5 ສິ່ງຂອງອັນຕະລາຍທີ່ບໍ່ຄວນເກັບໄວ້ໃນລົດ

   1. ກະຕຸກນຳ້ດື່ມ : ຫລາຍໆຄົນອາດຈະມີກະຕຸກນຳ້ດື່ມປະໄວ້ໃນລົດ ຂໍເຕືອນວ່າ ເມື່ອທ່ານດື່ມນຳ້ຮຽບຮ້ອຍແລ້ວໃຫ້ເອົາກະຕຸກນຳ້ດື່ມນັ້ນອອກຈາກລົດທັນທີ ເພາະກະຕຸກນຳ້ເຫລົ່ານີ້ອາດຈະກິ້ງຕົກລົງພື້ນ  ແລະ ກິ້ງໄປຢູ່ໃນຕຳແໜ່ງຄົນຂັບ ເຂົ້າໄປຂັດຢູ່ກັບຄັນເລັ່ງ ຫລື ເບຣກ ເຮັດໃຫ້ເກີດອຸປະຕິເຫດໄດ້, ແຕ່ກໍບໍ່ຕ້ອງຢ້ານຈົນບໍ່ກ້າເອົາກະຕຸກນຳ້ດື່ມຂຶ້ນລົດຂະໜາດນັ້ນ ສຳລັບນຳ້ດື່ມຂະໜາດນ້ອຍທົ່ວໆໄປ ຫາກຈະພົກຂຶ້ນໄປດື່ມເທິງລົດ ກໍໃຫ້ຈັບໃສ່ຊ່ອງເກັບມ້ຽນກະຕຸກນຳ້ດື່ມ ຫລື ຊ່ອງມ້ຽນຈອກໂດຍສະເພາະໃຫ້ເປັນລະບຽບຮຽບຮ້ອຍ ບໍ່ຮົກລົດຈະດີສຸດ.

     2. ເກີບ : ຫລາຍໆຄົນມັກຈະມີເກີບຫລາຍຄູ່ຕິດລົດໄວ້ເຜື່ອໃສ່ໃນຫລາຍໆໂອກາດ ບໍ່ວ່າຈະແມ່ນເກີບໃສ່ອອກງານ, ເກີບແຕະ ຫລື ເກີບກິລາ ເຊິ່ງສ່ວນຫລາຍມັກຄວາມສະດວກໂດຍການວາງໄວ້ພື້ນລົດເພື່ອໃຫ້ຈັບເອົາມາໃສ່ໄດ້ງ່າຍໆ ແລະ ແນ່ນອນວ່າເກີບເຫລົ່ານີ້ອາດຈະໄປຂັດກັບເບຣກ ຫລື ຄັນເລັ່ງ ຈົນເຮັດໃຫ້ເກີດອຸປະຕິເຫດໄດ້ຄືກັນ ດັ່ງນັ້ນ ຫາກໃຜຄິດຈະເອົາເກີບໄວ້ໃນລົດກໍ ໃຫ້ມ້ຽນເປັນລະບຽບຢູ່ຫລັງລົດຈະດີກ່ວາ ຫລື ຖ້າໃຜຈຳເປັນຕ້ອງມີເກີບຫລາຍຄູ່ກໍໃຫ້ເອົາໃສ່ກ່ອງ ຫລື ຫາຖາດໃຫຍ່ໆມາຈັດວາງເປັນຊ່ອງໆໃຫ້ເບິ່ງເປັນລະບຽບເພື່ອໃຫ້ຈັບມາໃສ່ໄດ້ງ່າຍໆ.

     3. ໄຟແຊັກ : ອາດຈະຍັງມີບາງຄົນທີ່ສູບຢາໃນລົດ ໂດຍສະເພາະເວລາເຄັ່ງຄຽດ ຫລື ເວລາຫງຸດຫງິດເມື່ອພົບກັບສະພາບການຈະລາຈອນຕິດຂັດດົນໆ ແລະ ກໍອາດຈະເຜີລືມ ຫລື ມີໄຟແຊັກສຳຮອງໄວ້ໃນລົດ ຄວາມສະດວກແບບນີ້ມັນອັນຕະລາຍຫລາຍ ໂດຍສະເພາະໃນປະເທດທີ່ອາກາດຮ້ອນອົບເອົ້າ ເພາະຖ້າທ່ານຈອດລົດຕາກແດດ ຫລື ເມື່ອອາກາດຮ້ອນເປັນເວລາດົນ ອາດຈະເຮັດໃຫ້ເກີດການລະເບີດຈົນເກີດຄວາມເສຍຫາຍຂຶ້ນມາໄດ້ ແລະ ຖ້າຮຸນແຮງກໍອາດຈະເຖິງຂັ້ນໄຟໄໝ້ລົດກໍມີ.

    4. ພາວເວີແບັງ ຫລື ແບັດເຕີຣີສຳຮອງ : ທຸກມື້ນີ້ໂທລະສັບມືຖືກໍກາຍເປັນອະໄວຍະວະທີ 33 ຂອງໃຜຫລາຍຄົນໄປແລ້ວ ແລະ ສຳລັບສະມາດໂຟນທ່ີມີການໃຊ້ງານໄດ້ຫລາກຫລາຍກໍຍິ່ງເຮັດໃຫ້ແບັດເຕີຣີໝົດໄວ ຫລາຍຄົນຈຶ່ງມັກພົກພາພາວເວີແບັງຕິດໂຕໄວ້ ແລະ ບາງຄົນກໍອາດຈະມີສຳຮອງໄວ້ໃນລົດ ເຜື່ອການໃຊ້ງານ GPS navigator ເວລາຂັບລົດນຳອີກ. ການປະພາວເວີແບັງໄວ້ໃນລົດກໍອັນຕະລາຍຄືກັນ ເພາະພາຍໃນພາວເວີແບັງຈະມີສານລິທຽມ ເຊິ່ງມີຄວາມໄວຕໍ່ການເກີດປະຕິກິລິຍາເຄມີເມື່ອໄດ້ ຮັບຄວາມຮ້ອນ ດັ່ງນັ້ນ ຫາກທ່ານປະໄວ້ໃນລົດທີ່ຕາກແດດ ອາກາດຮ້ອນ ກໍສ່ຽງຕໍ່ການລະເບີດຫລາຍ.

     5. ສະເປຣກະປ໋ອງຕ່າງໆ : ຜະລິດຕະພັນສະເປຣຕ່າງໆ ບໍ່ວ່າຈະສຳລັບປັບອາກາດ, ສຳລັບສີດຜົມ, ລະງັບກິ່ນໂຕ ຫລື ສີສະເປຣ ສິ່ງຂອງເຫລົ່ານີ້ກໍບໍ່ຄວນຖິ້ມໄວ້ໃນລົດດົນໆ ເພາະຍ້ອນກະປ໋ອງອາດຈະກິ້ງໄປຂັດເບຣກ ຫລື ຄັນເລັ່ງຈົນເກີດອຸປະຕິເຫດໄດ້ແລ້ວ ແກ໊ສທີ່ຢູ່ໃນກະປ໋ອງກໍອັນຕະລາຍຄືກັນ ເພາະເມື່ອອຸນຫະພູມສູງຂຶ້ນຫລາຍໆຈະເຮັດໃຫ້ແກ໊ສໃນກະປ໋ອງເກີດການຂະຫຍາຍໂຕ ແລະ ເຮັດໃຫ້ເກີດການລະເບີດພາຍໃນລົດໄດ້.