Fitbit ກຽມປ່ອຍຟີເຈີເອົາໃຈຜູ້ຍິງ ຄໍານວນວັນມີຮອບເດືອນ ແລະ ຕົກໄຂ່ໄດ້ດ້ວຍ
Fitbit ກຽມປ່ອຍຟີເຈີໃໝ່ “Female Health Tracking” ເພື່ອຊ່ວຍນັບຮອບຂອງການມີປະຈໍາເດືອນ ແລະ ວັນຕົກໄຂ່ໃຫ້ກັບສາວໆ ຫຼັງຈາກຜົນສໍາຫຼວດຂອງ Fitbit ເມື່ອບໍ່ດົນມານີ້ພົບຂໍ້ເທັດຈິງທີ່ໜ້າຕົກໃຈວ່າ ມີຜູ້ຍິງເຖິງ 80% ທີ່ບໍ່ຮູ້ວ່າການມີຮອບເດືອນ ຫຼື ປະຈໍາເດືອນນັ້ນມີຈັກຊ່ວງ ແລະ ມີເຖິງ 70% ທີ່ບໍ່ສາມາດບອກ ຫຼື ຊີ້ຊັດໄລຍະເວລາທີ່ຕົນເອງມີຮອບເດືອນໄດ້.
ດ້ວຍເຫດນີ້ ແອັບພິເຄຊັ່ນ Fitbit ຈຶ່ງກຽມປ່ອຍຟີເຈີໃໝ່ນີ້ໃຫ້ໄດ້ເລີ່ມທົດລອງໃຊ້ກັນໃນຊ່ວງທ້າຍເດືອນມີນານີ້ ຊຶ່ງສາມາດໃຊ້ໄດ້ທັງໂທລະສັບ ແລະ ສະມາດວອທຊ໌ ຮຸ້ນ Fitbit Ionic ແລະ Fitbit Versa ເພື່ອຕິດຕາມການມີຮອບເດືອນ, ການຕົກໄຂ່ ລວມເຖິງໂອກາດໃນການຖືພາດ້ວຍ.
ໂດຍຜູ້ທີ່ໃສ່ຂໍ້ມູນວ່າຕົນເອງເປັນເພດຍິງ ຈະໄດ້ຮັບການແຈ້ງເຕືອນວ່າ ຟີເຈີ “Female Health Tracking” ສາມາດໃຊ້ງານໄດ້ແລ້ວ ແຕ່ຫາກໃຜບໍ່ໄດ້ລະບຸເພດຂອງຕົນເອງໃນແອັບ ກໍສາມາດກົດ “Edit” ບ່ອນແຜງດ້ານລຸ່ມຂອງແອັບ ເພື່ອໃສ່ຂໍ້ມູນໄດ້ເຊັ່ນກັນ ຊຶ່ງຟີເຈີນີ້ຈະໃຊ້ໄດ້ສໍາລັບຜູ້ຍິງທີ່ມີອາຍຸແຕ່ 13 ປີຂຶ້ນໄປ ໃນສະຫະລັດອາເມລິກາ, ສ່ວນປະເທດອື່ນໆ ອາດມີຊ່ວງຂອງອາຍຸທີ່ຕ່າງກັນໄປ.
ທັນທີທີ່ເລີ່ມໃຊ້ງານດ້ວຍການລະບຸວັນທໍາອິດທີ່ເລີ່ມເປັນປະຈໍາເດືອນ ແລະ ວັນສຸດທ້າຍທີ່ປະຈໍາເດືອນໝົດ ແອັບນີ້ຈະຄໍານວນໃຫ້ໃນຄັ້ງຕໍ່ໄປວ່າ ຈະມີປະຈໍາເດືອນມາອີກຄັ້ງໃນໄລຍະຊ່ວງເວລາໃດ ? ໂດຍຈະປະກົດແຖບສີບົວເທິງໂຕເລກປະຕິທິນໃນຊ່ວງວັນທີ່ຄົບຮອບເດືອນມາ, ສ່ວນຊ່ວງທີ່ຕົກໄຂ່ຊຶ່ງຈະເປັນໄລຍະເວລາທີ່ຖືພາໄດ້ນັ້ນ ຈະປະກົດໃຫ້ເຫັນເປັນແຖບສີຟ້າເທິງປະຕິທິນ.
Dr. Katharine White ຜູ້ຊ່ວຍສາສະດາຈານກ່ຽວກັບຜູ້ຍິງ ແຫ່ງໂຮງຮຽນການແພດ ມະຫາວິທະຍາໄລບອສຕັນ ລະບຸວ່າ “ແອັບນີ້ບໍ່ພຽງແຕ່ບັນທຶກໄລຍະເວລາທີ່ຜູ້ຍິງມີຮອບເດືອນເທົ່ານັ້ນ ແຕ່ຍັງບອກໄດ້ວ່າມີຮອບເດືອນຫຼາຍປານໄດ້ດ້ວຍ ຊຶ່ງຫາກມີຮອບເດືອນໃນປະລິມານດົນກວ່າທີ່ຄວນຈະເປັນ ກໍອາດຈະມີເນື້ອງອກຢູ່ໃນມົດລູກໄດ້”.
