 45 ນາທີທໍາອິດ, ເຖິງແມ່ນວ່າພວກເຂົາຈະລອດການເສຍປະຕູຈາກ VAR.
ເກມເດີນທາງມາຮອດເຄິ່ງເວລາທີ 2 ປະກົດວ່າ ເຣດດິງ ໝົດແຮງ ກ່ອນທີ່ຈະຖືກເຈົ້າບ້ານຍິງລົວໄດ້ 3 ປະຕູ ຈາກ ຄາເຊມິໂຣ ຍິງໄດ້ປະຕູຂຶ້ນນຳ 1-0 ໃນນາທີ 54 ແລະ ເພີ່ມປະຕູທີ 2 ຂອງຕົນເອງໃນນາທີ 58 ຈາກການປັ່ນໂຄ້ງໆນອກກອບ, ຕາມມາດ້ວຍ ເຟຣດ ທີ່ໄດ້ຕອກສົ້ນຕີບານເຂົ້າປະຕູໃນນາທີ 66.
ແຕ່ທີມຢາມກໍບໍ່ຍອມແພ້ງ່າຍໆ ເມື່ອ ອາມາດູ ເອັມເບນເກ້ ເອົາຫົວຕີບານເຂົ້າປະຕູຕີໄຂ່ແຕກໃຫ້ ເຣດດິງ ໄລ່ມາ 1-3 ແຕ່ບໍ່ມີປະຕູເພີ່ມອີກ ເຮັດໃຫ້ ແມນເຊັສເຕີ ຢູໄນເຕັດ ຊະນະ 3-1 ຜ່ານເຂົ້າຮອບ 5 ຫລື ຮອບ 16 ທີມສຸດທ້າຍ, ໂດບໃນຄືນນີ້ ລິເວີພູລ ອີກທີມໜຶ່ງຂອງ ພຣີເມຍລີກ ຈະລົງສະໜາມລາຍການດຽວກັນ (ເອເອັຟ ຄັບ) ພົບກັບ ໄບຣຕັນ ເວລາ 20:30 ໂມງ.
