ອຸຕຸເຕືອນ ລະວັງພາຍຸດອກສຸຣິ ໃນວັນທີ 15-17 ກັນຍານີ້
ກົມອຸຕຸນິຍົມ ແລະ ອຸທົກກະສາດ ແຈ້ງວ່າ: ພາຍຸດອກສຸຣິ (DOKSURI) ຫົວທີ 19 ປະຈຳປີ 2017, ໄດ້ປົກຄຸມຢູ່ເຂດທະເລຈີນໃຕ້ ໃກ້ພາກເໜືອດ້ານຕາເວັນຕົກຂອງປະເທດຟີລິປິນ, ພາຍຸຫົວນີ້ ຈະເພີ່ມກຳລັງແຮງຂຶ້ນເປັນພາຍຸໃຕ້ຝຸ່ນ ໃນຕອນເຊົ້າວັນທີ 15 ກັນຍາ ແລະ ເຄື່ອນທີ່ຜ່ານເກາະໄຮ້ໜຳໃນມື້ຕໍ່ມາ ແລ້ວສືບຕໍ່ເຄື່ອນເຂົ້າຝັ່ງເຂດແຂວງວິງ, ປະເທດຫວຽດນາມ ແລ້ວເຄື່ອນທີ່ຜ່ານແຂວງບໍລິຄຳໄຊ, ໄຊສົມບູນ ແລະ ຊຽງຂວາງໃນຕອນເຊົ້າວັນທີ 16 ກັນຍານີ້, ຈາກນັ້ນ ກໍຈະອ່ອນກຳລັງລົງເປັນພາຍຸດີເປ່ຣເຊີນ ເຄື່ອນທີ່ຜ່ານແຂວງຫລວງພະບາງ, ອຸດົມໄຊ ແລະ ບໍ່ແກ້ວ ໃນວັນທີ 17 ກັນຍານີ້. ຈະເຮັດໃຫ້ມີຝົນຕົກໃນລະດັບປານກາງ ຫາໜັກຢູ່ເປັນບໍລິເວນກວ້າງໃນເຂດພາກກາງຫາພາກເໜືອ, ພ້ອມມີລົມພັດແຮງຢູ່ບາງທ້ອງຖິ່ນໃນລະຫວ່າງວັນທີ 15-17 ກັນຍານີ້, ດັ່ງນັ້ນ ຈຶ່ງຂໍແຈ້ງເຕືອນເຖິງປະຊາຊົນທີ່ອາໃສຢູ່ບັນດາແຂວງພາກເໜືອ ແລະ ພາກກາງ ຈົ່ງມີສະຕິກຽມພ້ອມຮັບມືກັບສະພາບຝົນຕົກໜັກ ແລະ ລົມພັດແຮງທີ່ຈະກໍໃຫ້ເກີດນ້ຳຊຸ, ດິນເຈື່ອນ, ນ້ຳຖ້ວມ ແລະ ລົມແຮງ, ຊຶ່ງຈະເປັນອັນຕະລາຍຕໍ່ຊີວິດ ແລະ ຊັບສິນຂອງປະຊາຊົນ, ພ້ອມນີ້ ກໍໃຫ້ກະກຽມເຄື່ອນຍ້າຍວັດຖຸສິ່ງຂອງ ແລະ ສັດລ້ຽງໄປໄວ້ບ່ອນທີ່ປອດໄພ ແລະ ໃຫ້ຕິດຕາມການລາຍງານສະພາບອາກາດເປັນປົກກະຕິ.