ແຂວງຊຽງຂວາງ ຕັດສິນ ຕັດອິດສະຫລະພາບ ຜູ້ກໍ່ເຫດຂົ່ມຂືນກະທຳຊຳເລົາເດັກອາຍຸຕ່ຳກວ່າ 15 ປີ
ວັນທີ 14 ມິຖຸນາ 2024, ຂ່າວ ປກສ ແຂວງຊຽງຂວາງ ລາຍງານວ່າ: ເມື່ອວັນທີ 5 ມິຖຸນາຜ່ານມາ ຄະນະສານອາຍາສານປະຊາຊົນຂັ້ນຕົ້ນແຂວງຊຽງຂວາງ ໄດ້ນຳຈະເລີຍ 1 ຄົນ ມາຕັດສິນຕັດອິດສະຫລະພາບ ໃນຂໍ້ຫາຂົ່ມຂືນກະທຳຊຳເລົາເດັກທີ່ມີອາຍຸຕ່ຳກວ່າ 15 ປີ. ອີງຕາມຄຳຖະແຫລງຂອງສານປະຊາຊົນແຂວງຊຽງຂວາງເຫັນວ່າ ທ້າວ ເຈຍຫລີ ອາຍຸ 29 ປີ, ຢູ່ບ້ານໜອງແຮດໃຕ້ ເມືອງໜອງແຮດ ແຂວງຊຽງຂວາງ ຖືກເຈົ້າໜ້າທີ່ກັກຕົວໃນວັນທີ 8 ມັງກອນ 2024 ໃນຂໍ້ຫາຂົ່ມຂືນກະທຳຊຳເລົາເດັກ.
ຜ່ານການຄົ້ນຄວ້າຂໍ້ມູນຫລັກຖານເອກະສານປະກອບຢູ່ສຳນວນຄະດີຢ່າງລະອຽດ ເຫັນວ່າຈຳເລີຍໄດ້ກະທຳຜິດແທ້, ເຊິ່ງຜູ້ເສຍຫາຍເປັນລູກລ້ຽງຂອງຕົນ ມີອາຍຸ 13 ປີ. ການກະທຳດັ່ງກ່າວເປັນອັນຕະລາຍຕໍ່ສັງຄົມເຮັດໃຫ້ສັງຄົມບໍ່ມີຄວາມສະຫງົບ ເຊິ່ງຈຳເລີຍກໍເຖິງອາຍຸກະສຽນທາງອາຍາ ເປັນຜູ້ທີ່ມີສະຕິສົມບູນ ຄາດຄະເນໄດ້ເຖິງຜົນສະທ້ອນທີ່ຈະເກີດຂຶ້ນກັບການກະທຳຂອງຕົນ ແຕ່ກໍຈົງໃຈກະທຳຜິດຕໍ່ສາຍຜົວເມຍ ແລະ ຮີດຄອງປະເພນີ, ແຕະຕ້ອງເຖິງສຸຂະພາບ ກຽດສັກສີຂອງເດັກຕ່ຳກວ່າ 15 ປີ ໂດຍເຈດຕະນາການກະທຳຂອງຈຳເລີຍແມ່ນເປັນການກະທຳຜິດທາງອາຍາໃນສະຖານຂົ່ມຂືນກະທຳຊຳເລົາເດັກທີ່ມີອາຍຸຕ່ຳກວ່າ 15 ປີ ຕາມທີ່ບົ່ງບອກໄວ້ໃນມາດຕາ 248 ວັກ 3 ຂອງປະມວນກົດໝາຍອາຍາທີ່ລະບຸໄວ້ວ່າ: ໃນກໍລະນີທີ່ຜູ້ກະທໍາຜິດ ຫາກໄດ້ຂົ່ມຂືນທໍາຊໍາເລົາ ດ້ວຍວິທີປ່ຽນຜຽນກັນ, ຂົ່ມຂືນທໍາຊໍາເລົາເດັກ ທີ່ມີອາຍຸຕໍ່ກວ່າ 15 ປີ, ໄດ້ທໍາຮ້າຍຮ່າງກາຍຜູ້ຍິງໃນເວລາຂົ່ມຂືນ ຫລື ເຮັດໃຫ້ຜູ້ຍິງພິການຕະຫລອດຊີວິດ ຫລື ເສຍຊີວິດ ຈະຖືກລົງໂທດຕັດອິດສະລະພາບ ແຕ່ ສິບປີ ຫາ ຊາວປີ ຫລື ຕັດອິດສະຫລະພາບຕະຫລອດຊີວິດ ແລະ ຈະຖືກປັບໃໝ ແຕ່ 10,000,000 ກີບ ຫາ 70,000,000 ກີບ.
ເມື່ອສານໄດ້ພິຈາລະນາຕາມຂໍ້ມູນຫລັກຖານ ແລະ ກົດໝາຍແລ້ວ. ຈຶ່ງໄດ້ເຫັນຄວນຕັດອິດສະຫລະພາບ ທ້າວ ເຈຍຫລີ 10 ປີ ປັບໄໝ 10 ລ້ານກີບ ພ້ອມທັງຈະໄດ້ປົວແປງຈິດໃຈໂຈດທາງແພ່ງຕາມທີ່ໄດ້ກຳນົດໄວ້ໃນປະມວນກົດໝາຍຕື່ມອີກ.
