ສະຖາບັນລາວ-ເກົາຫລີ ໄດ້ຮັບທຶນຊ່ວຍເຫລືອຈາກຊຳຊຸງ 600 ລ້ານກວ່າກີບ
ເມື່ອບໍ່ດົນມານີ້, ບໍລິສັດ ລາວຊຳຊຸງເອເລັກໂຕຣນິກ ຈຳກັດຜູ້ດຽວ ໄດ້ມອບທຶນສະໜັບສະໜູນສະຖາບັນພັດທະນາສີມືແຮງງານລາວ-ເກົາຫລີ 600 ລ້ານກວ່າກີບ, ຊຶ່ງພິທີມອບ-ຮັບເງິນຊ່ວຍເຫລືອດັ່ງກ່າວໄດ້ມີຂຶ້ນທີ່ນະຄອນຫລວງວຽງຈັນ, ລະ ຫວ່າງທ່ານ Kyung Mukkim ຫົວໜ້າພະແນກເຄື່ອງໃຊ້ໄຟຟ້າ ບໍລິສັດ ລາວຊຳຊຸງເອເລັກໂຕຣນິກ ຈຳກັດຜູ້ດຽວ ແລະ ທ່ານ ບຸນມາ ສິດທິໂສມ ຫົວໜ້າສະຖາບັນພັດທະນາສີມືແຮງງານລາວ-ເກົາຫລີ, ເພື່ອນຳໄປສ້ອມແປງຫ້ອງຮຽນ, ຈັດເຝິກອົບຮົມວິຊາຊີບຊ່າງໂທລະພາບ ແລະ ສະໜອງອຸປະກອນເຝິກອົບຮົມວິຊາສ້ອມແປງໂທລະພາບ.
ຫົວໜ້າສະຖາບັນດັ່ງກ່າວ ໃຫ້ຮູ້ວ່າ: ສະຖາບັນແຫ່ງນີ້ ໄດ້ຮ່ວມມືກັບບໍລິສັດ ລາວຊຳຊຸງເອເລັກໂຕຣນິກ ນັບແຕ່ທ້າຍປີ 2016 ແລະ ໄດ້ຮັບການຊ່ວຍເຫຼືອຈາກບໍລິສັດດັ່ງກ່າວເປັນປະຈຳມາ, ໂດຍສະເພາະ ການບູລະນະສ້ອມແປງຫ້ອງເຝິກງານ, ການເຝິກອົບຮົມສີມືແຮງງານສາຂາຊ່າງຕິດຕັ້ງ ແລະ ບຳລຸງຮັກສາເຄື່ອງເຢັນໃຫ້ຄູ-ອາຈານ ແລະ ນັກຮຽນຂະແໜງໄຟຟ້າເອເລັກໂຕຣນິກ ຈຳນວນ 105 ຄົນ, ພ້ອມນີ້, ພ້ອມໄດ້ມອບແອ 8 ໜ່ວຍ ລວມມູນຄ່າ 225 ລ້ານກີບ. ສຳລັບການຊ່ວຍເຫຼືອຄັ້ງນີ້ແມ່ນເປັນຄັ້ງທີ 2, ເຊິ່ງໄດ້ມີການເຝິກອົບຮົມວິຊາສ້ອມ ແປງເອເລັກໂຕຣນິກ, ໂດຍມີຜູ້ເຂົ້າຮ່ວມ 100 ຄົນ, ພ້ອມທັງໄດ້ມອບໂທລະພາບ 23 ໜ່ວຍ ແລະ ອຸປະກອນສ້ອມແປງໂທລະພາບຈຳນວນໜຶ່ງ ລວມມູນຄ່າ 600 ລ້ານກີບ, ເພື່ອແນໃສ່ຍົກລະດັບຄວາມຮູ້-ຄວາມສາມາດດ່ານຊ່າງສ້ອມແປງ ສາມາດນຳໄປປະກອບອາຊີບໃນອະນາຄົດ.
ຂ່າວໃຫ້ຮູ້ອີກວ່າ: ໃນວັນທີ 23 ຕຸລານີ້, ຜູ້ບໍລິຫານ ແລະ ພະນັກງານຂອງບໍລິສັດ ລາວ-ຊຳຊຸງ ອີເລັກໂຕຼນິກ ຈຳກັດ ໄດ້ນຳອຸປະກອນການສຶກສາປະກອບມີ: ເຄື່ອງນຸ່ງນັກ ຮຽນ 120 ຊຸດ, ພ້ອມດ້ວຍປຶ້ມຂຽນ, ສໍດຳ, ບານເຕະ ແລະ ຂະໜົມ ອີກຈຳນວນໜຶ່ງ ໄປມອບໃຫ້ນັກຮຽນປະຖົມສົມບູນບ້ານໜອງເຂັງ, ເມືອງໄຊທາ ນີ ນະຄອນຫລວງວຽງຈັນ, ກ່າວມອບໂດຍທ່ານ ຊຶງໂຮຊອຍ ຜູ້ຈັດການໃຫຍ່ ປະຈຳລາວ-ກຳປູເຈຍ ບໍລິສັດ ໄທຊຳ ຊຸງ ເອເລັກໂຕຼນິກ ຈຳກັດ ແລະ ກ່າວ ຮັບໂດຍທ່ານ ບຸນມີ ຊະນະອຸດົມ ອຳນວຍການ ໂຮງຮຽນດັ່ງກ່າວ, ນອກນີ້ ຍັງມີກິດຈະກຳທາສີຫ້ອງຮຽນ, ຫ້ອງນ້ຳ, ຕິດປ້າຍຫ້ອງຮຽນ, ລ້ຽງອາຫານທ່ຽງແກ່ນ້ອງນັກຮຽນ ແລະ ຫລີ້ນເກມ ເພື່ອຮັບລາງວັນຕ່າງໆດ້ວຍບັນຍາ ກາດມ່ວນ ຊື່ນ.
ທ່ານ ຊຶງໂຮຊອຍ ກ່າວວ່າ: ກິດຈະກຳດັ່ງກ່າວແມ່ນໜຶ່ງໃນໂຄງການຊ່ວຍເຫລືອ ສັງຄົມລະດັບພາກພື້ນອາຊີຕາເວັນອອກສຽງໃຕ້ ແລະ ໂອຊີເບຍ ເພື່ອປະກອບສ່ວນປັບ ປຸງຄຸນນະພາບຊີວິດການເປັນຢູ່ຂອງຊຸມຊົນທີ່ຊຳຊຸງໄດ້ດຳເນີນທຸລະກິດ, ທັງໃນດ້ານການ ສຶກສາ ແລະ ສິ່ງແວດລ້ອມ ແລະ ເຊື່ອວ່າກິດຈະກຳຄັ້ງນີ້ຈະຊ່ວຍໃຫ້ນ້ອງນັກຮຽນມີຄວາມ ສຸກ ແລະ ມີກຳລັງໃຈໃນການສຶກສາຮ່ຳຮຽນ ເພື່ອອະນາຄົດທີ່ດີໃນຕໍ່ໜ້າ ແລະ ຢືນຢັນ ຈະສືບຕໍ່ຈັດກິດຈະກຳທີ່ດີນີ້ໄປເລື້ອຍໆ.
