ຍົກລະດັບຄວາມສາມາດໃຫ້ຜູ້ທີ່ເຮັດວຽກງານ ພິສູດຫລັກຖານ, ນິຕິເວດ ແລະ ເກັບໂຮມຫລັກຖານກ່ຽວກັບຢາເສບຕິດ

ກອງປະຊຸມສ້າງຂີດຄວາມສາມາດໃຫ້ບຸກຄະລາກອນທີ່ກ່ຽວຂ້ອງກັບຂະບວນການດໍາເນີນຄະດີຕາມກົດໝາຍບົນພື້ນຖານຂອງ ຫລັກຖານ ແລະ ນິຕິວິທະຍາສາດ ໃນວຽກງານພິສູດຫລັກຖານ, ວຽກງານນິຕິເວດ ແລະ ການເກັບໂຮມຫລັກຖານກ່ຽວກັບຢາເສບຕິດ ໄດ້ຈັດຂຶ້ນວັນທີ 20 ກັນຍາ 2023 ທີ່ນະຄອນຫລວງວຽງຈັນ, ເພື່ອເຮັດໃຫ້ບັນດານັກສຳມະນາກອນໄດ້ຮຽນຮູ້ບົດຮຽນດ້ານທິດສະດີທີ່ເປັນຫລັກການຂອງກົດໝາຍ, ພຶດຕິກໍາຕົວຈິງ ແລະ ປະສົບການຈາກອາຈານຕ່າງປະເທດ ເຊິ່ງໄດ້ນຳສະເໜີພາບລວມຂອງການຕ້ານອາຊະຍາກຳຂ້າມຊາດ, ເຕັກນິກການສືບສວນ-ສອບສວນໃນຄະດີຢາເສບຕິດ, ການຮວບຮວມພະຍານຫລັກຖານ, ຫລັກຖານດິຈິຕອນ, ການຄ້າມະນຸດ, ການຄ້າຢາເສບຕິດ, ຂະບວນການໃນຂັ້ນສານ ການສອບສວນພະຍານຫລັກຖານ ທີ່ກ່ຽວຂ້ອງກັບອາຊະຍາກໍາຂ້າມຊາດ ແລະ ຂະບວນການນິຕິວິທະຍາສາດ ສຳນັກງານພິສູດຫລັກຖານຕຳຫລວດ.

ມີວິທະຍາກອນຈາກພາກສ່ວນອົງການດໍາເນີນຄະດີອາຍາ ຄື: ອົງການສືບສວນ-ສອບ ສວນ, ອົງການໄອຍະການປະຊາຊົນ, ສານປະຊາຊົນ, ຊ່ຽວຊານຈາກອົງການ ສະຫະປະຊາຊາດວ່າດ້ວຍການຕ້ານຢາເສບຕິດ ແລະ ອາຊະຍາກຳ ຫຼື UNODC ແລະ ຊ່ຽວຊານຈາກຣາຊະອານາຈັກໄທ ເປັນຕົ້ນວຽກງານ ເຕັກນິກການສືບສວນ-ສອບສວນ ໃນຄະດີກ່ຽວກັບບັນຫາການຄ້າມະນຸດ ແລະ ຢາເສບຕິດ, ຂະບວນການໃນຂັ້ນສານ ໃນການສອບສວນພະຍານຫລັກຖານ ທີ່ກ່ຽວຂ້ອງກັບອາຊະຍາກໍາຂ້າມຊາດ ຊ່ວຍຖ່າຍທອດຄວາມຮູ້, ວິທີການ, ເຕັກນິກ ແລະ ທັກສະຕ່າງໆ.

ທັງນີ້ເພື່ອໃຫ້ສຳມະນາກອນນໍາເອົາບົດຮຽນດັ່ງກ່າວໄປໝູນໃຊ້ເຂົ້າໃນການປະຕິບັດໜ້າທີ່ວຽກງານທີ່ຕົນຮັບຜິດຊອບ ທັງຮັບປະກັນການດຳເນີນຄະດີໃຫ້ຄົບຖ້ວນ, ຮອບດ້ານ, ພາວະວິໄສ ແລະ ຖືກຕ້ອງຕາມກົດໝາຍ, ປົກປ້ອງສິດ, ຜົນປະໂຫຍດອັນຊອບທໍາຂອງປະຊາຊົນ ເພື່ອຮັບປະກັນການປະຕິບັດພາລະບົດບາດ, ສິດ ແລະ ໜ້າທີ່ຂອງຕົນ ໃຫ້ຖືກຕ້ອງຕາມກົດໝາຍ ແລະ ມີຜົນສໍາເລັດ ປະກອບສ່ວນເຮັດໃຫ້ປະເທດຊາດມີຄວາມສະຫງົບ ແລະ ຍຸຕິທໍາ.