Google ຖືກ EU ປັບໄໝ 2,4 ພັນລ້ານເອີໂຣ ເພາະຈັດອັນດັບຄົ້ນຫາຂໍ້ມູນບໍ່ເປັນທຳ
ຄະນະກຳມາທິການເອີຣົບ (EU) ສັ່ງປັບໄໝ Google ເປັນເງິນ 2,4 ພັນລ້ານເອີໂຣ, ພາຍຫລັງຕັດສິນວ່າບໍລິສັດສັນຊາດອາເມລິກາແຫ່ງນີ້ໃຊ້ອຳນາດໃນຖານະຜູ້ໃຫ້ບໍລິການຄົ້ນຫາຂໍ້ມູນຍັກໃຫຍ່ໃນການຈັດອັນດັບການຄົ້ນຫາຂໍ້ມູນທີ່ບໍ່ເປັນທຳ ໂດຍຈັດບໍລິການປຽບທຽບສິນຄ້າທີ່ຈ່າຍເງິນໃຫ້ Google ໄປໄວ້ຕຳແໜ່ງເທິງໃນຜົນການຄົ້ນຫາຂໍ້ມູນສິນຄ້າ ເຮັດໃຫ້ບໍລິສັດຄູ່ແຂ່ງເສຍປຽບ. ຖືເປັນການປັບໄໝສູງສຸດເປັນປະຫວັດສາດທີ່ EU ສັ່ງລົງໂທດບໍລິສັດທີ່ຖືກກ່າວຫາວ່າ: ລະເມີດກົດໝາຍຕໍ່ຕ້ານການຜູກຂາດທາງການຄ້າ.
ທ່ານນາງ ມາຣເກດ ເວສທາເກີ ກຳມາທິການດ້ານການແຂ່ງຂັນທາງການຄ້າຂອງສະຫະພາບເອີຣົບ ລະບຸວ່າ: ສິ່ງທີ່ Google ເຮັດຜິດກົດໝາຍຕໍ່ຕ້ານການຜູກຂາດທາງການຄ້າຂອງ EU. ພ້ອມຊີ້ວ່າ: Google ປິດໂອກາດດ້ານການແຂ່ງຂັນຂອງບໍລິສັດຄູ່ແຂ່ງອື່ນໆ ແລະ ສິ່ງສຳຄັນ Google ປິດກັ້ນຜູ້ບໍລິໂພກຢູ່ເອີຣົບຈາກຜົນປະໂຫຍດທີ່ເກີດຈາກການແຂ່ງຂັນທາງການຄ້າ, ການເລືອກຢ່າງແທ້ຈິງ ແລະ ນະວັດຕະກຳຕ່າງໆ.
ນອກຈາກນີ້, ຄະນະກຳມາທິການເອີຣົບຍັງມີຄຳສັ່ງໃຫ້ Google ຢຸດການກະທຳແບບນີ້ພາຍໃນ 90 ວັນ, ຖ້າບໍ່ປະຕິບັດຈະຖືກລົງໂທດເພີ່ມອີກ ເຊິ່ງອາດສູງຂຶ້ນວັນລະ 14 ລ້ານໂດລາສະຫະລັດ.
ສ່ວນ Google ລະບຸວ່າ: ຈະອຸທອນຄຳຕັດສິນດັ່ງກ່າວ ໂດຍກ່ອນໜ້ານີ້ Google ອ້າງວ່າ: ເວັບໄຊຂາຍສິນຄ້າ ແອມະຊອນ ແລະ ອີເບ ມີອິດທິພົນຕໍ່ພຶດຕິກຳການຊື້ສິນຄ້າຂອງຜູ້ບໍລິໂພກຫລາຍກວ່າ, ພ້ອມປະຕິເສດຂໍ້ກ່າວຫາຂອງຄະນະກຳມາທິການເອີຣົບ.
ທັງນີ້, ບໍລິການ Google Shopping ຈະສະແດງພາບ ແລະ ລາຄາສິນຄ້າທີ່ກ່ຽວຂ້ອງກັບຄຳຄົ້ນຫາ, ພ້ອມທັງຊື່ຂອງຮ້ານຄ້າ ແລະ ຄະແນນການຄົ້ນຫາຄືນ ເຊິ່ງກໍ່ໃຫ້ເກີດຜົນກະທົບທາງລົບຕໍ່ສິນຄ້າຂອງບໍລິສັດຄູ່ແຂ່ງ, ສ່ວນລາຍລະອຽດທີ່ປາກົດໃນ Google Shopping ຈະລະບຸວ່າ: ເປັນສິນຄ້າທີ່ຈ່າຍຄ່າໂຄສະນາ ເຊິ່ງສະທ້ອນວ່າຜົນການຄົ້ນຫາຂໍ້ມູນຂອງບໍລິການນີ້ຈະສະແດງສະເພາະສິນຄ້າທີ່ຈ່າຍຄ່າໂຄສະນາໃຫ້ Google ເທົ່ານັ້ນ ເຊິ່ງຕ່າງຈາກຜົນການຄົ້ນຫາຕາມປົກກະຕິ.
ຖ້າເປັນການຄົ້ນຫາຈາກມືຖື, ຜູ້ໃຊ້ຈະເຫັນສະເພາະສິນຄ້າຈາກບໍລິການ Google Shopping ເທົ່ານັ້ນ ແລະ ຈະຕ້ອງເລື່ອນໜ້າຈໍລົງ ຖ້າຕ້ອງການເບິ່ງລິງສິນຄ້າອື່ນ. ນອກຈາກນີ້ Google ຍັງໄດ້ຜົນປະໂຫຍດຈາກການໂຄສະນາຂອງ Google Shopping ສະແດງພາບສິນຄ້າທີ່ມີຄວາມໂດດເດັ່ນຫລາຍກວ່າໂຄສະນາອື່ນທີ່ປາກົດສະເພາະຕົວອັກສອນ.
