ນ້ອມອາໄລ ການສະຣີຣະສັງຂານ ຂອງ ພຣະອາຈານໃຫຍ່ ມະຫາບຸນມາ ສິມມາພົມ ປະທານສູນກາງ ອພສ ແຫ່ງ ສປປ ລາວ

ວັນທີ 17 ເມສາ 2025 ນີ້ ວັດສົມສະຫງັດ ບ້ານຝາຍ ເມືອງໄຊເສດຖາ ນະຄອນຫລວງວຽງຈັນ ອອກແຈ້ງວ່າ: ຄະນະສົງວັດສົມສະຫງັດ ຄະນະສິດສານຸສິດ ແລະ ຄະນະລູກຫລານ ຂໍແຈ້ງຂ່າວ ວິບປະໂຍກ ຄວາມເສົ້າສະຫລົດໃຈ ມາຍັງ ພຣະມະຫາເຖຣານຸເຖຣະ ພຣະສົງສາມະເນນ ການນຳພາ ພັກລັດ ການຈັດຕັ້ງ ອອກຕົນຍາດໂຍມ ພຸດທະສາສະນິກະຊົນລາວບັນດາເຜົ່າ ທັງພາຍໃນ ແລະຕ່າງປະເທດ ຊາບວ່າ ອົງພຣະປະທານສູນກາງອົງການພຸດທະສາສະໜາສໍາພັນ ແຫ່ງ ສປປ ລາວ ໄດ້ລະສະລີລະສັງຂານແລ້ວ ໃນວັນພະຫັດ ວັນທີ 17 ເມສາ ພຣະພຸດທະສັງກາດ 2567 (2025) ເວລາ 00:22 ທີ່ ວັດສົມສະຫງັດ ບ້ານຝາຍ ເມືອງໄຊເສດຖາ ນະຄອນຫລວງວຽງຈັນ ລວມອາຍຸ ໄດ້ 92 ປີ, ວັດສາຍຸການ 72 ພັນສາ.

ປັດຈຸບັນ ສະລີລະສັງຂານ ບຳເພັນກຸສົນສັມປະທາສັກກາຣະບູຊາ ທີ່ ວັດສົມສະຫງັດ ບ້ານຝາຍ ກ່ອນທີ່ຈະເຄື່ອນຍ້າຍໄປສູ່ ຫໍທໍາມະສະພາ ຊັ້ນ 2 ວັດພຣະທາດຫລວງເໜືອ ເມືອງໄຊເຊດຖາ ນະຄອນຫລວງວຽງຈັນ.